Бир сыдрагъа тизилип сыкълашайыкъ
Бир сыдрагъа тизилип сыкълашайыкъ
Жамият намазгъа къошулуп, халкъ булан бирче намаз къылмакъ – ругь оьсювге болушлукъ эте. Башгъа бусурманлар булан бирче иман якъдан оьсебиз ва иманыбыз къатты бола. Бир-бирибизге билегенибизни уьйретебиз, сынав гьакъда хабарлайбыз, илгьам алабыз. Шолайлыкъ имангъа тюшюнмеге ва этеген ишибизни англап этмеге кёмек эте.
Жамият намазгъа къошулмакъ – уллу маъналы иш! Шолайлыкъ дин къардашланы ювукъ этип, бирикдире ва ибадатны камиллешидре.
Шариат китапларда ва гьадислерде айтылагъан кюйде, жамият булан къылынгъан намаз динибизде айрыча ер тута. Биз бирче жыйылып, жамият намаз къылагъанда Есибизден болагъан шабагъат хыйлы арта. Мугьаммат Пайхаммар ﷺ шо гьакъда булай айтгъан: «Бирче намаз къылмакъ учун, экев яда экевден кёп бир ерге жыйыла буса, оланы намазы къабул этилежек».
Бусурманлар межитге жыйылагъанда ва бирче намаз къылагъанда, оланы ругь бирлиги ва гючю арта. Шолайлыкъ дин къардашланы аралыгъын сыкълашдыра ва Есибизге ювукъ экенибизни сезмеге кёмек эте.
Умуми жамиятгъа яхшы яндан таъсир этеген жамият намазны ажайып кюйдеги ругь гючю бар. Бирче жыйылып, Яратгъаныбыздан кёмек ва берекет тилейгенде, аралыгъыбыз ювукъ бола, эришивлю гьал басылмакъгъа, жамиятыбыз татувлу болмакъгъа болушлукъ эте. Ондан къайры, бу гьал бютюн бусурманланы бирикдире. Адамлар сыкълашып, намаз къылагъанда, олар уллу уьмметни гесеги гьисапда гьис эте оьзлени ва бир-бири булангъы аралыкълары ювукъ бола.
Уьстевюне, жамият булан намаз къылагъан гиши, бу ибадатны тетиксиз кютмеге уьйрене. Оьзгелер булан бирче намаз къылагъанда, айлана якъгъа агьамият бере туруп, йиберилеген хаталарыбызны гьис этмеге ва ибадатыбызны дагъыдан да яхшы этмеге болабыз.
