Хош гелдинг, сыйлы Ражаб ай
Гьюрметли дин къардашларым ва къызардашларым! Аллагьгъа ﷻ гьар бир макътавлар болсун бизин Ислам динге тюзлеген саялы. Аллагьгъа ﷻ дагъы да макътавлар болсун бизге сыйлы айлар берген саялы. Шо сыйлы айланы бириси ражаб ай, ондан сонг шагьбан ай, ондан сонг буса сыйлы болгъан, берекетли болгъан, динибизни рукнуларындан бириси – рамазан ай геле, оьзюню ичинде ораза борч болгъан. Аллагь ﷻ барыбызгъа да насип берсин шо сыйлы рамазан айгъа етишип, оразасын да тутуп, Аллагьны ﷻ рагьмусун да, разилигин де алмагъа.
Къардашларым! Ражаб айны гьакъында Пайхаммарыбызны ﷺ булай гьадиси бар: «Гертиден де ражаб ай Аллагьны ﷻ айы, шагьбан ай мени айым, амма рамазан ай буса мени уьмметимни айы». Аллагь ﷻ шулай сыйлагъан ражаб айны, Оьзюню айы деп айтып ва бизге де буюргъан шо айны сыйлагъыз деп. Ражаб айны ичинде этген ибадатны да, гьар бир яхшы амалланы да даражасы етмиш керен артыкъ боладыр. Пайхаммарыбызны ﷺ гьадисинде булай бар: «Сиз оьлеген заманда рагьат кюйде оьлмеге сюе бусагъыз, сувсаплыкъдан да сакъланма сюе бусагъыз, иман булан гетме сюе бусагъыз ва шайтандан сакъланма сюе бусагъыз, шу айланы барын да сыйлагъыз, кёп ораза тутмакълыкь булан, гетген гюнагьлагъа гьёкюнмек булан (товбалар этип), ва инсанланы яратгъан Есигиз Аллагьны ﷻ да эсгеригиз, шолай этсегиз, Есигизни женнетине гирерсиз саламатлыкъ булан» (Зугьрату Рияз).
Гёремисиз, къардашларым, бу гьадисде Пайхаммарыбыз ﷺ кёп затны къуршап айтды, шоланы этмеге къаст этейиклер. Иман булан гетмек, шайтанны макрюсюнден къутулмакъ уллу затлардан. Аллагь ﷻ насип этсин бизге барыбызгъа да иман булан гетмеге. Маликни уланы Анас t деген асгьаба булай айтгъан болгъан: «Мен бир керен Жабалны уланы Муазгъа ёлукъдум. Ва бугъар: «Къайдан гелесен?» – деп сорагъанда, бу: «Пайхаммарны ﷺ янындан гелемен», – деп айтды. Сонг мен бугъар: «Пайхаммардан ﷺ сен бир зат сама эшитмедингми?» – деп сорадым. Бу: «Эшитдим», – деп айтды ва эшитгенин ачыкъ этди: «Ким таза юрек булан «ЛЯ ИЛЯГЬА ИЛЛЯЛЛАГЬ», – деп айтса, женнетге гирер ва ким ражаб айны ичинде таза негет булан Аллагьны ﷻ разилигин алайым деп, бир гюн ораза тутса, шо да женнетге гирер». Сонг муну булан сёйлеп битген сонг, Анас t Пайхаммарны ﷺ янына баргъанда: «Муаз сен шулай айтгъан деп айтды», – дей. Пайхаммарыбыз ﷺ огъар: «Муаз сагъа герти айтды», – деп жаваплана (Зугьрату Рияз).
Гёремисиз, къардашларым, нечик сыйлыдыр Аллагь ﷻ янында «ЛЯ ИЛЯГЬА ИЛЛЯЛЛАГЬ» деген сёзлер ва нечик сыйлыдыр Аллагь ﷻ янында ражаб айны оразасы. Бираз къаст этсек, биз де болабыз шолай сыйлылыкълагъа етишмеге. Ишлейген заманынгда зикир этип, Аллагьны ﷻ эсгермеге ярай, ёлда гетип барагъанда да ярай, гьатта янтайып турагъанда да Аллагьны ﷻ эсгермеге ярай. Тилибизни зикир этмеге уьйретсек, ондан яхшы не бар?! Пайхаммарыбыз ﷺ : «Лап да сыйлы калималар, лап да сыйлы сёзлер, мен де, менден алдынгъы пайхаммарлар да айтгъан – «ЛЯ ИЛЯГЬА ИЛЛЯЛЛАГЬ» сёзлер», – деген. Шо саялы, шу калималаны биз де кёп айтмагъа къаст этейиклер. Пайхаммарыбыз ﷺ булай айта: «Гертиден де, женнетде бир оьзен бар, оьзюню аты да ражаб, оьзю сютден акъ, балдан татли, ким бир гюн ражаб айны ичинде ораза тутса, Аллагь ﷻ шогъар шо оьзенден ичирер» (Байгьакъи). Савбан деген асгьаба t булай айта: «Бир керен Пайхаммарыбыз ﷺ булан бир къабурланы янындан гетип барагъанда, Пайхаммарыбыз ﷺ токътап, бек йылады, сонг олагъа дуа да этди. Сонг мен: «Сен неге булай бек йыладынг?» – деп сорадым. Пайхаммарыбыз ﷺ : «Гьей Савбан, булар къабур азапгъа тутулгъанлар, къабурларында къыйналып туралар, мени булагъа языгъым чыгъып йыладым, сонг дуа да этдим, Аллагь ﷻ булагъа енгиллик берсин, къабур азапны гётерсин деп. Аллагь ﷻ дуама жавап да берди», – деп англатды.
Сонг Пайхаммар ﷺ дагъы да булай къошду: «Гьей Савбан, эгер де шулар ражаб айда бир гюн сама ораза тутгъан болгъан буса ва бир гечени юхламай ибадат булан оьтгерген буса, къабур азапдан булар къутулур эди». О заман Савбан булай айтгъан: «Гьей Аллагьны Элчиси ﷺ , бир гюн ораза тутмакъ булан, бир гече ибадат этмек булан къабур азапдан къутулуп боламы?» Пайхаммарыбыз ﷺ : «Гьей Савбан, мени пайхаммар этип йиберген Аллагь ﷻ булан ант этемен, къайсы эргиши яда къатынгиши, ражаб айда бир гюн ораза тутуп, бир гече ибадат этсе, Аллагьны ﷻ разилигин аламан деп, Аллагьу таала шогъар бир йылны ибадатыны зувабын язар, гюнлени ораза тутуп ва гечелени ибадат булан оьтгерген йимик», – деп жавап берген (Зубдатуль ваизин).
Воллагьи, къардашларым, бирибиз де сюймейбиз шо къабур азапны гёрмеге, барыбыз да шондан къутулмагъа сюебиз. Шолай болгъан сонг къаст этейиклер, шу ражаб айны ичинде яхшы амалланы кёп этмеге. Савлай гече ибадат этип болмасакъ да, бир гесегин сама гечени ибадат булан оьтгерейиклер, тагьажжут намазлар къылайыкълар, зикир этип Аллагьны ﷻ эсгерейиклер, дуалар этейиклер.
Дуньягъа бакъгъан якъда биз гюн сайын алгъа бармагъа къарайбыз, амма дин якъдан да бизге осал болма ярамай. Ахыратда гьёкюнгенден бизге бир пайда да болмас. Онда гьёкюнмейген кюйде, бугюн къаст этейиклер. Къолубузда савлукъ да, мал да, башгъа тюрлю онгайлыкълар да барда, шоланы къоллайыкълар. Аллагьу таала бизге берген ниъматлагъа, гьар бир яхшылыкълагъа шюкюрлюк этейиклер, шо ниъматланы пуч харжламайыкъ, сонг Аллагьны ﷻ алдында жавап бермеге къыйын болажакъ чы. Садагъаланы кёп этейиклер, бизин арабызда осал турагъанлар бар, кюю ёкълар бар, пакъырлар бар, шолагъа биз кёмек этме герекбиз. Олагъа кёмек этсек, Аллагь ﷻ бизге де кёмек этер.
Биз гёребиз, биревлер адам оьлмей туруп садагъа этмейлер, адам оьлген сонг башлана бары да садагъалары. Садагъаны сав заманында, савлугъу да бар заманда этсе, ону зувабы да, даражасы да, берекети де дагъы да бек артыкъ боладыр. О саялы кююбюз болгъан сайын садагъалар этейик. Аллагьу таала барыбызгъа да кёмек этсин шу сыйлы ражаб айны гьюрметин сакълама, Аллагь ﷻ рази болагъан амалланы кёп этмеге. Олай да сыйлы болгъан рамазан айгъа да Аллагь ﷻ бизин етишдирип, оразалар тутуп, таравигь намазлагъа барып, гюнагьлардан чайылып, Есибизни рагьмусун да, разилигин де алмагъа Яратгъаныбыз бизге насип берсин. Амин.
