Дагъыстанны муфтиси, шайых Агьмат-афандини Къурбан байрам булан къутлаву
«Ассаламу алейкум ва рагьматуллагьи ва баракатугьу, Есибизни рагьмусу ва парахатлыкъ болсун сизге, аявлу къардашлар ва къызардашлар!
Бары да бусурманлар учун лап уллу байрам – Ид аль Адха (Къурбан байрам) – геливю булан къутлайман барыгъызны да!
Бу ажайып байрам гьаж къылыв тамамлангъанны белгилей. Ибадат этивде къаст къылыву булан, бютюн бусурманлар Яратгъанына, дюньяланы Есине, гьарибизге береген ниъматлары саялы, гьакъ уллу разилигин билдирмеге имканлыкъ бере. Бу гюнлерде гьарибиз Есибизни разилигин ва Ону рагьмусун къазанмагъа къаст эте, къурбан гьисапда мал соя.
Есибиз Къуръанда булай айтгъан (маънасы): «Сиз бирт де берекет къазанмассыз (ва Яратгъаныбызны разилигин алмассыз), эгер Ону ёлунда (малыгъыздан) оьзюгюз сюегенни харжламасагъыз. Ва сиз нечакъы харжласагъыз да, Аллагь ﷻ шо гьакъда биле (ва толу кюйде сизге къайтарыш этер)» («Али Имран» деген сура, 92-нчи аят).
Ал заманларда йимик, бу йыл да, миллионлар булангъы бусурманлар Ислам динни агьамиятлы борчун – гьаж къылмакъ учун, сыйлы Маккагъа ва Мадинагъа бармагъа болгъан саялы, Есибизге битмес макътавлар этемен. Есибиз Аллагь ﷻ гьаж къылгъанланы бары да гьаж адатларын ва олар да, биз де сойгъан къурбанларыбызны къабул этсин. Амин.
Адатлангъан кюйде, байрам гюнлерде эркинлей рагьмулу ишлер кёп юрюле, амалсыз яшайгъанлагъа, гьажатлылагъа: тул къатынлагъа ва етимлеге, сакъатлагъа, пакъырлагъа рагьмулукъ кёмек этиле. Бары да этилеген яхшылыкъ учун, Есибиз рагьмулу шабагъатын берсин деп тилеймен ва жамиятгъа дагъыдан-дагъы кёп кёмек этип болмакъны, айланабыздагъы гьар кимге бирден-бир рагьмулу янашмакъны ёрайман.
Авруйгъан ва яралангъан бизин танышларыбызны, къардашларыбызны Есибиз сав этсин деп алгъыш этемен, умуми жамиятыбызны балагьлардан, къыйынлыкълардан сакъласын деп тилеймен. Есибиз Аллагь ﷻ бары да дуабызны, сойгъан къурбанларыбызны ва этген садагъаларыбызны къабул этсин, йиберген гюнагьларыбыздан гечсин, чомарт кюйде бизге савлукъ, берекет, парахат яшав, эки де дюньяда насип берсин деп ялбараман.
Аявлу дин къардашларым, бирдагъы керен барыгъызны да шу сыйлы ва сююнчлю Къурбан байрам булан къутлайман сизин! Ид Мубарак!»
