Юрегине гёре савгъат
«Ас-Салам» газетни охувчусуна умра къылма ёл ачылды
Савгъат дегенде, бусурман юрек учун гьаж яда умра къылмагъа имканлыкъ ачылса – уллу сююнч экенге шеклик ёкъ. Таргъуда яшайгъан Абдулгьамит Камаевге бугюнлерде шолай насип иржайды, ол ювукъ арада сыйлы ерлеге барып, умра къылмагъа болажакъ. Ёкъ ерден дегенлей огъар шолай ёл ачылды.
Булай нечик болгъанны англатайыкъ. Таргъуда ва Янгы Таргъуда яшайгъанланы арасында умра къылмакъ учун чёп салынажакъ (жеребьёвка) деп гетген йыл билдирилген эди. Шо чёп салывда ортакъчылыкъ этмек учун къумукъ тилде чыгъагъан «Ас-Саламгъа» язылма тарыкъ болгъан. Газетни яймагъа деп чалышагъан уланлар къумукъланы бырын юртунда, халкъыбызны асрулардан гелеген тахшагьарында ерли жамиятны сююндюрмеге, гёнгюн алмагъа арив кюй тапды.
Бу бойда газет яягъанлар, башында Идрис Аликъазиев булан, бир адамны умрагъа йибермек учун имканлыкъ тапмагъа урунду. Гёз алгъа тутулгъан кюйде, этилме де этилди. Шо гьакъда айта турмаса да, чомарт «спонсорланы» атларын эсгермесе де (саламатлы адамлар оьзлени рагьмулу ишин онча да уллу гёрмей ва кёмекни ким этгенни яшырмакъны тилей), айтгъан сёзюн яшавгъа чыгъартма бажара: герекли акъча жыйыла. Сонг умрагъа ким баражагъын билмек учун, чёп салына.
Газетге язылгъан 235 агьлю бу йыл сыйлы ерлеге ким барар деп бир йылны узагъында къарап турду. Умраны насиби Гьамит-агъайгъа тюшдю. Ол ана тилинде чыгъагъан «Ас-Салам» газетни алдан берли кёп сююп охуй. Умра учун тюгюл эди язылгъаны да. Янгыз сыйлы ерлеге бармагъа деген негет булан газетге язылгъан адам «путёвканы» утгъан эди буса, тамаша болар эди. Аллагь ﷻ чакъырмаса, Макка булан Мадинагъа ёл ачылмай. Идрис айтагъан кюйде, Таргъуда «Ас-Салам» газетни охуй, сюе, пайдасын гёре. Таргъуда яшайгъанланы умра булан най-най этип яздыртма тарыкъ тюгюл. Оьзлеге яхшы янашагъангъа къайтарыш этип, газет яягъанлар умра булан мундагъыланы сююндюрме сюе ва мурадына етишмеге бажара.
Электрик болуп ишлейген Гьамит-агъай юртунда да, оьзге ерлерде де танышларына, таныш тюгюллерине де хыйлы кёмек этген адам. Гьалал кюйде чалыша туруп, сабур хасиятлы, къолу билеген бу касбучу бек юваш, намуслу, таза къылыкълы инсан. Шону булан бирче бек саламат адам да дюр. Биз огъар оьзюню гьакъында газетге язмагъа, утгъанын билдирме сюегенибизни айтгъанда, ол шогъар сююнмеди, шо гьакъда сёз къошмады. «Башгъа не айтайым сизге? Болду шулай иш, кёп сюеген газет охуйгъаным саялы, умра къылма ёл ачылды. Аллагьгъа ﷻ минг макътавлар болсун», – деп дагъыны айтмады.
Гертиден де, ол «Ас-Салам» газет булан тюнегюн тюгюл таныш болгъаны, алдан берли охуй. Уланы айтагъан кюйде, Гьамит-агъай бу газетге гьюрмет этегенни адам билсе, газетни бир бетин къутгъармай охуйгъанын англаса, умра огъар тюшгенине бирев де тамаша болмас эди. Абдулгьамит Камаев «Ас-Салам» газетни герти къурдашы, ондан пайда алагъан гьакъ охувчусу.
Редакцияны атындан биз Гьамит-агъайны умра къылма ачылгъан имканлыгъы булан къутлайбыз, Аллагь ﷻ ёлун онгарсын, умрасын, оьзге ибадатларын ва этген бары да яхшы ишлерин къабул этсин деп тилейбиз. Олай да, газетни яягъан уланлагъа уьстюнлюклер ёрайбыз, дин яйывда басагъан гьар абатын Есибиз Аллагь ﷻ зувапгъа язсын, ахыратында пайдалы болуп табылсын. Амин.
