Сынавлардан нечик оьтейик?

Гьар адамны яшавунда къыйынлыкълар бола. Иманы барлар шо сынавлардан уьлгю ва гьакъыл топлап чыгъа. Огъар масъалагъа тюз янашыв кёмек этедир, демек болгъан ишге бюдюремей, Есибиз Аллагьдан ﷻ кёмек излей. Къыйынлыкъгъа къаршы болгъанда башгъаланы айыплап турмай ва хатири къалмагъа тарыкъ тюгюл.

Яшавда ёлугъагъан гьар авурлукъ иманы бар адам учун сынавдур ва мунда бир затны эсде сакъламагъа тийишли: Есибиз Аллагь ﷻ биз гётерип болардан артыкъны бермес. Иманы къатты инсан билеген кюйде, бары да ишлер, шону ичинде ону яшаву Къудратлы Аллагьны ﷻ пурманы булан бола. Амма иманны къаттылыгъына да къарамайлы, башына балагь къопгъанда шолай адамны юрегине шекликлер гелмеге болагъаны яшыртгъын тюгюл.

Шолай къыйынлы мюгьлетлерде бусурман адамны даражасы артмагъа бола, неге десе сынавлар Аллагь ﷻ къулун сюегенни белгиси болмакълыкъ бар. Шолайлыкъ буса, иманны сакъламагъа ва беклешдирмеге кёмек эте. Бир-бирде къыйынлыкълагъа къаршы турув чыдамлыкъгъа ва хасият чыныкъдырывгъа гелтире. Шо саялы Есибиз Аллагь ﷻ бир-бирде яшав ёлубузну авур этмей, тек сынавлар йибереген кюй де бола. Яратгъаныбыз йиберген къадаргъа чыдамлы болув, бары да зат янгыз бир Аллагьны ﷻ пурманы булан болагъангъа тюшюнюв иманы бар адамгъа къыйынлыкълардан оьтмеге кёмек эте ва гьатта Есибизни разилигин алмагъа да ёл ача.

Анабыз Айшадан етишген кюйде, Пайхаммар ﷺ булай айтгъан болгъан: «Бусурман адам не йимик къыйынлыкъгъа ёлукъса да, гьатта тегенек тийсе де, Аллагь ﷻ шо саялы ону даражасын артдырар ва гюнагларындан гечер» (Муслим). Яшавда гьарибиз не йимик буса да масъалагъа ёлукъмай къалмагъандыр ва шолайлыкъдан сынав алмакъ ва шондан эсенаман чыкъмакъ учун тюз янашыв болмагъа герек. Демек, Есибиз Аллагьны ﷻ къадарын парахат юрек булан къабул этмеге тарыкъ. Къыйынлыкъ яда балагь къаршылашагъанда бары да зат янгыз Аллагьны ﷻ пурманы булан болагъанны эсде сакъламагъа герекбиз ва болгъан ишде бизин учун яхшылыкъ яшырылгъан болмагъа бола. Биз билмеге болмайбыз чы о-бу болгъан иш умуми гьалгъа гёре бизин учун маслагьат болуп чыкъмагъа болурну гьакъында.

МУСЛИМ АБДУЛАЕВ