Хатарбалагьдан Аллагь ﷻ сакъласын
Хатарбалагьдан Аллагь ﷻ сакъласын
Ассаламу алейкум, аявлу охувчулар. Уьюгюзге яхшылыкъ болсун! Хатарлардан Аллагь ﷻ сакъласын ва савлукъ берсин деп ёрав бар ва, гертиден де, шо агьамиятлы алгъыш.
Заманда бир дюньяны ер-еринде от тюшюв, ер тербенив, сув алыв ва оьзге табии балагьлар болагъанны гёребиз. Йылны башында Тюркияда ва Сурияда уллу ер тербенив болду ва хыйлы халкъ оьлдю, гьали-гьалилерде Мароккода ер тербенди, Ливияда сув алыв болду: натижада кёп-кёп адам къырылды. Аламдагъа бютюн бары да зат Есибиз Аллагьны ﷻ пурманы булан болагъанны билебиз ва яшавдагъы къыйынлыкълар да Яратгъаныбыз буюруп бола. Алимлер айтагъан кюйде, табии балагьлар негьакъ болмай, шолар адам урлукъгъа такъсыр гьисапда, терс ёлдан тайышгъанда, гьакъыкъатгъа къайтмакъ учун эс тапдырта. Гюнагьлар саялы, инсанлар шолайлыкъны башына тарта.
Яшавдагъы булай сынавлагъа къаршы болсакъ не этмеге герекбиз? Аллагьу таала къулларына яхшылыкъ ёрай буса, малына ва яшларына, савлугъуна ва бар-барлыгъына сынавлар йибере. Демек, къыйналмакъдан таба, балагьлар гюнагьларыбыздан гечмекге гелтире. Шо саялы, инг башлап яшав барагъан кююбюзге тергев этмеге герекбиз. Аллагьны ﷻ такъсырындан къоркъа бусакъ, шолардан сакъланмагъа сюе бускакъ, яшавубузну Есибиз буюргъан кюйге къыйышдырма герекбиз.
Къылыгъыбыз нечикдир – тергев берейик, агьлюбюздеги гьал нечикдир: яшлар дурус ёлдамы – ойлашып карайыкъ, айлана якъдагъы гьалны кюю нечикдир – шогъар немкъорай янашмайыкъ. Эгер Есибиз Аллагьгъа ﷻ таби болмагъа къаст эте бусакъ, дин буйрукъланы кютюп, гюнагьлардан сакълана бусакъ, гьалыбыз яман болмасгъа умут арта. Озокъда, биз – Аллагьны ﷻ зайып къуллары – бир гюнагь да этмей яшама болмайбыз, тек уллуларын сама да этмесек – шайлы даража. Шо кюйде, яшларыбызны сюйген кююнде юрюме къоймай, арив тарбиялап, оланы гьайын эте бусакъ, жаваплыгъыбызны кютген болурбуз, бу якъдан гюнагь алмасбыз. Сонг да, жамиятда не болуп турагъангъа герти бусурманны юреги аврума герекдир. Динибиз уьйретеген кюйде, къол булан яманлыкъны токътатмагъа, ёкъ этмеге болмайгъан заманда, сёз яда дуа булан сама да къошулмагъа болабыз чы.
Бары да бусурман уьммет бир къаркъара йимик деп айтылгъан ва бир саны авруса, къалгъан яны да шону сезе, биле. Шо саялы, йыракъдагъы дин къардашларыбызгъа болгъан къыйын ишлерде иманыбыз ортакъчылыкъ этмеге чакъыра. Дагъыстандан о якълагъа тарыкъ сурсат йибериле, Аллагь ﷻ къабул этсин! Олар саялы дуа этейик, гюнагьларындан Аллагь ﷻ гечсин деп тилейик, бизин якълагъа балагь гелмесин деп ялбарайыкъ.
Биз яхшы яшайбыз, гюнагь этмейбиз деп алданмагъа да тарыкъ тюгюл. Шолайлыкъ оьктемлик деген башгъа гюнагьгъа гелтирмеге бола. Яхшылыкъгъа ва талайлыкъгъа умут этип, Есибизни алдында юваш, саламатлы, баш ийген кюйде турсакъ, лап гьакъыллы кюй болмасмы дагъы? Бизге болмагъа болагъан лап уллу балагь – иманыбызны, чыдамлыгъыбызны, умутубузну тас этмекдир. Аллагь ﷻ сакъласын шондан.
