Яшлар учунгъу яйлыкъ дарслар тамамланды
Яшлар учунгъу яйлыкъ дарслар тамамланды
Белгили йимик, Дагъыстан муфтият гьар йыл яйлыкъ каникулларында яшлагъа айрыча охув программа гьазирлей. Охувчу яшлар ювукъ арадагъы межитинде Ислам динни кюрчюлерине тюшюне, Къуръан охумакъ учун уьйренмеге башлай.
Къайсы якъдан да бу бек пайдалы гьаракат! Бир якъдан – яшлар орамда гьалла-гьалла юрюмей, башгъа якъдан – билим ала ва тарбиялана. 11 йыллыкъ уланым Магьаммат да артдагъы эки йыл шо курслагъа юрюп, арап тилде охума уьйрене, динге байлавлу хыйлы янгы билим де топлагъан. Ол эртенокъ туруп, тойгъа барагъанда йимик, акъ гёлек гийип, яхшы гьазирленип, къолуна папкасын да тутуп гете эди. О кйюде, инилеримни яшлары да: бирлери юртда, башгъалары шагьарда охума юрюдю. Бир йылдан Къуръан охума уьйренип болмаса да (бу уллу адам учун да тынч иш тюгюл, жыйнакълы болмакъны талап эте), бара-бара уьйренер, бажарывлугъу артар деген умут бар.
Къуръандан бир гьарпны сама да охуп болгъан гишиге Есибиз Аллагь ﷻ не уллу шабагъат берегенни уланым биринчи гезик эшитгенде ажайып тамаша болду ва охума сююп, гёзлери йыртыллап йиберди. «Аллагь ﷻ онгарсын», – деп уьйдегилер биз де турдукъ. Заманда бир ол бизге бу гьарп булай охула, башгъасы олай деп билим алып геле эди. Озокъда, йылны узагъында охувдан ялкъгъан яшланы охувгъа янгыдан тартмагъа, агьамиятлы этмеге къыйын. Айрокъда айлана якъда ял алагъан вакъти буса – денгизде киринив, аякъмашин гьайдав, къурдашлар булан ойнав. Портфель къайда къалгъан буса да белгисиз огь не арив заман булагъа.
Шо курсланы юрютмеге ойлашгъанлагъа ва оьтгермеге бажаргъанлагъа уллу баракалла билдирмеге тийишли. Олар яшланы арив тарбияламакъны бойнуна ала, динге уьйрете. Улан хабарлайгъан кюйде, ёнкюйгенлеге аз-маз чубукъ да тие болгъан, неге десе талашагъанланы низамгъа тартма герек бола. Яшлар шону къабул эте, тынглавлу бола, уллулагъа гьюрмет этмеге уьйрене. Такъсыр булан янаша майлав да бар экен. Гьар эртен яшлагъа татлиликлер берип, оланы сююндюре болгъан.
Курслар битеген вакътиге яшлар бираз арыгъаны гьис этилди, тек бюдюремеди. Олар: «Гелеген йыл мен мунда къайтып гележекмен!» – деп савболлашды. Кюйге къарагъанда, школадагъы охувуна да о яшлар башгъачалай янашагъан болажакъ, билим алывну хадирин билеген болгъан йимик гёрюнелер.
Булай каникуллагъа ата-ана сююнмей боламы?! Авлети аз-кёп буса да билим алды, тарбия гёрдю, динге ювукъ янгы къурдашлар булан таныш болду. Нечик алай да, 1-нчи сентябрде школагъа гелгенде: «Яй нечик оьтдю?» – деген соравгъа, хыйлы яш заманын бош йибермей, пайда алып оьтгергенин айтма болажакъ.
