Охумагъа сюегенлеге билимни эшиклери ачылгъан!
Муна яшлар учун охувну заманы битди. Биревлер уьч айлыкъ ял алывгъа гетежек, башгъалар, оьрдеги класдагъылар буса, охувун къайда узатайыкъ деген масъаланы чечмеге урунажакъ. Гьалиги заманда къайсы касбуну да сайламагъа, билим алмагъа да хыйлы имканлыкълар бар. Шоланы арасында Магьачкъаладагъы Гуманитарнопедагогический колледж де охумагъа сюеген, билимге амракъ яшланы къабул этмеге гьазир.
Школаны битдирген яшланы кёплери тез-тез уллу адамлар болмагъа, оьз ёлун тангламагъа алгъасай. Гьаракат этмеге гьазир шолай яшлагъа бизин Гуманитарно-педагогический колледжибиз кёмек этмеге бола: 3–4 йыл охугъан сонг, шексиз кюйде ишге тюшюп болардай, касбуну тангламагъа имканлыкъ бар. Ал заманларда орта хас билим береген техникумлагъа оьр охув ожакълагъа тюшюп болмагъанлар бара деп санала эди буса, гьалиги заманда гьал бютюнлей алышынгъан деп айтмагъа ярай.
Мунда орта охув ожакъланы атлары алышынгъанлыкъда тюгюл – гьали олар колледжлер болгъан. Аты башгъа болгъаны булан гьазирликни, дарс беривню даражасы да алышынгъан. Колледжлерде орта хас билимни янгы программалары къабул этилген ва касбучулар профессионал къайдада гьазирлене. Колдеджде охуп билим алмакъ учун кёп себеп бар. Белгили кюйде, 15–17 йыллыкъ чагъындагъы къайсы да яш адам ЕГЭ булан байлавлу психика юкню гётермеге болмай. Колледжге тюшмек буса, шолай сынавлардан оьтмеге тарыкъ тюгюл, демек имтагьамлар бермей охувгъа гиришмеге бола. Орта школаны битдиргенни белгилейген аттестат таманлыкъ эте. Бу охув ожакъгъа тюшмеге гьазирленегенлеге оьр даражалы касбучулар болмакъ учун ажайып арив имканлыкълар ачыла. Бизин колледжде гьалиги заманда иш булан таъмин этилежек касбулагъа уьйрете.
9 ва 11 класланы битдиргенлер учун «Экономика и бухгалтерский учет», «Информационная система и программирование», «Социальная работа», «Дошкольное образование», «Преподавание в начальных классах», «Дизайн» деген касбулар бар. Кёплер эшитгендир, бизин колледжде охувгъа йимик тарбиягъа да айрыча агьамит берилегенни. Шолай, охувчу ругь якъдан да оьсмеге болсун учун бизде хас дарслар бериле ва оланы терен билимли муаллимлер юрюте.
ГПК деген колледжде охумакъ жаваплы да, маъна якъдан пайдалы да дюр. Айтгъан сёзлеримни булай далил де исбатлай. 2019-нчу йылны натижаларына гёре, ГПК Россиядагъы лап яхшы 100 орта охув ожакъланы арасына гирген. Колледж охутув-лаборатория ясандырывлар ва оьр даражалы дарс беривчюлер булан оьктем болагъан кюйде. Дагъы да булай иш булан макътанмагъа сюер эдим. Бу йылны март айында колледж Россияны Вордскилс деген социальный ишге байлавлу регион ярышларда ортакъчылыкъ этди ва бир охувчу къызыбыз шонда уьстюнлюкню алды.
Ол къыз федеральный оьлчевдеги ярышларда да ортакъчылыкъ этмеге башлагъан ва шонда да оьзюн гёрсетип болажакъгъа шекленмейбиз. Хас имтагьам оьтгермеге болгъаныкъ да бизин учун уллу даража. Шону натижасында хас эксперт гьазирледик. Охувдан къайры яшларыбыз оьзге пайдалы иш булан да долана. Ондан къайры, охувдан бош заманында бир-бир тамаша ярышлар, программалар онгарабыз ва охувчулар онда кёп сююп ортакъчылылкъ эте. Бизин яшларыбыз Дагъыстан муфтият ва тахшагьарыбызны ёлбашчылары онгарагъан рагьмулу акцияларда ортакъчылылкъ эте. Студент яшаву шонча да толу ва жанлы, гьатта ялкъмагъа бир мюгьлет къалмай.
Орта хас билим береген охув ожакълар яшавда гьар гюн тарыкълы ишни юрютмеге болардай касбучуланы гьазирлей. Шо саялы охувдан сонг «Къайда ишлейим?» деген масъала арагъа чыкъмай. Тюрлю-тюрлю иш есилер бизде охуп битген яшланы оьзлеге кёп сююп ишге ала. Сынавубуз гёрсетеген кюйде, бизин колледжде охуп билим алгъан яшлар тизив касбучулар бола. Сонг оланы гьакъында иш есилер айтагъан сёзлер шолайлыкъны ачыкъ кюйде токъташдыра. О саялы яшавда оьз ёлун тапмагъа мурат тутгъанлар учун бизин колледж тарыкълы билим бережекге инамлы кюйде айтмагъа болабыз ва бизге гелмеге чакъырабыз. Орта охув булан тамамланмагъа сюймейгенлер учун охувун узатмагъа ва оьр охув ожакълагъа тюшмеге болушлукъ этебиз, шону учун бир-бир институтлар булан дыгъарлар да байлангъан.
ЖЕННЕТ ТЕМУРКАЕВА,
ГПК-НЫ ДИРЕКТОРУ
