Уьйге эсен-аман къайтмакъ – уллу насип

Ассаламу алейкум, аявлу охувчулар. Уьюгюзге яхшылыкъ болсун. Гьаж къылып гелгенлени яшавундагъы бу лап агьамитлы сапары булан къутлайбыз, этген ибадатын Аллагь ﷻ къабул этсин деп ёрайбыз.

Булай алгъанда, гьар инсан оьмюрюню ичинде кёп сапарлар эте, йыракъ ерлеге чыгъа ва сонг гери къайта. Гьар уьюне эсен къайтыву буса, ким учун да уллу яхшылыкъ ва шо саялы Есибиз Аллагьгъа ﷻ шюкюрлюк билдирмеге яхшы болур. Ювукъ адамыбыз сав-саламат кюйде гери къайтгъангъа, огъар къарап къалгъан биз де, Яратгъаныбызгъа разилик билдиребиз, шюкюрлюк этебиз. Гертиден де, ёл чыкъмакъ – гьамангъы яшавдан къалышына, не де болмагъа болагъанлыкъ юрекни рагьат къоймай, ата-ана яда авлетлер къулакъ салгъан кюйде тура.

Шо саялы, бары да къыйынлыкълардан оьтгенде, мурадына гёре ишлерин кютюп ожагъына къайтгъанда, агьлю учун гиччи байрам бола. Ал заманларда шо сюнч булан къутламагъа савлай юрт геле болгъан.

Сапардан къайтгъан адам ватанына бакъгъан сююв гючленгенни сезе, агьлюсюн бирден-бир ювукъ гёре, аралыкълар сыкълаша ва шо саялы Есибизге дуа этмек – динибиз арив гёреген ишлерден болур.

Гьаждан къайтгъан адам буса, къыркъ гюн этген дуасы къабул болмай къалмас деп санала, неге десе сыйлы ерлерде бары да тийишли борчланы кютген адам гюнагьларындан чайылгъан гьалда бола. Таза адам тилегенни Есибиз гери къайтармай деп айтыла.

Гьаждан гелеген гиши дуасын уьюне гиргенче этсе дагъы да яхшы бола, неге тюгюл ожагъына гиргенче ол сапардагъы адам санала. Янгы тувгъан яшдай гюнагьларындан арчылгъан гиши, ювукъ адамлары учун алгъышлар эте, гюнагьлары чайылсын деп Яратгъаныбыздан тилей, иманын беклешлирмекни де унутмай.

Гёресиз, бусурман адам гьар ишинден нечик пайдаланмагъа бола! Яратгъаныбыз шу дюньяны биз Ону буйрукъларын кютеген кюйде яратгъан ва биз таза негет булан Есибизни гьызындан чыкъмай яшамагъа болсакъ, шабагъатдан къайрыны гёрмесбиз.

Шо саялы ахырат учун «мал» жыймагъа сюе бусакъ, динибизни ахтармагъа, нечик яшамагъа герекни билмеге герекбиз. Шолайлыкъ булан сапардан да ажайып пайда алмагъа боларбыз.

Ёл чыкъмакъ сынав санала ва Есибиз мунда бир-бир енгилликлер берген бизге. Масала, намазларыбызны бир-бирине тийдирмеге ва къысгъартып къылмагъа болабыз, ораза тутмай къоймагъа ихтиярыбыз да бар. Айтагъаным, сапар иманы бар гиши учун тегин зат тюгюл. Гьар абатыбызгъа шабагъат алмагъа болабыз, аслусу – ёлубуз гьалал ва негетибиз дурус болмагъа герек.