Халкъ учун юрек тебип язылгъан сатырлар

Охувчуларыбызны тергевюне белгили шаир ва язывчу, Россия язывчуларыны Союзуну члени Багьавутдин Гьажаматов язгъан шиъруланы бугюн печат этебиз. Кёбюсю охувчулар Багьавутдинни китапларын таный, бек сююп охуй. Ону шиъру язагъан пагьмусу да бар, анадаш халкъын сююп язылгъан сатырлары булан сизге таныш болмагъа таклиф этебиз.

Гьапизлеге багъышлана

Халимбекавул яя,

Шавласын ярыкъ айдай.

Илму итти къылычдай,

Элни балагьдан сакълай.

Гьакъ юрекден къутлайман,

Бугюнгю байрам булан.

Савлукъ, насип ёрайман,

Ёрайман къатты иман.

Шюкюр болсун Аллагьгъа ﷻ,

Бизге берген ниъматгъа.

Уллу насип динибиз,

Савгъат этген Есибиз.

Кёп болсун муаллимлер,

Устазлар ва алимлер,

Илмугъа уьйретеген,

Тюз ёлну гёрсетеген.

Баракалла Сакълайгъан,

Бу дюньяны Яратгъан,

Бизге рыцкъы береген,

Юреклени гёреген.

Тарих бизин уьйрете,

Аян этип гёрсете.

Динсиз халкълар тозула,

Гьукуматлар бузула.

Васият Пайхаммардан ﷺ,

Етишген аталардан,

Динни къатты тутмагъа,

Хазнадай сакъламагъа.

Аркъатаяв – бир Аллагь ﷻ,

Барлы, Даим яшайгъан.

Макътавну Еси, Шагьат,

Рагьмулу, Далил, Чомарт.

Аллагьны ﷻ разилиги,

Гьар инсангъа гереги.

Разилигин алмагъан,

Болажакъ пакъырлардан.

Халимбекавул яя,

Шавласын ярыкъ айдай.

Илму итти къылычдай,

Элни балагьдан сакълай.

Дёргелили Абдурагьман Къаплановгъа

Дёргели юртда тувгъан,

Арнавутдай нарт улан.

Оьзден къылыгъы булан,

Иманлы, динли болгъан.

Таянып бир Аллагьгъа ﷻ,

Узакъ оьмюр яшагъан.

Аллагьны ﷻ аты булан,

Гьар абатын алагъан.

Болгъан ону байлыгъы,

Ислам динни ярыгъы.

Гьакъ ёлланы ачагъан,

Къолунда сыйлы Къуръан.

Къоркъув билмейген батыр,

Тарихде къалар аты.

Абулав-Абдурагьман,

Алим, уста, къагьруман.

Алимлени къурдашы,

Имамланы сырдашы.

Чомарт болгъан къоллары,

Булакъ сувдай ойлары.

Хасияты тувмадан,

Юрек толгъан рагьмудан.

Инсангъа илиякълы,

Асилли, саламатлы.

Боранлай сувукъ еллер,

От ялындай девюрлер.

Ватаныма динсизлер,

Питне, балагь гелтире.

Такъсырланды нечелер,

Гюнагьсызлар гечелер.

Байлар, бийлер, динчилер,

Элде мендей эренлер.

Аллагь ﷻ сынай халкъланы,

Тергеп къарай гьалларын.

Муъминни амаллары,

Женнетни ачгъычлары.

Дёргели юртда тувгъан,

Арнавутдай нарт улан.

Оьзден къылыгъы булан,

Иманлы, динли болгъан.

Намуслу, батыр эренлеге

Танг уланлар тартынмагъан намусдан,

Сайламагъан мал-матагьны яшама.

Абур алгъан, иймей оьктем башларын,

Къаст къылгъанлар, къагьрумангъа ошама.

Уьлгю алгъан Аманхордан, Къазакъдан,

Бош ерлерде «къала къургъан къастлыкъдан».

Ислам дини, Ана булан Атасы,

Тангаланы тюрлендире хазнасы.

Бир Аллагьгъа ﷻ башын даим ийгенлер,

Халкъы учун тувгъан элге эренлер.

Къарт эмендей «кёп еллени» гёргенлер,

Айгъазидей намус кютген оьзденлер.

Къаны къайнап санларын да сёкгенлер,

Къалкъан болуп якълагъангъа тюзлюкню.

«Гьайт», – дегенде: «Вайт», – деп отдан оьтгенлер,

Сан этмеген, бирт де экиюзлюкню.

Булут басып, элге явлар чапгъанда,

Сындырмагъан ягьдан толгъан юрекни.

Оьзлер оьлген, сёзю «къабур» болгъанда,

Кант этмеген, излеп тапгъан герекни.

Къайпанмагъан черивлени алдында,

Ол къызбайлар савут табып чыкъса да.

Тартынмагъан, таваккал бар санын да,

Тувра тиреп, тёшге тюбек чыкъса да.

Гьайкел этген чомартлыкъны къагьруман,

Къумукъ тюзню даим кёкге чюйгенлер.

Уьлгю алып Зайналабит игитден,

Хазар халкъын Солтан-Мутдай сюйгенлер.

Танг уланлар, Тангчолпангъа тенг геле,

Тазалыгъын булакъ сувдан алгъангъа.

Ойлары да, къайраты да тенг геле,

Атоллулар маякъ болуп къалгъангъа.

Тефвик Зенгинге

Яшасанг да арекде,

Къумукъ элинг юрекде.

Къан инсангъа билдирте,

Ватанына гелтирте.

Терен гетген тамурунг,

Эндирей ата юртунг.

Гьавасы, булакъ сувлар,

Юрегинге дарманлар.

Бизге насип барлыгъынг,

Сени оьзден къылыгъынг.

Илиякълы хасият,

Аллагьым ﷻ берген ниъмат.

Уллу байлыкъ, хазналар,

Сени йимик уланлар.

Халкъ учун этген ишлер,

Унутмас гележеклер.

Таянып бир Аллагьгъа ﷻ,

Сен чыкъгъансан тюз ёлгъа.

Къарамай боранлагъа,

Барасан, къардаш, алгъа.

Къабул болсун дуалар,

Шавлалы, нюрлю ёллар.

Сен орнатгъан тереклер,

Берер эркин емишлер.

Халкъгъа пайда гелтирер,

Маъналы этген ишлер.

Сени йимик эренлер,

Оьз миллетин оьр этер.

Яша юз йыл, ювугъум,

Йыракъдагъы къумугъум.

Гьакъ юрекден къутлайман,

Уьстюнлюклер ёрайман.

Сакълайгъаным сакъласын,

Якълайгъаным якъласын.

Бол Аллагьгъа ﷻ аманат,

Аллагьдан ﷻ болсун рагьмат.

Гьайдакълы къумукълагъа

Гьайдакъ – булутлу тавлар,

Генг майданлар, булакълар,

Чечекленген авлакълар,

Отлавдагъы йылкъылар.

Болмас гъайдакълы къайтыкъ,

Хазнасы – оьзден къылыкъ.

Боламы дагъы артыкъ,

Къумукъгъа сыйлы байлыкъ?

Къайтмас тутгъан ёлундан,

Гьайдакълы къоччакъ улан.

Зулмучугъа батырлар,

Тийишлисин къайтарар.

Халкъым мени яшасын,

Элим даим яшнасын.

Яратгъаным якъласын,

Балагьлардан сакъласын.

Къазанышлы ювугъум Абдуллагъа

Янгыз таш къала болмас,

Эл яшнар бирлик булан.

Янгъыз терек бав болмас,

Элинде яйнар улан.

Гьакъ юрекден къутлайман,

Абдулла, сени бугюн.

Яхшылыкълар ёрайман,

Шатлыкъдан толсун уьюнг.

Санынгдагъы къайнайгъан,

Эл учун къайнай къанынг.

Оьз халкъынгны якълайгъан,

Насип сени барлыгъынг.

Берекетли Къазаныш,

Тамурунг, ата юртунг.

Тилеймен сагъа алгъыш,

Къабул болсун умутунг.

Янгыз таш къала болмас,

Эл яшнар бирлик булан.

Янгъыз терек бав болмас,

Элинде яйнар улан.

Халкъ учун юрек тебип язылгъан сатырлар