Насипли агьлю яшавну уьч яшыртгъын сыры
Насипли агьлю яшавну уьч яшыртгъын сыры
Кёбюсю эргиши ойлашагъан кюйде, оланы къатыны башгъача этмеге болар эди. Амма оьзюнгню алышдырмай туруп, оьзгени алышдырмагъа бажарылмас. Эгер яхшы эр болмакъ учун гьакъ юрекден къаст къылсакъ, чечилмес йимик гёрюнеген масъалалар бара-бара тайып къалажакъ. Эргишини яхшылыгъы къатынны кемчиликлерин ёкъ этмеге ва ондан бийке этме де бажарар.
Яхшы эр болмакъ учун кёмек этеген уьч ёрав бермеге сюемен.
1. Олжагъызны сиз ушатагъан ва шо саялы баракалла билдирмеге болагъан беш хасиятын белгилегиз.
Къатыныгъыз булан биринчи гезик ёлукъгъан кююгюзню ва шо мюгьлетде нени ушатгъаныгъызны эсге алыгъыз. Эгер олжагъыздагъы яхшы хасиятланы алгъа чыгъартып, янгыз шо гьакъда ойлаша турса, ону кемчиликлери аз болуп гёрюнмеге башлажакъ. Шо саялы, бола туруп, айлана якъдагъы янгыз яхшы ишлеге агьамият бермеге уьйренигиз.
Шолай этмеге, озокъда, къыйындыр. Ишдеги гьал, акъча, савлукъ ва шолай башгъа масъалалар бизге уллу таъсир эте ва къарсалав тувдура. Натижада олжабызны кемчиликлерин къопдурабуз ва огъар яман янашагъан болабыз. Шолай гезиклерде яманлыкъны ичигизде сакъламай, янгыз яхшылыкъ булан къалыгъыз.
Къатыныгъызгъа не саялы рази экенигизни гьакъында гьар гюн беш затдан толгъан сиягь языгъыз. Эгер оюгъузгъа бир зат да гелмей буса, шоланы тапмакъ учун башыгъызны ишлетигиз. Гиччи затланы да сан этмей къоймагъыз. Гьар гюн шулай этмеге къарагъыз – олжагъызгъа бакъгъан янашыв нечик алышынгъангъа сонг тамаша болажакъсыз. Ондан да яхшы болур, эгер сиз огъар баракалла сёзлер айтсагъыз ва ону къыйматлыгъын белгилесегиз. Шолай эте турсагъыз, яшав ёлдашыгъызны гёзлери сююнгенлигинден йыртыллайгъанны эс этежексиз ва сонг шолайлыкъ сизге де югъажакъ. Баракалла билдирмек артыкъ болмай ва шону къызгъанмай ачыкъ эте турсагъыз, яхшылыкъ артар, аралыкълар беклешер ва ювукъ болур.
2. Къатынынга акъча бер.
Эргиши къатыны учун аркъа таяв болмагъа тарыкъ. Акъча ёкъ деген даим кантыллав яда маяланы гьакъындагъы артыкъ сёз агьлю яшавгъа яхшылыкъ бермес, къатынны гёнгюн бузса тюгюл. Шолай этмекни орнунда харжларыгъызны гьакъыллы юрютюгюз ва къатынны тилевлерине агьамият берип, ол сюйгенлени танкъыт этмекни де къоюп, англавлу янашыгъыз. Бола туруп «алтын» ортаны тапмагъа къаст этигиз ва, маяларыгъызны да гьисапгъа алып, экигиз де рази болагъан кюйге гелмеге къарагъыз.
Къатыныгъызгъа гелим береген хазнагъа йимик янашыгъыз. Жамият ушутар-ушатмас деп ойлашмай, огъар оьзю ушатагъан савгъатлар бермеге къаст этигиз. Эгер шолай этмек учун имканлыкъ ёкъ буса, гьал алашынгъанда савгъат бермеге сюегенигизни ачыкъ этигиз. Кёбюсю адам негетге де тийишли къыймат бермеге бажара, сюйгени буссагьат бажарылмайгъанны англагъанда. Агьлю учун эри этеген гьаракатгъа къатын герек кюйде агьамият бережекге шеклик ёкъ.
3. Гьакъ юрекден гелеген сюювмю яда: сен – магъа, мен – сагъа?
Хыйлы гезикде аралыкъланы кюрчюсю – яхшыгъа къайтарыш йимик бола. Амма булайлыкъ эр-къатын аралыкъларда, агьлюде яхшы тюгюл. «Сен мени аркъамны хашы, сонг мен сеникин хашырман», – деген янашывгъа «сююв» деген гьис етишмей. Сююв алмакъдан эсе, бермекни артыкъ гёре чи! Шо саялы бу гьис къызгъанчлыкъны чыдамай, чомартлыкъ – кёп болгъан сайын яхшы. Оьзден эргишилер къатынгъа байлавлу оьзлени саламат кюйде тутмагъа бажара ва оьмюр бою олжасын аявлап сакълай. Амма бир-бирде гьислер аз-маз сёне ва бирче яшав уьйренчикли гьалгъа айланмагъа бола. Шолай болуп къалса, баягъы «даш-баш» аралыкълар арагъа чыгъа: сен – магъа, мен – сагъа. Эгер бириси нени буса да этмеге тилесе, къайтарыш гьисапда оьзюне де бир зат буса да тюшер деп гёз къарата.
Шолайлагъа булай ёрав берер эдим: этген яхшылыкъ саялы къайтып гелерге умут этивню къоюгъуз. Оьзденликни юрютюгюз, чомарт болугъуз ва къатыныгъыз юрютеген юкню оьзюгюзге алыгъыз, къылыкъ якъдан тюзелгенигизни гёрсетигиз. Олжагъыз учун кёп этген сайын яшавугъуз енгил болажакъгъа шекленмегиз. Этип къарагъыз, оьзюгюз гёрерсиз. Яшланы школадан алмакъ, къатынгъа бираз яллыкъ болур. Савут-сабаны жувсагъыз (мунда бир осаллыкъ да ёкъ), аш этип къыйын тёкген сонг огъар рагьатлыкъ берир. Гезикге токътатмай ону, оьзюгюз коммунальный тёлевлени этсегиз уллу къуллукъ болур. Заманда-бир уьйге аш гелтиртсегиз, олжаны сююндюрежексиз, рагьатлыкъ да болажакъ огъар. Шулай аз затлар булан къатынны юрегин насипден толтурмагъа бажарыла. Ондан къайры, булай жаваплы янашыв эргишини ожакъ якълавчусу гьисапда белгили этежек. Ол агьлюню тарыкъ-герек булан таъмин этеген де бола, оьзюндеги борчланы толу кюйде кютегенин де гёрсете.
