Къабурланы эки янын бегетегенде къол ялгъадылар
Инсаплыкъ, рагьмулулукъ ва чомартлыкъ лап да инсанны инче къылыгъыны бир гесеги деп ойлайман. Бу ерде шулай бир затгъа агьамият бермекни тийишли гёремен.
Шавхал-Янгыюрт Хумторкъали районну лап да йыракъда ерлешген юртларыны бириси. Юртлуларым, бирлери темиркъазыкъ бойда, бирдагъылары буса савлай уьлкени ерлерине яйылып, яшавлукъ къуралар. Муна, бугюн мен агъа-ини Нурутдиновланы гьакъында бир-эки сёз язма сюемен. Шихаммат, Шихмурат ва Ханмурза темиркъазыкъ бойда яшаса да, тувгъан-оьсген элин унутмайлар. Бу ерде юртлум Элдар Акъаевни атын да эсгерме тийишли гёремен. Айтагъаным, Элдар оьзю шагьарда яшаса да, ата юртун унутмай. Ол юртну жамият яшавунда да ортакъчылыкъ эте. Муна, бу гезик де Элдар ягъада турмады, агъа-ини Нурутдиновлар булан бирге къабурланы эки янын бегетегенде шо инсаплы ишге ол да къол ялгъады ва къолундан болагъан кёмегин этди.
Бираз алдын олар барысы да, олагъа къошулуп лап да гиччи иниси Батырмурза да юртлу къабурланы эки янын бегетегенде къол ялгъап, кёмегин болдурдулар. Оланы лап гиччиси Батырмурза Шавхал-Янгыюртда яшай. Мен шо этилеген ишни ахтаргъанда, ол магъа усталаны гьатта йыракъдагъы Къызлар шагьардан гелтиргенин айтды.
Энни ерли къабурланы дёрт де яны бару тутуп, бегилген. Мунда башгъа саякъ къалгъан гьайван-мал да гирип болмажакъ. Юртну жамияты учун этилген къуллугъугъузну Аллагь ﷻ къабул этсин! Йылдан-йылгъа Есибиз Оьзю дагъы да сабурлугъун салсын! Эсенлик-аманлыкъ сабурлукъ-саламатлыкъ булан ёлукъма насип болсун!
Мен юртлуларымны атындан агъа-ини Шихаммат, Шихмурат, Ханмурза ва Батырмурза Нурутдиновлагъа ва олар булан бирге айлангъан Элдар Акъаевге де разилигимни билдирме сюемен.
Белгили йимик, инсан бу дюньядан гетген сонг да, зувап гелтиреген садагъалар бола. Масала, жамият къоллап болар йимик яхшылыкъ этсе, огъар берилеген шабагъат шо ишни инсанлар къоллап тургъан чакъы заман язылып туражакъ. Булай ишлерден ягъада къалмагъыз деп имамлар кёп айта, неге десе ахырат учун уллу пайдасы бар.
Арабызда шолай чомарт уланлар барына сююнмей болмайсан. Гьалал ёлда къазанып, маясын къызгъанмай юрт учун акъчасын харжлап болмакъ – адамлар учун да яхшы, Яратгъаныбызны алдында да уллу зуваплы иш.
Биз бир-бирде не этмеге болабыз деп эсибизге гелме бола, тек гьакъыкъатда гьар ким къолундан гелеген не йимик иш этсе де, уллу пайда болмакъ бар. Садагъа этмек учун бай болмакъ борч тюгюл, рагьмулу ишни хыйлы ёллары бар. Къол булан кёмек этмек де, гьатта ёлдагъы пуршав этеген нени буса да тайдырса – шо да уллу яхшылыкъ, уллу зуваплы иш.
