Пайхаммарны ﷺ варислиги

Ватаныбыз Дагъыстанда бары да ерде межитлер бар, гьар юртда ва шагьарда динни билеген, охугъан адам да бар. Шолайлыкъ булан, бизин якъларда динни билмек, имангъа тюшюнмек учун тийишли шартлар ва имканлыкълар бар, Аллагьгъа ﷻ макътав болсун.

Амма бютюн халкъ динге сингип къалгъан, дин якъдан яшав тюзелген деп айтмагъа эрте. Бары да имканлыкълар бар тура, неге шолай бола экен ва не зат пуршав эте? Аслу себеп – адамлар ахыратдан эсе, дюньягъа артыкъ берилгенликдир деп эсиме геле. Булай гьал гьали башланмагъан, гьатта дин яйылмагъа башлагъан девюрлерде де аз-кёп буса да болгъан.

Пайхаммар ﷺ герти дюньягъа гетген сонг, асгьабалар шо гьалны гёрюп ичибуша болгъан. Белгили асгьаба Абу Гьурайра да булайлыкъны эс этген болгъан. Бир-бир адамлар динни артгъа къоюп, дюнья ишлени алгъа салагъаны ону юрегин пашман эте. Илму охувну, пайдалы мажлислер оьтгеривню орнунда шолайлар къазанчны гьайында болгъан. Бир гезик базарны къырыйындан оьтюп барагъанда Абу Гьурайра : «Гьей, базардагъылар! Пеленче ерде Пайхаммарны ﷺ варислигин оьлеше, сиз буса мунда олтурасыз. Неге сиз де барып, шо варисликни алмайсыз?» – деген. Тамаша болгъан сатывчулар: «Не ерде шо варислик бериле?» – деп сорай. Абу Гьурайра : «Варислик ювукъ арадагъы межитде оьлешине», – деп англата. Базардагъылар шоссагьат айтылгъан ерге гете ва узакъ къалмай бош къайта. Олар къачан гелер деп къарап турагъан Абу Гьурайра : «Сен айтгъан ерге барып, бир варислик де оьлешинегенни гёрмей гери къайтдыкъ», – деген оьпкелевлени эшите.

Асгьаба олагъа: «Сиз межитде кимни буса да гёрдюгюзмю?» – деп сорай. Олар: «Биз межитде намаз къылагъанланы, Къуръан охуйгъанланы ва илму ахтарагъанланы гёрдюк», – дей. Абу Гьурайра олагъа: «Сиз гёргенлер Пайхаммарны ﷺ варислигин алагъанлар эди», – деп англата. Аявлу къардашлар, бизин арада Пайхаммарны ﷺ варислигин алмагъа сюегенлер кёпмю? Къол узатагъан ювукълукъда чы шо ажайып имканлыкъ! Есибиз Аллагь ﷻ гьар бусурмангъа Пайхаммарны ﷺ варислигин алагъанлардан болмагъа насип этсин. Амин!

МАГЬАММАТГЬАБИБ САЙИДОВ