Яхшылыкълагъа умут артагъан гюнлер
Ассаламу алейкум, аявлу охувчулар, уьгюзге яхшылыкъ болсун. Оьзге къутлавлагъа къошулуп, редакцияны атындан мен де сизин уллу шатлыкъ – Ораза-байрам булан къутлайман, тутгъан оразагъызны Аллагь ﷻ къабул этсин!
Бу сатырланы язагъанда ораза айны «къызгъын» вакътиси эди, байрамгъа бираз заман къалгъан, тек буса да эс этилеген яхшы гьислер юрекни бийлей. Гертиден де, ораза айда тувагъан умутлар адамны ругьун гётере. Рамазан битгенче де ондан сонг болажакъ яшавубузну гьакъында кёп ойлашагъан болдукъ, артдагъы йыл болгъан ишлер шо ойлагъа айрокъда таъсир эте. Оьз-оьзюбюзню алдатабыз деп тюгюл айтагъаным, аста-аста алышынывлар яшавгъа гирип бара. Бизден гьасил болмайгъан ишлеге ойлашып, къыйналып турмагъа тарыкъ тюгюлдюр. Бусурманлар бары да зат Есибиз Аллагьны ﷻ пурманы булан болагъанны биле, къадарыбыз шолай. Амма амалларыбызны яхшы этмеге чи болабыз ва борчлу да дюрбюз. Инг башлап оьзюбюз учун.
Ашдан, сувдан «къуру къалып» ачланы гьалын сезебиз, бар-барлыгъыбызны хадирин билмеге башлайбыз. Юрекде языкъсыныв тува, оьседир, айлана якъгъа башгъа гёзлер булан къарала. Шо кюйде оразаны башгъа яны да бар. О да – къылыкъланы яхшы этмек, ибадатгъа гьакъ юрекден берилмек. Къуръан охув, жамият булан болув, ораза ачыв, болагъан кююнгде садагъа этив юрекни йымышатмай болмас. Оразаны шо эки де янын ичибизде эсен-аман сакъламакъ энни алдыбыздагъы масъала. Гьар ким болагъан кююнде шогъар етмеге къаст къылагъангъа инанмагъа сюесен. Тынч болажакъ зат тюгюл, озокъда. Шогъар гёре хыйлы ёравлар да бериле. Шоланы бирлери газетибизни бу номеринде де бар. Динибиз уьйретеген бары да яхшылыкълар рамазан айда къаркъарабызгъа сингип къалагъандай бола. Гьали аслусу – шо гьалны сакъламакъ. Дуа этмек, токътамай товбагъа тюшмек, даим Аллагьны ﷻ эсгермек, таза къылыкълы бусурман адамланы арасында кёп болмакъ, охуп билим алмакъ – шо ёлну сокъмакъларыдыр.
Белгили йимик, аз буса да, тек арты уьзюлмей этилеген къайсы гиччи иш де заманда бир этилеген аслам ишден артыкъ. Шо да бизин учун насигьат, гьар гюн таймай, къоймай не йимик бир яхшы амалны юрютмек. Аллагь ﷻ буюрса шолай этмеге болсакъ, гьалыбыз ёравлу болур. Беш намаз гюнюбюзню ёрукълу этегендей, шо кюйде башлагъан янгы гьаракатыбыз да мердешге айланып, хасиятыбызны яхшы якъгъа бакъдырар ва бош заман йиберивден сакълар. Рамазан айда башлангъан яхшылыкълар, токътамай йылны къалгъан айларында да юрюлмеге Аллагь ﷻ насип этсин бизге ва аз буса да яхшыгъа алышынмагъа болгъан бусакъ, шо да гелеген ораза айгъа сакълансын. Амин.
