Исраъ валь-Миъраж

Ражаб айны 27-ине чыгъагъан гече бизин Пайхаммарыбызны ﷺ муъжизаты: кёкге чыгъыву – Аль-Исраъ валь-Миъраж болду. Ражаб айны 27-нде ораза тутмагъа яхшы санала.

Шо гече Каабаны къырыйында юхлап турагъан Пайхаммарны ﷺ: «Тур, юхлайгъан адам!» – деген тавуш уятды. Гёзлерин ачгъанда Пайхаммар ﷺ алдында алтын ва жавгьар булан безендирилген акъ опуракълар гийген Жабрайыл ва Микайыл малайиклени гёре. Оланы къырыйында атгъа ошайгъан, тек къанатлары бар тамаша гьайван да бола. Шо Буракъ болгъан. Пайхаммар ﷺ Буракъны уьстюне минип, шо мюгьлетде темиркъазыкъ бойгъа чыгъып гете (аль-Исраъ). Олар токътай ва Жабрайыл малайик Мугьаммат Пайхаммаргъа ﷺ намаз къылмагъа бувара, ондан сонг ол огъар: «Бу ерлер –Мадина», – дей, гёчежек (гьижра этежек) ерлер экенин де билдире. Башгъа токътавну олар Тур (Синай) деген тавда эте, онда Муса пайхаммар булан Аллагь ﷻ сёйлей болгъан. Мунда да Пайхаммар ﷺ намаз къылып, Иса пайхаммар тувгъан Бейт Лахам (Вифлеем) шагьаргъа чыгъа. Мунда да Пайхаммарыбыз ﷺ Аллагьгъа ﷻ макътав эте. Сонг Иерусалим шагьаргъа чыгъа. Мунда Байт-уль-Мукъаддас деген межитде Аллагьны Элчиси ﷺ бары да пайхаммарлар булан ёлугъа: Ибрагьим, Муса, Иса ва оьзге пайхаммарлар булан имам болуп жамият намаз къыла.

Межитден чыкъгъанда, ол тамаша нюр булан шавла береген кёкден тюшюрюлген канзини гёре ва шогъар аягъын басгъандокъ шо мюгьлетде кёклеге чыгъып гете (аль-Миъраж). Мугьаммат Пайхаммар ﷺ башлап етти кёклеге гётериле, сонг яратылгъанлардан бирев де етмеген оьрлюкге чыгъа. Аль-Исраъ валь-Миъраж – Яратгъаныбыз янгыз бизин Мугьаммат Пайхаммаргъа ﷺ этген айрыча абурлукъ болгъан. Миъражда Пайхаммар ﷺ адамны гьакъылы етип болмасдай, кёп-кёп муъжизатлар гёрген. Огъар адамлар этген ишлерине гёрерни ачыкъ эте.

Пайхаммар ﷺ кёкдеги Каабаны, женнетни, жагьаннемни, Аршны, Курсну ва хыйлы оьзгелени гёре. Гьар кёкде ол оьзюне салам береген пайхаммарланы гёре, сонг пердевсюз Аллагь ﷻ булан сёйлеген. Бу тамаша гече Яратгъаныбыз бусурманлагъа гьар гюнлюк беш намазны да борч этген. Кёкден тюшгенде Пайхаммар ﷺ Буракъны уьстюне минип, шо мюгьлетде юхлап тургъан ерине къайта.

БУ БЕТНИ АДИЛ ИБРАГЬИМОВ ОНГАРГЪАН