Яшланы гьайын этеген охув ожакъ

Макъалабызны башын охугъанда: «Башгъача янашагъанлар да боламы?» – деп бир-бир охувчулар тамаша болмагъа бола. Амма, яшав гёрсетеген кюйде, гьалиги заманда дарс берип къутулуп къалагъан яда янгыз къазанмакъны гьайындан къайры башгъа затгъа ойлашмайгъан охув ожакълар кёп болгъан.

Тарбияны, берилеген илмуну даражасына, охув битген сонг тюнегюнгю охувчуланы гележегине юреги авруйгъан муаллимлер де, охув ожакълар да сийрек ёлугъагъаны яшыртгъын тюгюл. Магьачкъаладагъы Гуманитарно-педагогический колледж оьзгелени арасында шайлы алышына. Хас орта билим береген бу охув ожакъда инг башлап охувчуда адам къылыкъ оьсдюрмеге, сонг буса айлана якъгъа пайдалы касбучу тарбиялай. Шо саялы бу колледж жамият учун тарыкълы да дюр, уьстюнлюкге де етише. Бугюнлерде ГПК 15 йыллыкъ юбилейин белгиледи ва шогъар байлавлу бир-бир чаралар оьтгерди.

Шатлы жыйын

Оьтген ёлну белгилемек ва гележекге умут тизмек булан, апрель айны башында ГПК абурлу къонакълар чакъырып, шатлы жыйын оьтгерди. Баракалла сёз булан гелгенлени охув ожакъны директору Женнет Темуркаева къаршылады. Сонг чыгъып сёйлеген Дагъыстанны муфтиси шайых Агьмат-афанди колледжни юбилейи булан къутлап, ГПК яшавгъа гелген кюйню гьакъында хабарлады ва охувчулагъа бир-бир ёравлар берди.

– Сиз не заманда да адилли болугъуз, неге десе лап гючлю адам – адилли адам. Сиз адилли оьзюгюз болугъуз, тек башгъалардан шону оьзюгюзге талап этмегиз, излемегиз. Дарс берегенлеге абурлу болугъуз, неге тюгюл сиз билимни китаплардан тюгюл, муаллимни юрегинден аласыз. Уллулагъа гьюрмет этигиз. Гьалиги заманда уллулагъа ва ёлбашчылагъа хырт деп сёйлемек ажайып иш деп эсине гелегенлер кёп бар. Амма шолай янашыв биревге де къыйышмай, эрши гёрюне.

Шо гюн колледжге ва ону гьаракатына абур этип гелген оьр къуллукъланы юрютегенлер, депутатлар, оьзге охув ожакълардан гелгенлер, жамият чалышывчулар хыйлы исси сёзлер, ёравлар айтды. Оьз янындан ГПК-ны муаллимлери ва охувчулары юбилейине гелгенлени ялкъмагъа къоймады: олагъа шиърулар охуду, йыравлар нашитлер йырлады, сагьнада бир-бир гёрюнюшлерден гесеклер салынды.

Илму конференция

Шатлы жыйындан сонг экинчи гюн ГПК бютюнроссия илму конференция оьтгерди. Умуми къатнав ва ону Дагъыстангъа болажакъ пайдасына багъышлангъан шо жыйында гьар тюрлю охув ожакълардан 50-ден артыкъ доклад охулду. Конференцияны ишинде ватаныбызны ер-еринден ва тыш пачалыкъланы вакиллери де ортакъчылыкъ этди. Шоланы арасында Ставрополь, Нальчик, Волгоград, Екатеринбург шагьарланы ва Пакистан, Къазахстан, Индонезия уьлкелени алимлери оьз ойларын айтды, сынавун ортакъгъа салып пикру алышдырды. Оьз янындан ГПК-ны къуллукъчулары да жыйып топлагъан сынавун арагъа салды ва гьар тюрлю пайда гелтиреген янгы охув къайдаланы къолламагъа гьазир экенин белгиледи. Пленарный ишлерде ДГТУ, ДГИ, ДГУ, ДГПУ, Правовой Академияны алимлери ортакъчылыкъ этип, хас докладлар охуду.

Спорт ярышлар

ГПК-ны юбилейин къаршылавгъа багъышлап шо гюнлерде тахшагьарыбызны охувчу яшларыны арасында спорт ярышлар оьтгерилди. Кахулай юртну «Къырымсолтан арена» деген майданындагъы ярышларда хыйлы спортчулар ортакъчылыкъ этди. Оланы республиканы спорт министерлигини къуллукъчулары, атлары айтылгъан спортсменлер къаршылады, къутлады ва уьстюнлюклер ёрады. Етти команда ортакъчылыкъ этген ярышларда бирев де утдурмады деп айтса ери болур. Неге тюгюл мунда утмакъ аслу мурад тюгюл эди, яшлар бир-бири булан къатнап, таныш болду, арада ювукълукъ, къурдашлыкъ гьислер тувду. Спортну шолай тамаша гюнери бары бу гезик де исбат этилди. Бугюн шо ярышларда тогъа тартагъан жагьиллер гележек яшавда бир-бирине табылып, кёмек этерге шеклик ёкъ.

Ораза айгъа гьюрмет булан

Белгили йимик, рамазан айда бусурманлар ораза ачывгъа бир-бирин къонакълай чакъыра. Шо да аралыкъланы беклешдиреген яхшы хасият. Колледжни муаллимлери ва охувчулары ораза айны гюнлерини бирисинде Къумукъ театрда, ону къуллукъчулары булан биригип, уллу ифтар оьтгерди. Гюнню узагъында ашны, сувны къоюп, маркачадан сонг бирче ораза ачып, иржайывлу бетлер булангъы къатнав, сююнюв, бир-бирин къутлав, къуваныв гьалиги заманда жамият учун оьтесиз тарыкълы ва пайдалыдыр. Бу жыйын халкъны бирикдирмеге де болушлукъ эте. Шо ахшам оьр къуллукъланы юрютегенлер де, простой адамлар да бир къалкъыны тюбюнде «Бисмиллягь» булан олтурагъаны, аш хабагъаны агьамиятлы агьвалат. ГПК да, Къумукъ театр да бирче гьаракат этмеге болгъаны халкъыбыз учун айрыча агьамиятлыдыр. Бир якъдан ораза тутгъанланы сююндюрмек, башгъа якъдан эл арада татувлукъ болдурмакъ. Экиси де янаша гелегени юреклени сююндюрмей болмай. Оьз яныбыздан ГПК-гъа Къумукъ театр етишген уьстюнлюклеге етмеге ёрайбыз, жамият учун дагъы да пайдалы болур деп умут этебиз.

АБДУЛГЬАМИТ БАЙГЕРЕЕВ