Сыдрагъа сыкълашып тизилгенде
Сыдрагъа сыкълашып тизилгенде
Межитге барып, халкъ булан жамият намаз къылсакъ, ругь якъдан оьсеген ёлгъа тюшежекбиз. Шолай этсек, оьзге дин къардашларыбыз булан бирче иман даражабызны артдыражакъбыз, яхшы къылыкъгъа уьйренежекбиз. Аллагьны ﷻ Уьюнде кёп ёлугъа турсакъ, бир-бирибизге таъсир этербиз, ругьубузну гётерербиз. Натижада, межитге къурдаш болгъан гиши, къатты иманлы болажакъгъа умут арта.
Гертиден де, межитге барып, жамият намазгъа къошуламакъны уллу маънасы бар. Бир сыдрагъа сыкълашып тизилмек, Есибизге жамият булан баш иймек, сужда этмек – дин къардашланы бир-бирине ювукъ эте, арада татувлукъ болдура. Ондан къайры, ибадат ёрукълу бола.
Шариат китапларда ва гьадислерде айтылагъан кюйде, Ислам дин учун жамият намаз айрыча агьамиятлы иш. Бусурманлар бир ерге жыйылып, бирче намаз къыла буса, шо саялы Яратгъаныбыздан гелеген зувап хыйлы арта. Мугьаммат Пайхаммар ﷺ: «Экев яда экевден къолай адам намаз къылмакъ учун жыйылса, шоланы намазы къабул этиле», -- деп айтгъан.
Бусурманлар межитге гелип, бирче намаз къылагъанда оланы ругь аралыгъы беклеше, ругь бирлиги арта. Бирче жыйылмакъ, бир болуп Есибиз Аллагьгъа ﷻ къуллукъ этмек – Яратгъаныбызгъа ювукъ болгъаныбызны сезмеге болушлукъ эте, дин къардшаларыбызгъа ва дин къызардашларыбызгъа бакъгъан гьислер исси бола.
Жамият намаз гьар бусурмангъа яхшы якъдан таъсир этегенде йимик, шо кюйде сав жамиятгъа да пайдалы. Иманы барлар бирче жыйылып, Есибизден кёмек ва берекет тилеп, дуа этегенде инсан аралыкълар асил бола, арадан питне тая, масъалалар чечиле, жамият гьалы къолайлаша. Ондан къайры, жамият намаз бусурман уьмметни бирикдире, бир къаркъара экенин эсине сала. Адамлар бир ерге жыйылып, бирче намаз къылагъанда олар оьзлени бир уллу жамият гьисапда гёре, оланы бир-бирине бакъгъан, Есибиз учун деп айтылагъан сюювю гючлене.
Жамият намазны бирдагъы пайдалы яны – гьар ким межитге юрюй туруп, жамиятгъа къошула туруп, намаз къылагъан кююн оьр даражалы эте, тетиклеринден арчыла. Шолайлыкъ булан, уьйренеген яда толу билими ёкъ адам, башгъалагъа къарап уьйрене, билмейгенин сорама бола. Межитге кёп юрюйген, бусурман жамият булан кёп болагъан адам ругь якъдан оьсежегине, кемчиликлеринден азат болажагъына уллу умут бар.
Ислам дин бусурманлагъа гюндеги бары да беш борч намазын жамият булан къылмакъны ёрай. Шолайлыкъда Есибизни къулларына бакъгъан айрыча рагьмулугъу бар, неге десе жамият намаз иманы бар гиши учун, янгыз къылгъан намазындан эсе, алагъан шабагъатын хыйлы артдыра.
Кёплер эшитип биледир, динибиз жамият намазгъа нечик янашагъанны, даражасын оьр гёрегенни, 27 керенге зувабы артагъанны (макъалабыз да шогъар багъышлангъан). Шо саялы барыбызгъа да Аллагьны ﷻ алдында шулай агьамиятлы ишни къутгъармайыкъ, деп чакъырыв этебиз. Энниден сонг жамиятгъа къошулуп, сыдраланы окъ йимик тюппе-тюз де этип, имбашларыбызны бир-бирибизге тийдирип, сыкълашып жамият намаз къылайыкълар!
Нурмагьаммат Агьматов
