Къызлар дин билимин гёрсетди
Дагъыстанда Ислам дин оьсе, шолайлыкъ яшлар лап гиччи вакътисинден тутуп билим алмагъа къасткъылагъанындан да гёрюне. Яшланы гьаракатын макътамакъ, оланы гёнгюн алмакъ ва охувун узатмагъа иштагьлы этмек учун уллулар оланы савгъатлай, башгъалагъа уьлгю этип гёрсете. Бир-бирде конкурслар да оьтгере.
Шолай, 13-нчю декабрде Хасавюрт райондагъы Ботаюртда къызланы арасында Ислам дин билимге байлавлу конкурс оьтгерилди. Ботаюртну имамы Динислам Баймурзаевни сиптечилиги булан ва юртну жамияты да якълап, оьтгерилген бу конкурс хыйлы жагьил къызланы къуршады. Юртну ругьани къуллукъчусу, жамиятны башын тутгъан адам яшланы охувгъа тартмакъ булан, халкъ арада Ислам динни яймакъ учун, гьаракат этегени юрек сююндюрмей болмай. Гележегибиз – яш наслуда ва шо саялы бизден сонг гелегенлер динибиз гёрсетеген кюйде тарбия алса, охуса, бизге парахат болма ярар. Неге десе, Ислам дин булан юрюйген инсанлар къылыкъ якъдан да оьр даражада болур, яманны-яхшыны айырып, гьарамдан сакъланып, гьалал яшама ёл ачылар. Натижада эки де дюньяда талайлы болур.
Къызланы билимин тергемек ва олагъа багьа бермек учун, жюри гьисапда Буйнакск шагьардагъы Сайфулла-Къадини атындагъы ислам университетни охуп битдирген Фатима Шарипова ва Асият Аджаматова чакъырылды. Конкурсда ортакъчылыкъ этген къызланы охутгъан къызардашлар Хадижат ва Аминат Пезуевалар да Сайфулла-Къадини атындагъы ислам университетни охуп битдирген. Бу къызардашлар аз заманны ичинде юртлу хыйлы яшны бусурман динге ювукъ этген, намаз къылма, Къуръан охума уьйретген.
Конкурсну натижаларын айтса, биринчи ер – Малика Тавалаева, экинчи ер – Айзанат Атаева, уьчюнчю ер – Азиза Магьтиева алды. Булагъа савгъат гьисапда акъча берилди. Конкурсну гьазирлеген ва оьр даражада оьтгерме бажаргъан адамлагъа айрыча баракалла сёз айтмагъа тийишли. Олар, гертиден де, Аллагь ﷻ рази къалар йимик ишни этип башына чыкъды. Булай гьаракатланы натижасында Ислам динни ярыгъы яйыла, жамиятны ругь савлугъу къатты бола, оьсюп гелеген наслу тюз ёлда экенине токъташа.
Сонг да, Буйнакск шагьарда ерлешген Сайфулла-Къадини атындагъы Дагъыстанда арт девюрде ачылгъан лап биринчи ислам университет билимли касбучуланы гьазирлейгени, яшланы гьайын этегени саялы, халкъ арада абур тапгъаны негьакъ тюгюл. Гёресиз, оьзлерде охуп билим алгъан къызлар дин яйывда нечик гьаракат эте, яшларыбызгъа Ислам динни сюймеге, Аллагь ﷻ ёлуна тюшюнмеге нечик кёмек эте.
