Гьаракатгъа – берекет
Гьаракатгъа – берекет
Ассаламу алейкум, аявлу охувчулар. Уьюгюзге яхшылыкъ болсун. Ожакъ толтурагъан яшларыбыз – бизин гележегибиз, шо гьакъда унутмайыкъ, тарбияны гьайын этейик.
Оьсюп гелеген наслуну тюз тарбияламаса, ондан пайда чыкъмас, гьар ким сюйген-сюйгенин этер. Инсан оьсгенде нечик болажагъы аслу гьалда гиччиде алгъан тарбиясындан гьасил бола. Шо саялы ата-анагъа уллу жаваплыкъ салынгъан. Гьар девюрде «къыйынлы заманлар гелген» деп айтыла бола, тек биз яшап турагъан вакъти гертиден де тынч заман тюгюлдюр. Озокъда, яшавлукъ якъдан хыйлы онгайлыкълар бар ва шолардан пайдаланабыз, амма айтмагъа сюегеним – тарбия масъалагъа къыйынлы заманлар гелген.
Бизден уллулар тынч яшамагъан, гьар гюн авур загьмат булан чёрекни гьайын этген ва оланы тарбиясына сёз ёкъ. Башында тарыкъсыз ойлар болмагъан, орам оьлчеме заманы да къалмай болгъан. Авур яшав инсанны къылыгъын чарлата, хасиятларын инсаплы эте. Амма о-бу ниъматлар къыйналмай тюшегенлик адамгъа яман таъсир эте, ону буза. Онгсуз барагъан къылыкъны артындан тарбия етишмей къала, гюн сайын инсанны тюз ёлда сакълама къыйын болуп бара. Шолай не саялы болагъанны англатагъан хыйлы себеп тапмагъа бола, тек билген булан не пайда, артына къошулуп герекли иш этилмей буса?
Яшланы лап гиччи заманындан тутуп яхшыны ямандан айырып болмагъа, гьалал-гьарам не зат экенни мекенли уьйретмеге герекбиз. Дин борчланы гьакъында да яшлагъа етти йыллыкъ чагъындан башлап англатмагъа тарыкъбыз. Аслусу – оьзюбюзню тутагъан кююбюз, этеген ишибиз, айтагъан сёзюбюз олагъа жанлы уьлгю болма тарыкъ. Тарбиялавда къаттылыкъ болмаса болмай. Амма даим таякъ тутуп турса да, яшны оьр къылыкълы этмеге болмасдыр. Адам оьсдюрмек – бир уллу илмудур. Биз оьзюбюз шо илмугъа уьйренмесек, яшларыбызны гьайын этмесек, бизин учун садиклер де, школалар да шо ишни этмес, биздей жанын салып да айланмас.
Орам-орамда къалгъан яшлар да ата-ананы айыбында. Кёплер акъча къазанабыз, уьйню малдан толтурабыз деп чаба, тек ожакъны герти кюйде гьайын этмеге болмай къала. Яшав тез гетип къалагъан зат, дюнья яхшылыкъланы артындан айлана туруп, тангалагъы гюн яшланы тарбиясы герек кюйде этилмегенге, олагъа юрек иссилик берилмегенеликге гьёкюнч болмагъай эди. Яшлардан, олагъа къурдаш болмакъдан, агьлю татувлукъдан эсе мал-матагь артыкъ тюгюлдюр.
Къолдагъы имканлыкълардан къуру къалгъанча, шо гьакъда ойлашсакъ яхшыдыр. Кёп зат бизден гьасил бола. Сюйсек, гьаракат этсек, хыйлы яхшылыкъны артына чыкъмагъа боларбыз, Аллагь ﷻ буюрса.
