Кёп сюеген Пайхаммарыбызны ﷺ гьакъында бек билейик
Кёп сюеген Пайхаммарыбызны ﷺ гьакъында бек билейик
Расулуллагьны ﷺ савуту
(Давамы. Башы алдагъы номерлерде)
Мугьаммат ибну Сиринден булай етишген: «Мен оьзюме Сумрат бин Жундубнуки йимик къылыч этдирмеге сюйдюм. Ол буса, оьзюню къылычы Расулуллагьныкине ﷺ ошатып этилген деди» (ат-Тирмизи).
Пайхаммарны ﷺ къылычына Ханфиялы деп айтыла болгъан, неге десе ону Бану Ханифа къавумну усталары этген (Мусайламат аль-Каззаб дейген ялгъан пайхаммарны къавуму). Бу къавумну усталары айтылгъан ва лап тизив къылычлар этегени булан белгили болгъан.
Анас бин Маликден етишген бу гьадисни имам ат-Тирмизи гелтире: «Пайхаммарны ﷺ къылычыны гардасы (къылычны итти ерине къолну сыргъалама къоймайгъан къылыч сапны гесеги) гюмюшден этилген эди».
Жаъфар ас-Садикден (Алини уланы Гьусейинни дёртюнчю наслусу) булай етишген: «Пайхаммарны ﷺ къыныны (ножны) тюп ва оьр янлары ва къылычыны гардасы гюмюшден этилген эди» (Ибну Саъд). Пайхаммарны ﷺ бир-нече къылычы болгъан. Къылычланы бирисине «Аль-Маъсур» («эсделикли», «гёрмекли» демек) деген ат тагъылгъан болгъан. Бу ону атасындан къалгъан биринчи къылычы болгъан. Олай да, Пайхаммарны ﷺ «Аль-Казиб» («уруп гесеген») деген аты булангъы къылычы да болгъан.
Пайхаммарны ﷺ башгъа къылычлары да болгъан. Масала, «Аль-Кульийу» дегени болгъан. Бу къылычны аты дангыллыкъдагъы (пустыня) бир юртгъа гёре берилген, шонда яшайгъанлар савгъат этген саялы. Пайхаммарны ﷺ «Аль-Баттар» («гесип тайдырагъан»), «Аль-Хатфа» (шону маънасы гёрсетилмеген), «Аль-Михзам» («гесеген»), «Ар-Расуб» (айтывгъа гёре, бу къылыч Балкис бийке Сулайман пайхаммаргъа савгъат этген етти къылычланы бириси болгъан) деген къылычлары да болгъан. Абу аль-Гьасан аль-Мадаинийу етишдирген кюйде, артдагъы эки къылычны («Аль-Михзам» ва «Ар-Расуб») Пайхаммаргъа ﷺ Мадинагъа адамлары булан гелгенде Зайд аль-Хайли савгъат этген.
Шолардан къайры Пайхаммарны ﷺ дагъы да къылычлары болгъан. «Ас-Самсамат» деген къылычны Пайхаммар ﷺ Халит бин Сайит бин аль-Асгъа савгъат этген болгъан. Пайхаммарны ﷺ «Аль-Лахиф» деген къылычы да болгъан, сонг шогъар – «Зу ль-Фикар» деп ат тагъыла, неге тюгюл къылычны ортасы адамны сыртындагъы сюеклер йимик айрыла болгъан. Сонг да, «Аль-Хуфру» деген къылыч да болгъан, бу – Пайхаммарны ﷺ лап айтылгъан къылычы болгъан. Ухуддагъы къазаватны вакътисинде бу къылычны Пайхаммар ﷺ тюшюнде гёрген болгъан. Бу къылыч да Балкис бийке Сулайман пайхаммаргъа савгъат этген етти къылычны бириси болгъан деп санала.
Пайхаммарны ﷺ къылычлары булан байлавлу ону элчилигин исбатлайгъан Яратгъаныбызны кёп муъжизатлары болгъан. Шолай, Бадр къазаватда Укашат бин Михсин дейген асгьабаны къылычы сына. Пайхаммар ﷺ буса огъар бир агъач гесек тутдуруп: «Шуну булан ябуш!» – дей. Шо мюгьлетде Укашатны къолунда агъач гесек йыртыллайгъан алай арив узун къылычгъа айлана. Ол бу савут булан бусурманлар утгъанча ябушуп тургъан. Бу къылыч булан Укашат Ухуддагъы, аль-Хандакдагъы ва оьзге къазаватларда да ябушгъан. Гьатта Пайхаммар ﷺ бу дюньядан гёчгенде де, Укашат шо къылыч булан Абу Бакрны сыдраларында динге арт бергенлеге къаршы ябушгъан. Шолай ябуша туруп, ол бир урушда шагьит даражагъа етип, жанын къурбан этген.
(Давамы гелеген номерде)
