Хош гелдинг, аявлу рамазан ай!
Бусурманланы лап агьамиятлы ва абурлу айы геливю булан охувчуларыбызны къутлайбыз! Къуръанда булай айтыла (маънасы): «Рамазан – адамланы тюз ёлгъа бакъдырагъан, гертини ялгъандан айырагъан, Къуръан тюшюрюлген ай» («Аль-Бакъара» деген сура, 185-нчи аят).
Пайхаммарны ﷺ гьадисине гёре, рамазан айны геливю булан женнетни къапулары ачыла, жагьаннемни къапулары буса ябыла ва бусурманланы тюз ёлдан тайышдырмасын, гьакъ ёлдан бурмасын учун шайтанланы байлай. Башгъа гьадисде булай айтыла: «Эгер де адамлар рамазан айны ниъматларын, яхшылыкъларын биле эди буса, олар бу ай даим узатылгъанны сюер эди». Бу айда товба этегенлеге гечилмекни умуту кёп къадар арта, этген ишлери мизан терезелер булан чегилегенде де, олар яхшылыкъгъа багъып авур тартажакъгъа да умут оьсе. Шо саялы рамазан ай башлангъандокъ алда этилген гюнагь ишлеге гьёкюнюп, товба этмеге тарыкъ, Аллагьдан ﷻ оьзюн гечмекни тилемеге герек. Шону булан бирче болгъан чакъы кёп яхшы ишлер этмеге, жамият булан ва межитде намаз къылмагъа, ата-ананы, къардашланы, айлана якъдагъыланы сююндюрмеге, гечмеге тарыкълар бар буса, гечип, къылынмагъан намазлар бар буса, шоланы тёлемеге, мекенли кюйде таравихлени, оьзге сюннет намазланы къылмагъа, Къуръан охумагъа, салават салмагъа, башгъа дуалар охумагъа, дин илмулагъа уьйренмеге, Исламны гьакъында айтылагъан мажлислерде ортакъчылыкъ этмеге, садагъа оьлешмеге, гери урулагъан затлардан арек болмагъа къаст этме тарыкъ. Шолай этмеге неге тарыкъ десе, бу айда этген яхшы ишлер учун зувап кёп керенге артагъанда йимик, яман ишлер этилсе, жаза да артагъанны билмеге герек.
Бусурманлагъа Аллагь ﷻ бу айда берген савгъат – рамазан айдагъы ораза тутув ва шо саялы берилеген шабагъат бола.
Рамазан айгъа гьюрмет
Рамазан айда гюндюз вакътиде бусурманман деп айтагъан, тек авзунда сигарети булангъы яда урлукъ чертеген, о-бу чайнайгъан адамланы гёрмеге бола. Рамазан айда ораза тутувгъа булай янашыв сав Ислам динге гьюрметсиз билдиреген бола ва тарбиясызлыкъны, эдепсизликни де гёрсете.
«Нузхатуль Мажалис» деген китапдан алынгъан уьлгю ораза тутагъангъа гьюрмет этив де яхшы ишлерден экенин гёрсетсе.
Бир мажуси (бутперес адам, огнепоклонник) бусурманлар турагъан авулда яшай болгъан. Бир гезик рамазан айда ол уланы къырда ашайгъанын гёре. Мажуси уланын уьйге чакъырып, ол ораза тутагъан бусурманлагъа гьюрмет билдирмегенине такъсырлагъан болгъан.
Заман гетип, ол мажуси герти дюньягъа гёчген сонг, бир алим ону тюшюнде женнетде уллу тахда олтуруп гёре. Алим огъар: «Сен чи бусурман тюгюл эдинг. Женнетге нечик чыкъмагъа болдунг?» – деп сорай. Ол: «Оьле турагъанда Есибиз магъа шагьадатны гелтирмеге юрегиме салды. Гьакъ юрекден инанып ва шагьадатны герти этип, мен Яртагъаныбызгъа бусурман болуп гетдим», – деген.
Иътикаф
Айшат етишдирген кюйде, Аллагьны Элчиси ﷺ рамазан айны ахырынчы он гюнюнде ва гечесинде иътикаф эте болгъан, демек шо заманны межитде ибадат эте туруп йибере болгъан. Пайхаммар ﷺ оьлген сонг шолай ону къатынлары да эте болгъан. Бизге де шо гюнлени иътикаф этивде йибермеге яхшы. Иътикафны он гюн этмеге бажармайгъан гиши шону оьзю болгъан чакъы этсе де ярай: бир нече гюн буса да, бир гюн буса да, гьатта бир сагьат яда бир минут!
Межитде иътикаф этип йибермеге янгыз рамазан айда тюгюл, оьзге заманда да яхшы санала.
Рамазан айда ораза тутувну гьакъында бир-нече гьадис
Рамазан айда ораза тутгъан гишиге алда этилген бары да гюнагьлары гечиле.
Рамазан айда шардангъа туруп ашамакъ барлыкъны болдура. Шардангъа туруп ашагъыз.
Эртен де бир Къуръан аят, гече де бир Къуръан аят охугъангъа аятдагъы гьарпланы санавуна гёре яхшылыкълар болажакъ. Шолай яхшылыкъланы дин учун жанын къурбан этген шагьитлер ала.
Рамазан айда жамият булан намаз къылмагъа гьаракат этеген гишиге, къылгъан ракаатланы санавуна гёре женнетде нюрден шагьар этиле.
Эгер де Есибизни къуллары рамазан айны берекетин ва яхшылыкъларын англай ва биле эди буса, олар бу ай сав йыл узатылгъанны сюер эди.
Рамазан айда бир гюнагь иш этген адамгъа эки къат такъсыр болажакъ, яхшы иш этгенге де эки къат шабагъат бола.
Рамазан айгъа уллу гьюрмет булан янашмагъа тарыкъ. Шону ниъматлары иманы барланы сююндюре. Бу айны биринчи он гюню яхшылыкълар гелтире, экинчи он гюню Яратгъаныбызны гечивюн гелтире, уьчюнчю он гюн буса – жагьаннемни отундан сакълай.
Аллагь ﷻ булай айтгъан: «Гьей малайиклер, Мени учун кеп чегивню, леззет алывну, ашны, сувну къойгъан къулума къарагъыз чы!»
Женнетни «Райан» деген къапулары бар, шондан таба янгыз ораза тутгъанлар гирмеге бола. Шондан таба гиргенлер Яратгъаныбызны гёрмеге болажакъ деп айтылгъан.
Бары да затны оьз ёлу бар, ибадатгъа, Аллагьгъа ﷻ къуллукъ этивге элтеген ёл – ораза.
Къалкъан (щит) давда адамны къоруйгъанда йимик, ораза да шо кепде жагьаннемни отундан сакълай.
Ким рамазан айда ата-анасын сююндюре буса, олагъа тынглай буса ва болагъан кююнде кёмек эте буса, шогъар Аллагь ﷻ Рагьмусун бакъдыра ва Пайхаммар ﷺ огъар кёмекге геле.
Ораза тутугъуз – шо савлукъгъа да пайдалы.
Рамазан айда гюнагь ишлени къоягъанлагъа Яратгъаныбыз Аллагь ﷻ 11 айны гюнагьларын гече.
