Гюнагьлардан нечик чайылма бола?
Гьар гюнлюк яшавубузда биз тюрлю-тюрлю жыйынларда ортакъчылыкъ этебиз. Гюнден-гюн ишибизде сёйлешивлер юрюле, иш ёлдашларыбыз булан о-бу темагъа къатнав бола, къурдашларыбыз булан ёлугъуп, артда болгъан хабарланы гьакъында сёйлейбиз.
Шолай жыйынларда бош хабардан сакъланмагъа къыйын. Адамланы башын сёйлев, айтды-къуйтду юрютюв, къулакъгъа гирмейген лакъырлар, башгъаланы мысгъыллав, гёнгюн бузув бу ва герти дюньяда да бир пайда да гелтирмей. Ислам дин авзубузну жыймагъа уьйрете, заманыбызны аямагъа гёрсете. Неге тюгюл гьар айтгъан сёзюбюзню малайиклер язып жыя ва Сорав алынагъан гюн авуздан чыкъгъан гьар калима саялы жавап бермеге тюшежек.
Амма Аллагьны ﷻ рагьмусуну дазусу ёкъ. Абу Хурайра етишдирген инамлы гьадисде сакъалангъан кюйде, Расулуллагь ﷺ булай айтгъан болгъан: «Бош хабарлар кёп юрюлген мажлисде ортакъчылыкъ этген гиши, шо ерден туруп гетгенче: “Субханака ва би-хамдика, ашгьаду алля илягьа илля Анта, астагъфирука ва атубу иляйка”, – деп айтса (маънасы: «Гьей Аллагь ﷻ, гьар макътав Сагъа болсун! Сенден къайры дагъы худай ёкъгъа шагьатлыкъ этемен. Гечмекни Сенден тилеймен ва Сени алдынгда товба этемен), шо жыйында болгъан ишлер саялы, ол адамдан гечилежек» (ат-Тирмизи).
Бу къысгъа ва терен гьакъыллы дуа гьар жыйындан сонг ругь «тазалыкъ» береген алгъыш, айрокъда шо мажлисде бош хабарлар яда гюнагьгъа гелтиреген хабарлар юрюлген буса. Бу тилек Аллагьны ﷻ уллулугъун эсге сала, иманыбызны гертилей ва гьакъ юрекден товба этгенибизни белгиси.
Бу дуа жыйында йиберилген гиччи гюнагьлардан чаягъанны билмек агьамиятлы. Баш сёйлев, айтды-къуйтду юрютюв, гъибат, бугьтан, ялгъан йимик яда адамны ихтиярларын бузув булан байлавлу уллу гюнагьланы гьакъында айта буса, олардан чайылмакъ учун, шо гюнагьлар кимге багъышлангъан буса, олардан гечмекни тилемеге ва гьакъ юрекден товба этмеге тарыкъ.
Шо саялы сизин де, бизин де айтагъан сёзюбюз пайдалы, жыйынларыбыз буса – берекетли болмакъны гьайын этмеге тарыкъбыз. Амма шолай сакъланмагъа бажарылмаса, арагъа айтылмагъа тюшмейген сёзлер чыкъса, Аллагьны ﷻ рагьмусу бизге ювукъда экенни билмеге тарыкъ ва этген гюнагь ишге теренден гьёкюнюп, гьакъ юрекден товбагъа тюшмеге тарыкъ.
Есибиз Аллагь ﷻ бош лакъырлардан сакъласын ва ишибизде де, сёзюбюзде де берекетлик берсин деп тилейбиз.
