Негер де гьазир тур
Негер де гьазир тур
Студент имтагьанын оьр къыйматлагъа берип болмас, алданокъ гьазирленмесе. Спортсмен уьстюнлюклеге етмес, эгер гьайт этип гьар гюн яхшы кюйде гьазирлик гёрмесе. Агьлю яшавда да яхшылыкъ болмас, лап шо кюйде онгарылмаса.
Чечекленеген ожакъ къуруп, татывлу яшамакъ учун, бир алдын психология гьазирлик болмакълыкъ бек агьамиятлы. Шондан къалгъан яшав да гьасил бола.
Эрге чыкъгъанча билмеге герекли кёп зат бар. Шолардан бирлери кюлкюлю болуп гёрюнме бола, башгъалары – пашман, оьзгелери бек ялкъывлу ва агьамиятсыз деп эсге гелегенлери де бардыр.
Той – кино тюгюл, той – герти яшавгъа этилеген биринчи абат ва уьйленген сонг яшав алда йимик дагъы болмас. Энниден сонг нени буса да сайлайгъанда янгыз оьзюгюзню гьакъында ойлашмайсыз, сиз гьали экев барсыз, уьйренчикли мердешлени де алышдырма тюшсе ярай.
Эгер уьйленмеге гьазирлене бусагъыз, башгъа адамны яшавуна къыйышма къарамакълыкъ лап заманыдыр.
Гьар уланъяшны яда къызъяшны агьлю нечик болмагъа герегини гьакъында оьз къаравлары бола. Гележек яшав нечик татывлу боларгъа гьар кимни оьз умутлары бар. Амма яшав – кино тюгюл, биз сюйген кюйде болмай да къала.
Шатлыкъ нечик оьтгерилмеге герек дегени гьакъыкъатгъа къыйышмай къалса, биринчи гёнгю чыгъыв тойну гюнюнде де болмагъа бола. Той нече де шат, арив, къужурлу болма герек деп биревлени эсине гелме ярай, яшавда буса, бираз башгъача болуп чыкъса, кепи бузула, гёнгю тая.
Яхшы умутлар болса яман деп айтмайбыз, тек жагьиллер умутларына алданып къалма да ярамай, яшав башгъача да болма болагъанны гёз алдан тюшюрмесе яхшы. Умутлар нечакъы ярыкъ болгъан сайын, шолар яшавгъа чыкъмай къалса, гьёкюнч де авур тиер.
Уланлар неден башласа яхшы?
Агьлю яшавгъа улан да, къыз да бир йимик гьазирленмей. Уланлардан башлайыкъ. Уьйленеген улан къаркъара якъдан чыныкъгъандан къайры, ругь якъдан да гьазир болма герек. Гележек яшавунда ол янгыз оьзю саялы тюгюл, агьлюсюне де жаваплы.
Аслу гьалда, ата-ана учун авлетлери оьз яшавундан да аявлу. Шо саялы гиев унутма герекмейген зат – оьзюне къатын этип береген къыз ата-анасы учун лап аявлу жан, огъар инг къыйматлысын аманат этип бере.
Олар аявлу баласын ол улангъа эрге бере, оьзлени авлети йимик къабул эте ону, яшыны яшавун насипли этерге умут булан, къызыны хатирин къалдырмасны гёзлей.
Ким-ким де инамлыкъгъа амин болуп болмай, тетиксиз эр болмагъа бек къыйын иш.
Шо къыз сени болажакъ къатынынг – къулунг яда малынг тюгюл. Сагъа эрге чыгъагъанда ол ихтиярларын тас этмей, ону елемеге тарыкъ тюгюл.
Энниден сонг сен огъар жаваплысан, энниден сонг сен янгыз тюгюлсен, сиз гьали къошулгъансыз, бир болгъансыз. Оьз-оьзюнгден къайры, къатынгны да гьайын этмеге герексен, огъар не тарыкъны билип, ортакъ уьюгюзню насиби учун чалышасан.
Ожакъда гелишлик, гьюрмет ва сююв боларгъа кюйленме тарыкъ.
Уллулар агьлюню къыйматлыгъын яшлагъа етишдирип болса бек яхшы болур. Этилген иш айтылгъан сёзден эсе къыйматлы. Оьсюп гелеген яшлар уллулар этеген кюйге къарап, оьсгенде олагъа ошай. Ата-ананы аралыкълары сонг яшланы яшавунда такрарлана.
Агьлю къурулгъан сонг, янгы къардашлар да къошула ва олар булан да арив аралыкъ тутмагъа тарыгъы англышыла.
Къатынны ата-анасы ва оьзге къайынлар булангъы аралыкъ айрыча ерни тута. Олар къызына ва оьзлеге гиевю нечик янашагъангъа тергевлю кюйде къаражакъ. Эгер гиев не йимик осаллыкъ этсе, шо эс этилмей къалмас.
Къатын алгъанча да хыйлы алда улан оьзюню юрюшюн камиллешдирмеге герек. Аллагьдан ﷻ къоркъагъан, намуслу эргишилерде болмагъа герекли хаситлагъа уьйренмеге тарыкъ.
Агьлю къурагъан улан таза юрек, таза негет, иман ва тавакал булан насипли агьлю къурувгъа гьазирленмеге герек. Шо ожакъда гелишлик, бир-бирин англайгъанлыкъ болма тарыкъ. Эр-къатын шу дюньяда яшагъан чакъы заман Есибиз гёрсетген ёл булан бирче юрюме тийишли.
(Продолжение следует.)
