Мугьаммат Пайхаммар ﷺ тувгъан гюнге байлавлу къутлав
Мугьаммат Пайхаммар ﷺ тувгъан гюнге байлавлу къутлав
Аявлу дин къардашлар ва къызардашлар! Ер юзюндеги адам урлукъ учун лап агьамиятлы тархланы бириси – кёп сюеген Мугьаммат Пайхаммарыбыз ﷺ тувгъан гюню булан гьакъ юрекден къутлайман сизин.
Расулуллагь ﷺ дюньялагъа рагьмулукъ гьисапда йиберилген, ол – лап оьр къылыкъны еси. Пайхаммарыбыз ﷺ Есибизге таби болмагъа уьйретген, ярыкъгъа багъып элтеген ёлну гёрсетген.
Есибиз Аллагь ﷻ Къуръанда ону булай оьр эте (маънасы): «Ва Биз сени (гьей Мугьаммат ﷺ) дюньялагъа рагьму гьисапда тюгюл эсе йибермегенбиз» («Аль-Анбия» деген сура, 107-нчи аят).
Къуръанны башгъа аятында Яратгъаныбыз ону булай сёзлер булан суратлай (маънасы): «Гьакъ кюйде, сен (гьей Мугьаммат ﷺ) – оьр къылыкъны есисен» («Аль-Калам» деген сура, 4-нчю аят).
Есибиз Аллагь ﷻ юреклерибизни Мугьаммат Пайхаммаргъа ﷺ бакъгъан таза ва тетиксиз сюювден толтурсун, ону сюннетине гёре оьр даражада юрюмеге гюч берсин ва Къыямат гюн, Расулуллагьны ﷺ шапаатына лайыкълы болмакъ булан, бизге рагьмулукъ гёрсетсин, деп алгъыш этемен.
Къудратлы Яратгъаныбыздан тилеймен, бизге Элчисин ﷺ болгъан чакъы кёп сыйламагъа имканлыкъ бермекни, ону яшав ёлун ахтармакъны ва уьлгюсюнден дарс алып яшамакъны.
Ватаныбызны бары да халкъына аман яшавлукъ ва парахатлыкъ бермекни, гьар тюрлю балагьлардан, питнелерден сакъламакъны Есибизге ялбараман. Амин!
