Къылыкъланы яхшылашдырмагъа арив заман
Къылыкъланы яхшылашдырмагъа арив заман
Ассаламу алейкум, аявлу охувчулар, уьюгюзге яхшылыкъ болсун. Пайхаммарыбыз ﷺ тувгъан, бизин учун айрыча сюйкюмлю раби уль-аввал ай да гете тура. Оьтгерилген мавлетлени Аллагь ﷻ къабул этсин.
Шу гюнлерде кёп сюеген, аявлу Пайхаммарыбызны ﷺ гьакъында хыйлы зат айтылды, ону яшаву янгыдан эсге салынды, этилген ишлери ва сёзлери дагъы да, дагъы да такрарланды. Насигьатны къабул этегенлер, яхшылыкъны юреги булан алып, айтылгъанны эшитмеге сюегенлер ажайып пайда алгъандыр. Гертиден де, бу айны ичинде хабарланагъан асил ишлер инсанны къылыкъларын яхшылашдырмакъ учун бакъдырылгъан. Айтылгъанны эсде сакъламай, сонг унутуп къалмакъ дурус болмас. Есибиз яратгъан лап да яхшы адамны гьакъында билгенде, ону хасиятларын гёз алгъа гелтиргенде, шогъар ошамагъа къарамакъ деген ой ичибизде хозгъалмаса, жыйынларыбыздан, мажлислерибизден не пайда болсун?!
Не иш юрюте бусакъ да, Пайхаммар ﷺ бизин учун мунаман дегенлей тетиксиз уьлгю. Йылдан-йыл шу вакътилерде Расулуллагьны ﷺ бир хасиятын сама да айырып, шону яшавубузгъа гийиртмеге къарасакъ, нечик арив болур эди! Озокъда, биз нечакъы гьаракат этсек де, Пайхаммарны ﷺ даражасына етишмесбиз, тек огъар ювукъ болмакъны гьайын этсек, кемчиликлерибизни ёкъ этеген тюз ёлгъа тюшсек, яхшы амаллардан къуру къалмасбз, Аллагь ﷻ буюрса. Пайхаммар ﷺ булан даим оьзюн тенглешдирген адам, этген яман ишлерине уялып болагъанлар кётюр болмас деп эсиме геле. Шолай адам оьзгелер сукъаланардай исбайы къылыкълы болур. Гьакъ кюйдеги бусурманлар, оьзгелер оьзлеге ошамагъа сюеген гьалдагъы, шолай адамлар чы!
Гьали-гьалилерде Францияда гёзге илинмесдей болгъан иш шолайлыкъны арив суратлай. Бир гезик о якъдагъы гиччи шагьарны авул межитине белгисиз уланъяш гирип, имамгъа: «Мен Къуръан охумакъ учун уьйренмеге сюемен», – деп билдире. Имам да сююнюп: «Сени ким йиберди мунда?» – деп сорай. «Анам», – дей ол яш. «Къайдадыр ол?» – деп имам билмеге сюе. «Ол къыр якъда, бусурман тюгюл саялы межитге гирмеге сюймей», – деп яш бар кююн англата. Имам тамаша болуп, орамда турагъан шо къатынны табып, ол не учун яшын булай йибергенин билмеге сюе.
«Мени хоншумда бусурманлар яшай, оланы яшлары гьар гюн уьюнден гетегенде анасыны къолун оьбюп гете. Бизин учун бу ажайып гьал. Олай да, мен бирт де гёрмегенмен бусурманлар ата-анасын къартлар учун хас уьйлеге тапшуруп ташлайгъанын. Мени авлетим магъа лап шолай янашгъанны сюемен, къарт болгъанда буса, янгыз къалма да сюймемен. Шо саялы уланым бусурман болгъанны тюз гёрдюм», – деп яшны анасы болгъан ишни англата. Гёресиз, герти бусурманланы яшавуна адамлар нечик сукълана! Айсениликни къоюп, къаст къылсакъ, биз де болабыз чы, Аллагьны ﷻ разилигин къазанардай, Пайхаммарны ﷺ ёлу булан юрюмеге.
