Аллагьдан ﷻ къоркъув болмакъ аслусу
Ассаламу алейкум, аявлу охувчулар, уьюгюзге яхшылыкъъ болсун. Оьтген Уллу байрамыбыз булан къутлай туруп, Есибиз Аллагь ﷻ этген къурбан садагъаларыгъызны къабул этсин деп алгъыш этемен.
Бусурман адам гьар этеген ишин билип, англап, негетин тюз токъташдырып этмеге герек. Юрекде Аллагьдан ﷻ къоркъув болса, оьзге янлар тюзелип къалажакъгъа шеклик ёкъ. Шо бары да затны кюрчюсю. Ону англамайгъанлар ёкъдур. Динибиз де шогъар уьйрете. Демек, гьар муъмин Яратгъан Есибизден къоркъуп, Аллагьны ﷻ къаравуну тюбюнде экенин сезе туруп яшав къурса ва гьар абатын шолайлыкъны унутмай этсе, айлана якъ чечекленер эди. Бары да яхшылыкъланы тюп кюрчюсю – юрекде Аллагьдан ﷻ къоркъув болмакъ. Шолайлыкъ ойдан таймаса, юрекде яшаса, бусурман адамны къаркъарасы да, жаны да, ругьу да оьр даражалагъа етер эди. Аллагьдан ﷻ къоркъув болмаса, пайда ёкъ.
Неге десе, инсан урлукъда шолай тогъас болмаса, не яманлыкъ да арада яйыла. Адамны битими шолайдыр, бир къоркъув яда такъсыр болажакъны билмесе, йиберилип къалмагъа амракълыкъ бары. Гьарибиз юрекде Аллагьдан ﷻ къоркъув болмагъа герекни англайбыздыр, мунда англашылмайгъан зат ёкъ. Масъала башгъа якъда деп эсиме геле. Нечик шо къоркъувну юрекде болдурмагъа герек? Инсан Аллагьдан ﷻ къоркъагъан болса, гюнагь иш этмекден сакъланар ва арты булан ругь якъдан оьсер. Къуръан аятлар ва Мугьаммат Пайхаммарны ﷺ сюннети къылыкъларыбызны яхшы этмеге ва юрекде Есибизден къоркъув болдурмагъа чакъыра. Муна бу якъгъа агьамият берип, чалышмагъа герек. Не этип шолай таза муъмин болмагъа бола?
Ибадатгъа берилип, башгъа муратлар болмай, янгыз бир Аллагьны ﷻ разилигн къазанмакъ болмагъа тарыкъ. Шо тынч ёл ва тез болагъан иш тюгюл. Гьар гюн оьз-оьзюбюзню тергеп, этген ишлерибизге багьа берип уьйренмеге тарыкъбыз. Ялгъанны къоюп, даим герти айтмакъ шо муратгъа етишмек учун бек агьамиятлы. Шо гьакъда Умар асгьаба айтгъан булай сёзлер эсге геле: «Мени учун гертини айтып, менлигин таптагъан къолай, ялгъан айтып оьрлюклеге етишгенче». Ойлашып къараса, терен маъналы сёзлер. Есибиз Аллагьгъа ﷻ шюкюрлюк этив, юрекни тюз ёлда къатдырагъан мердеш. Бары да зат Рагьмулу Аллагьны ﷻ пурманы булан бола ва бар-барыбызгъа разилик билдирмеге болсакъ, ялгъан къыйматлыкълардан сакъланмагъа болурбуз. Гьалиги заманда адашмагъа нече де тынч болгъан. Шону учун билим болмагъа тарыкъ, дарс береген муаллим бизин учун ёл гёрсетивчю, аман сакъланмакъны белгиси.
Ругь ёлбашчыбыз буса, дагъы да бек агьамиятлы ва тарыкълы. Юрек аврувдан сав этегени булан, ол Аллагьдан ﷻ къоркъув гьислени тувдура ичибизде. Ол айланабыздагъы адамланы лап яхшысы, гьатта ону гьар гюн гёрмесек де. Оьзге заман Аллагьгъа ﷻ ювукъ адамлар булан къатнасакъ, олар булан ювукълукъ юрютсек, бара-бара олагъа ошайгъан болурбуз. Негьакъ тюгюл чю гьар ким де оьз айланасы йимик бола деп айтагъаны. Бусурман дин къардашыны якълавчусу, огъар яман сёз атмагъа къоймас, оьзю де шондан арек. Айтдыкъуйтду иманы барлагъа къыйышагъан зат тюгюл. Ойлар таза болса, ишлер де къыйышывлу болур. Кёбюсю гезикде адамлагъа авзудан геле балагь.
Бир-бирде: «Башына гелмейгенни айтмай къоймакъ шонча да къыйынмы?» – деп ойлаша туруп къаласан. Кюйге къарагъанда, биревлер учун шо, гертиден де, тынч масъала тюгюл. Нечакъы айтылса да, айып этилсе де халкъ гишини башын сёйлевню къйомагъа сюймей яда болмай. Юрекде Аллагьдан ﷻ къоркъув ёкълукъдандыр шо да. Булай алгъанда, етмеге болмасдай иш тюгюл чю: адамланы авадан яны уллу гюнагьлар этмейдир, гиччилерине енгил янашып къала. Муна гьар ишде «айсенилик» тайса, шо заман иман таза болмагъа, юрекде Аллагьдан ﷻ къоркъув да хозгъалмагъа башлар. Гьар бусурман гишиге Есибиз иманын беклешдирсин, юрекде Аллагьдан ﷻ къоркъув салсын
