Бараат гече
Шагьбан айны ичинде бек сыйлы, берекетли – Бараат гече – деп айтылагъан уллу гече бар. Шо шагьбанны ортанчы гечеси. О гече Аллагь I айрыча рагьму эте, дуалагъа жавап бере, кёкден кёп яхшылыкълар ва берекетлер тёге.
Пайхаммарыбыз r булай айтгъан: «Шагьбан айны ортанчы гечеси болгъан заманда Аллагьу таала Оьзюню яратгъан къулларына къарайдыр ва барын да гечедир, мушрикден де (капир), биревге душманлыкъ тутгъан адамдан да къайры» (Агьмат, Ибн Гьиббан, Табарани).
Пайхаммарны r агьлюсю Айша булай айта: «Бир гече Пайхаммар r намаз къылмагъа туруп, суждагъа баргъан заманда, суждада узакъ къалды. Мен ол оьлюп сама къалмадымы деп ойлашдым. Мен ювукъ баргъан заманда, суждада Пайхаммар r: «Гьей Аллагьым I , Сени гечмеклигинг булан, Сени акъубангдан сакъламакъны тилеймен, Сагъа макътавлар да этемен, тийишли макътавлар да этип болмайман, Сен Оьзюнгню макътагъан кюйдеги Аллагьсан I », – дуа этип турагъанны гёрдюм. Намаз къылып битген сонг Пайхаммар r магъа: «Гьей Айша, сен билемисен бу не гече экенни? Бу шагьбан айны ортанчы гечеси. Оьр болгъан, сыйлы болгъан Аллагь I Оьзюню къулларына айрыча къарайгъан, гюнагьларындан гечеген гече ва бирев-бирев булан эришип, арасында душманлыкъ барланы шо кююнде къоягъан гече», – деп айтды» (Байгьакъи).
Дагъы да, Пайхаммарыбыз r булай айтгъан: «Шагьбан айны ортанчы гечеси болгъан заманда ибадат булан оьтгеригиз ва шо гюнню оразасын да тутугъуз. Гертиден де, Аллагьу таала шо гече: «Бармы гюнагьлардан гечмекни тилейген гиши? Шону гюнагьларындан гечейим! Бармы рыцкъы тилейген гиши? Шогъар рыцкъы берейим! Бармы къыйынлыкъгъа, аврувгъа тарыгъан гиши? Къыйынлыкълардан, аврувлардан къолайлыкъ берейим!» – деп, эртен гюн чыкъгъанча шулай айта» (Ибн Мажагь).
Муна шулай сыйлы гече Бараат гече, Аллагь I дуалагъа жавап береген гече. Биз де Аллагьдан I тилейик гьар бир яхшылыкъланы, берген ниъматлагъа шюкюрлюк де этейик. Аллагь I бизге насип берсин шу сыйлы айланы, сыйлы гечелени арив кюйде, Есибиз рази болагъан кюйде оьтгермеге.
