Пайхаммарны ﷺ ёлун тас этмесмен…

Газетибизни бетлеринде арагъа аты генг яйылмагъан, тек пагьмулу шаирлерибизни яратывчулугъу ер таба. Муна, бугюн де Чагъаротарда тувгъан, онда оьсген Салимахан Эсенболатова язгъан шиъруланы печет этебиз.

Бир заман да иман ёлдан таймагъыз

Бу дюньядан гетгенден сонг инсанлар

Азаплагъа салынса нечик гёрерсиз?

«Неге намаз къылмадынг?» – деп сораса,

Есибиз Аллагьгъа ﷻ не жавап берерсиз?

Сырат кёпюр инче йипден эшилген

Тюбюнде жагьаннемни оту яллайгъан.

О кёпюрден энни нечик чыгъарсыз

Намаз къылмай, ораза да тутмагъан?

Бу дюньяда сиз ичеген гьаракъы

Тыгъылажакъ тамакълагъа тот болуп.

Бу дюньяда сиз къазангъан гюнагьлар

Чыгъар сизин алдыгъызгъа от болуп.

Сувсагъанда сув да тапмай ичмеге,

Ичинг гюер, гюйдюргендей агьлюнгню.

Яшларынгны ташлап гетген йылатып,

Яллатажакъ ятар къабур уьюнгню.

Сен анангны яллатгъандай юрегин

Къайнарлар да асар сени санынгны.

Бу дюньяда Аллагьгъа ﷻ баш иймесенг,

О дюньяда бек къыйнажакъ жанынгны.

Бу дюньяда сен товбагъа тюшмесенг,

О дюньяда Аллагь ﷻ сени гечмежек.

Къара йылан сорагъанда гёз майынг,

Кёмек этме гьеч бирев де гелмежек.

Оьлгенден сонг сен донгузгьа ошарсан,

Малайиклер къачар сени гёргенде.

Жагьаннемни къапулары ачылар,

Пайхаммарлар сагъа налат бергенде.

Намаз къылмайгъанлар – намаз

къылыгъыз,

Рамазан ай ораза да тутугъуз.

Къол узатып садагъалар этсегиз,

Гьажгъа барма ачылажакъ ёлугъуз.

Бисмиллягь деп Къуръанны ал къолунга,

Аллагь ﷻ булан иманны сал юрекге.

Шайтан-жинлер чабып чыкъмас ёлунга,

Намаз къылып, ёлдашлыкъ эт имангъа.

Къайгъылы гюн, къыйынлы гюн жанынга,

Иман гелер ёлдаш болуп янынга.

Аврув тийип, аврув сингсе санынга,

Иман сингер дарман болуп къанынга.

Къатты боран къышда къалсанг

къырларда,

Малайиклер етип гелер янынга.

Сен охугъан гьар аяты Къуръанны,

Исив берип, сингер сени санынга.

Айсени де, къыларман деп тангала,

Не болса да намаз къылмай къоймагъыз!

Бирев билмей туражакъны эртенге

Бир мюгьлет де иман ёлдан таймагъыз!

Сыйлы Пайхаммарым ﷺ

Бусурманлар Аллагьны ﷻ

Кёп сюеген къуллары,

Дуа этип кёклеге

Узатылгъан къоллары.

Тобукъланып гече-гюн,

Аллагьгъа ﷻ баш иебиз.

Жаныбыздан да артыкъ

Пайхаммарны ﷺ сюебиз.

Къайсыбыз да разибиз

Ол учун жан бермеге.

Бусурман динни якълап,

Буссагьат да оьлмеге.

Биревге де къоймасбыз

Сёз айтма Пайхаммаргъа ﷺ.

Яш ва уллу чыгъарбыз

Биз ону якъламагъа.

Пайхаммар ﷺ янгыз тюгюл,

Ону уллу асгери.

Сав дюньягъа яйылгъан

Ислам динни тереги.

Мугьаммат Пайхаммарны ﷺ

Савуту сыйлы Къуръан.

Балдай тама юрекге

Шербетдей татли иман.

Билмейгенлер билсинлер,

Англамайгъан англасын.

Къуръанны охуйгъанда,

Яхшы кюйде тынгласын.

Пайхаммарﷺ ким экенни

Сорасынлар Аллагьгъа ﷻ.

Пайхаммар ﷺ этип ону,

Йиберген дюньялагъа.

Мугьаммат Пайхаммаргъа ﷺ

Башын ийген тавлар да.

Ону аривлюгюне

Чечек ачгъан бавлар да.

Малайиклер сююнюп,

Учгъан дёрт де янындан.

Бары да жан-жанывар

Юрюй болгъан артындан.

Топуракъ да гьюрметлеп,

Гийген яшыл опуракъ.

Яшнайгъан яшыл отлар

Терек бою япыракъ

Мугьаммат Пайхаммарны ﷺ

Аллагь ﷻ оьзю сайлагъан.

Огъар атын да тагъып,

Тёрлеринде сакълагъан.

Пайхаммар ﷺ учун Аллагь ﷻ

Сыйлы женнетлер къургъан.

Женнетни ачгъычларын

Мугьамматгъа ﷺ тапшургъан.

Женнетни гюл бавларын,

Бюлбюл къушлар йырлайгъан

Нар, хурма тереклерин

Къарлыгъачлар чарнайгъан

Айны, гюнню чырагъын

Пайхаммар ﷺ учун якъгъан.

Тавланы тёшлеринден

Шербет оьзенлер акъгъан.

Пайхаммар ﷺ учун яна

Юлдузлар гече кёкде.

Мугьаммат Пайхаммарым ﷺ

Яшлай синген юрекде.

Пайхаммар ﷺ учун кьургъан

Макканы, Мадинаны.

Бары да бусурман халкъ

Айланагъан Каабаны.

Топуракъны ярып чыкъгьан

Пайхаммар ﷺ учун сувлар.

Яшнап чечек ачагъан

Минг тюрлю емиш бавлар

Мугьаммат Пайхаммаргъа ﷺ

Шавла берип нюр явгъан.

О саялы бизге де

Хадиргюн гюнлер тувгъан

Таза бизин динибиз,

Бек гючлю иманыбыз

Аллагь ﷻ булан Пайхамар ﷺ

Къуръан – бизин жаныбыз.

Исламны мысгъылагъан,

Пайхаммаргъа ﷺ сёз айтгъан

Жагьаннем отда яллап,

Артда имангъа къайтъан.

Мугьаммат Пайхамар да ﷺ

Нюр Исламны сайлагъан.

Бары да бар байлыгъын

Уьмметине пайлагъан.

Уьммет учун яшагъан,

Уьммет учун талашгъан.

Ач адамны ашатып,

Оьзю нече ач къалгъан.

Хурт булан хомурсгъаны,

Жибин де оьлтюрмеген.

Тилсиз жангъа, гьайвангъа

Бир де зарал бермеген.

Бир гиччи бутагъын да

Сындырмагъан терекни.

Асил сёйлеп Пайхаммар ﷺ

Сююндюрген юрекни.

Бир де юрек тутмагъан,

Бары да халкьны гечген.

Халкъ ашагъанны ашап,

Халкъы булан сыр чечген.

Авруйгъан адамланы

Къолун, аягъын сыйпап,

Аллагьына ﷻ ял барып,

Кёмек тилеген, йылап.

Гьар тыныш алгъан сайын

Аллагьгъа ﷻ макътав этген.

Тобукъланып баш ийип,

Топуракъны да оьпген.

Гьар тамчысын сувну да

Гьар бюртюгюн ашны да

Макътав этип Аллагьгъа ﷻ,

Оьпген тавну, ташны да.

Бу дюньядан гетсе де,

Гетмеген юреклерден.

Атир ийиси геле

Гюл ачгъан тереклерден.

Къарлыгъач болуп чарнай,

Бюлбюл къуш болуп йырлай.

Гечелер ярыкъ берип,

Ай болуп кёкден къарай.

Бал жибин болуп къона

Бал берме гюляйлангъа.

Сукъланып къала тынглап,

Къуръан охуйгьанлагъа.

Макътав болсун Аллагьгъа ﷻ,

Аявлу Пайхаммаргъа ﷺ.

Бир Аллагьны ﷻ ёлуна

Тюшген бусурманлагъа.

Эс тап

Гьей, инсан, токъта, таман,

Заманлар гетип бара.

Этген терс ишлеринге

Терен ойлашып къара.

Ашав-ичивню унут,

Тобукълан, тобагъа тюш.

Намаз къыл, ораза тут,

Гьажгъа барма эт умут.

Абурла ата-анангны,

Таза сакъла санынгны.

Дюнья малгъа ябушуп,

Языкъ этме жанынгны.

Гьарам ашны ашатып,

Ув берме яшларынга.

Арада тил юрютюп,

Балагь алма башынга.

Хоншуларынга болгъан

Яхшы ишни гюллеме.

Аллагьны ﷻ дербишлери –

Сакъатлагъа кюлеме.

Хурт булан хомурсгъаны

Гёре туруп таптама.

Кёп къыйналып оьсдюрген

Ата-анагъа гьаплама.

Авруйгъан аврувлардан

Акъча алмагъа гюнагь.

Аврувдан акъча алсанг,

Уьюнге гелер балагь.

Башынга явлукь байла,

Абур эт аталагъа.

Языкъсын сакъатлагъа,

Кёмеги ёкъ къартлагъа.

Болуп битген яшынгны,

Къоркъ Аллагьдан ﷻ, тайдырма.

Тил этип, гьей дин къардаш,

Сюйгенлени айырма.

Эсирип-ичип гелип,

Сен анангны йылатма.

Ялгъан чыгъар бурнунгдан,

Биревню де алдатма.

Не къыйынлыкь болса да,

Халкъынгдан айырылма.

Уруну арты къуру,

Халкъны къыйынын алма.

Сиривден айырылып,

Калмагъыз агъа-ини.

Вёре, сиз тас этмегиз,

Елун бусурман динни.

Иманынг булан оьрлен,

Кёклени батгъычына.

Унутма, бир ананг ес,

Женнетни ачгъычына.

Сапаргъа чыгъагъанда,

Эсгерип чыкъ Аллагьны ﷻ.

Юрекде Аллагь ﷻ булан

Гёрмежексен балагьны.

Ел чыкъсын, янгур явсун,

Гизирикленме чакъгъа.

Процент акъча – гюнагь,

Неге бересен халкъгъа?

Гьарамгъа урунгъанча,

Авлетлеринге ойлаш.

Гьарам авлетден чыгъа,

Ону унутма, къурдаш.

Гьар тыныш, гьар абатда,

Аллагьгъа ﷻ макътавлар эт.

Намаз къылма яшлайын

Авлетлерингни уьйрет.

Яшавда не де бола,

Сабур болмагъа къара.

Билмейгенинг бар буса,

Билегенлеге сора.

Ананы орнун тута,

Къызардашынгны ая.

Бир аз эс тапма къара,

Яшавунг гетер зая.

Аявла яшларынгны,

Агьлюнгню языкъ этме.

Алтын тапсанг да ёлда,

Вёре, уьюнге элтме.

Гьей инсан, токъта, таман,

Заманлар гетип бара.

Этген терс ишлеринге

Терен ойлашып къара.

Нече де бек алгъасап,

Сагъа да гелер къартлыкъ.

Гьалиден эс тапмасанг,

Артда боларсан языкъ.

Пайхаммарны ﷺ ёлун тас этмесмен…