Сыйлы айланы сююп къаршылайбыз
Ассаламу алейкум, аявлу охувчулар! Заман чалт гетегенин сыйлы айлар башланагъандан да гёребиз. Олар унутулуп битмесдей тамаша кюйде оьтген эди гетген йыл, энни сююнч булан муна янгыдан гелди бизге.
Шолар бу йыл гьамангъы кюйде оьтер ва артында болажакъ уллу байрамыбыз да шатлыкъ гелтирежек деп юреклерде умут бар. Гертиден де, гьакъ кюйде Аллагьны ﷻ айларына, байрамлагъа, бир-бирев булангъы къатнавгъа сагъынгъанбыз.
Бусурманлар учун ба вакътилер олай да агьамиятлы, амма артдагъы заманлардагъы гьал, яйылгъан аврувну таъсири, яйнап гелген сыйлы айларыбызны, шо девюрлер битер деген ой булан къаршылап, жанларыбызны бирден-бир ругьландыра. Барны хадирин тас этгенде биле деп айта чы. Шолай, биз де кёп затланы хадирин де, маънасын да билеген, адатланып къалгъан ишлеге янгы гёзден къарайгъан болдукъ. Есибиз Аллагь ﷻ заманда бир бизге эс тапдырда! Шо саялы къысмат булан не гёрсек – шону къарсаламай къабул этмек ва, озокъда, бар-барыбызгъа шюкюрлюк билдирмек бизин учун лап яхшы болур.
Гьар къыйынлыкъдан сонг тынчлыкъ геле. Бизин учун да шолай енгилликлер башлана деп умут этебиз. Ражаб айны къаршылап, Есибиз ушатагъан кюйде шону йибермеге болсакъ, къалгъан яны да арив гетер, Аллагь ﷻ буюрса. Демек, ораза тутув, межитлерде намаз къылыв ва оьзге ёллар булан ибадатны камил этмеге къаст къылсакъ, шо енгилликлени ювукъ этербиз, оьзюбюзге багъып тартарбыз деп инанмагъа сюебиз.
Гертиден де, аста-аста гьал яхшы янгъа багъып алышына бугъай деп гьис этиле. Бир-бир дазулар, гери урувлар тайдырылгъан, башгъалары да таяжакъ деген хабарлар юрюле. Яшав алдагъы ерине геле турагъанда бираз ойлаша туруп къаласан. Оьтген сынавлар бизин учун не йимик буса да пайдалы дарс берирми яда болду-гетди дегенлей бир зат да алышынмасмы? Айтагъаным, гёргенлерибиз хыйлылар учун яшавгъа къаравларын, даимликни гьакъында терен ойлашагъан этгендир. Гьалиги бизин бу гьалыбыз хатаргъа тюшюп гьарангъа сав къалгъан адамдай. Бирлер ажжалы ювукъ болуп, гьакъылын жыймагъа, къылыкъларын, ишлерин, ойларын яхшы этмеге, шюкюрлюк ва товба этив булан бютюнлей алышынмагъа эс таба. Амма бир-биревлер буса: «Гьали бир зат да болмай къутулдум, энниден сонг эсен-аман болажакъ», – деген ялгъан умутлар булан алдагъы гьарай-гьурай, кеп чегив, йыбав булан яшав «сюрювню» узата, гетип барагъан оьмюрден леззет алмагъа алгъасай.
Алышынып яхшы болмакъны яда бар кююнде къалмакъны гьар ким оьзю сайлай, тек башдан гечиргенлери негьакъ болмас бирев учун да.
