Къурбан садагъаланы Аллагь ﷻ къабул этсин!
Дагъыстан Муфтиси Шайых Агьмат-афанди етишип гелеген Къурбан-байрам булан уьлкебизни ватандашларын къутлай
«Ассаламу алейкум ва рагьматуллагьи ва баракатугьу!
Аявлу къардашлар ва къызардашлар, Есибизни рагьмулугъу ва парахатлыкъ болсун сизге!
Гьакъ юрекден сизин барыгъызны да етишип геле турагъан бусурманланы лап уллу байрамы – Къурбан-байрам булан къутлайман! Къурбан садагъа булан байлавлу бу байрам сыйлы ерлерде болувну ва гьаж къылывну да тамамлай.
Пандемия аврув себеп болуп артдагъы бир-нече йылны узагъында бу уллу ниъматдан къуру къалгъан эдик, энни гьаж янгыдан къылынмагъа болагъан саялы Яратгъаныбызгъа битмес шюкюрлюк этебиз. Шолай балагьлардан бизин гележекде аман сакъласын деп Есибизден тилеймен.
Аллагь ﷻ Оьз рагьмусу булан хыйлы адамгъа гьаж къылмагъа имканлыкъ бергени саялы юрекни сююндюре. Гьаж къылгъанлар этген ибадатын ва бизин къурбан садагъаларыбызны Яратгъаныбыз къабул этсин деп дуа этемен. Амин.
Байрамны гюнлеринде ватаныбызда ва сав дюньяда сакъатлагъа, етимлеге, янгыз яшайгъанлагъа, пакъырлагъа ва гьажатлылагъа рагьмулукъ ишлер, кёмек этилегени, озокъда, сююндюрмей болмай. Этген-этген гьатта гиччи яхшылыгъы учун да гьар кимге Есибиз Аллагь ﷻ шабагъатын берсин, тюз ёлгъа бакъдырсын ва гьажатлылагъа энниден сонг да кёмек этмеге болагъанлардан бизин этсин деп айтмагъа сюемен.
Гьакъ юрекден чалынагъан тилеклерибизни Есибиз эшитсин ва къабул этсин деп тилеймен. Яратгъаныбыз негетлерибизни тазаласын ва чомартлыгъына гёре савлукъ, насип, берекет ва парахат яшав берсин деп Аллагьу тааладан тилеймен.
Къурбан-байрам къутлу болсун!»
