Кёп савболугъуз, аявлу медиклер!
Кёп савболугъуз, аявлу медиклер!
Бусурман рузнамагъа гёре, гьаж битип, гьаж къылгъанлар уьюне къайтгъан вакъти. Гьар йыл сыйлы ерлеге хыйлы халкъ бара. Шоланы арасында кёп докторлар да бола.
Бир эмчилер Сауд Арабстангъа касбусун юрютмек – гьаж къылагъанлагъа кёмек тарыкъ болса, шоланы гьайын этмек учун бара. Башгъалары буса – ибадат учун ёлгъа чыгъа. 16-нчы июнда белгиленеген медиклени гюню бу йыл гьажны вакътисине рас гелди.
Докторланы байрам гюню бу йыл гьаж къылагъан вакътиде болажагъын билеген саялы, «Ас-салам» газетни къуллукъчулары Магьачкъаладагъы бары да медицина идараланы ёлбашчыларын алданокъ чакъырып, къутлама сюйдю. Шатлы жыйын йимик оьтгерилген шо ёлугъувда медицина тармакъда ишлейгенлеге исси сёз кёп айтылды, арив алгъышлар этилди. Хапарсыздан сёз магъа да берилди. Чыгъып сёйлемеге гьазирленмегеним саялы, жыйылгъанланы кепине гелер ва эсде къалар йимик, илиякълы чалынагъан къужурлу сёз айтма къыйын болду. Медиклени барысын да гьакъ юрекден къутламагъа, этеген иши саялы баракалла билдирмеге ва савлукъ ёрамагъа чы болдум. Авур загьматында уьстюнлюклеге етмеге де ёрадым. Амма бираздан, заман гетип, ичимде дилбар пагьмулукъ бирден уянып йиберди ва чыгъып сёйлевде айтылмагъа тийишли исбайы сёз тагъымлар башымда тувду. Гьатта язып сакълама да болмас эдим, алгъышлы сёзлер оюма шонча да ажайып гелди. Неге десе, гертиден де инсан урлукъгъа булай уллу кёмек этеген касбучулагъа разилик билдирмеге, баракалла сёзлер айтып, байрамы булан къутламагъа кёп себеп бар.
Бары да врачлагъа ва медицина тармакъда ишлейген оьзгелеге де биз абур этмеге, гьюрметли янашмагъа ва загьматына рази экенибизни айтмагъа герекбиз. Азарханадан яда поликлиникадан сав болуп чыгъагъандагъы гьислени айтып ачыкъ этмеге къыйын. Онда бизге къарай, гьайыбызны эте, аврувларыбыздан ва къыйыныбыздан эркин эте. Докторну эмли къоллары, ону касбу бажарывлугъу ва гьюнери аврувгъа янгы яшав савгъат эте десе, къопдурув болмас. Авруп сав болгъанлар шону яхшы биледир. Инсанны лап уллу къыйматлыгъы – жаны ва савлугъу. Шо саялы, авруп, сав болгъан сонг, гьар ким де айлана якъгъа башгъа гёзден къарай, яшавну татувун биле ва насип учун инг башлап савлукъ тарыгъын англайгъан бола.
Тегенек чанчылса да, авуртгъаны тегин тюгюл, бир гюнагьдан чайылыв болагъанны кёплерибиз бек яхшы биле. Къаркъара авуртгъаны бир гюнагьдан чайылагъанда йимик бола. Къыйналгъаныкъ гюнагьдан «чаягъанны» биле бусакъ да, авур юкден дагъы да къутулмакъ учун, шогъар чыдама сюймейбиз, чаба туруп докторлардан кёмек излейбиз. Авуртгъан ерибизни «яхшылыгъы» булан Къыямат гюнге гюнагьсыз етишмекни орнунда эмчилерден пайдаланма къаст этебиз. Къаркъарабыз къыйналгъанны сюймейбиз, шондан таба гележекде нечакъы яхшылыкълар гёрмеге болсакъ да. Башгъа ёл булан кюй табарбыз, тек авруп турма бирибиз де сюймейбиз.
Къаркъараны сав этеген докторлар болмагъан эди буса, гьар «тегенек» къыйнап гюнагьларыбыздан чаягъан болмас эди, неге десе башдан гечиреген къыйынлыкълагъа агь уруп, кант этер ва шолайлыкъ булан гьалыбызны оьрчюкдюрер эдик. Эмчилер – Есибизни ниъматы, оьлюмден къайры бары да аврувлардан Ону «дарманы». Белгили йимик, гьар аврувгъа оьз дарманы бола ва медицина тармакъны къуллукъчулары аврувлардан эркин этеген шолай бир себеп.
Аявлу ва гьюрметли докторларыбыз, санитаркалар, медсестралар, ёлбашчылар ва медицинада ишлейген бары да къуллукъчулар, инг башлап оьзюгюз аврумай сав болмакъны ва этеген ишигизге рази къалагъан болмакъны ёрайман. Сонг да, ишигиз болгъанчакъы аз къалгъанны ёрама сюемен.
