Гьакъыл, ругь ва къаркъара сакъланагъан кюй
Гьалиги чалт барагъан яшав гьал жыйнакълы болмагъа уьйрете бизин. Ишдеги загьмат, уьйдеги чалышыв, яшланы гьайын этив, гёз алгъа тутгъан муратлагъа талпыныв, айлана якъда болуп турагъангъа къулакъ асыв, оьз даражангны артдырыв – булар барысы да ажайып къуват ва чыдамлыкъ талап эте.
Шу чабывулда оьз гьайыбызны этмеге унутуп къалабыз. Талаша туруп гюнлер гете, шону булан бирче ругьдан тюшмек бар, жан рагьатсыз гьалгъа тарыма бола. Шолай гезикде бираз токътамакъ яхшы болур. Оьз гьайын этмек – инсан учун яшавуну аслу кюрчюсю. Оьз гьайыбызны этмек булан яшав гьалыбызны эниш гетме де къоймайбыз, савлугъубуз ва бар-барлыгъыбыз саялы Есибизге шюкюрлюк билдиреген де бола.
Оьз пайдабызны унутмай, бу ва герти яшавда уьстюнлюкге нечик етишме бола дагъы?
Оьз гьайын нечик дурус этмеге болагъангъа байлавлу бир нече ёрав:
1. Къаркъара
Аз ашагъыз. Гюнде нечакъы керен ва не ашайгъаныгъызны тергеп къарагъыз ва, татувлу буса да, тек пайдасы ёкъ ашдан айрылыгъыз. Бола туруп, емишлер, овошлар, бал тепсиден таймасын.
Къаркъараны жагь кюйде сакъламакъ учун кёп яяв юрюгюз, лифтни къоюп, канзилеге минип-тюшюгюз.
2. Гьакъыл
Болгъан чакъы кёп гьавагъа чыкъмагъа къарагъыз, айлана якъны гёзеллиги гьакъда ойлашыгъыз. Заманда бир шкафны тергеп чыкъмакъ ва гийилмейген опуракъдан эркин болмакъ арив болур.
Сюеген иш булан машгъул болмагъа чола табыгъыз. Балики, шо – китап охумакъ, чай иче туруп газетге къарамакъ, музейге бармакъ, спортзалгъа юрюмек яда паркда геземек болмакъ бар. Аслусу, оьзюгюз ушатагъан ва кеп алагъан иш булан доланыгъыз.
3. Ругь
Яхшы ишлер этигиз, ят адамлагъа рагьмулу кёмек къолугъузну узатыгъыз. Булайлыкъ Яратгъаныбызгъа ювукъ этгенден къайры, оьзюгюзню насипли гёрмеге ва яшавдан сююнмеге болушлукъ этер.
Оьз гьайыгъызны этмеге багъышлангъан гьар гюнлюк гьаракат гёз алдагъы туманны басылтар, жагьлыкъны артдырар, гёнгюгюзню ачар ва ич гьалыгъызны да, айлана якъны да ёрукълу этер. Увакъ ишлерден кеп алмагъа уьйренсегиз, яшавлукъ масъалалар чечилип болмасдай уллу болуп гёрюнмес. Ондан къайры, ич яшав байыгъажакъ ва Есибизге къуллукъ этив яхшылажакъ. Барыгъызгъа да насип болсун!
