Аллагьны ﷻ эсгереген мажлислер

Гьар бусурман адам Аллагьу тааланы разилигин къазанмагъа гьаракат эте. Биревлер кёп ораза тута, башгъалар гечелер сюннет намазлар кёп къыла, башгъалар ону да, муну да бирче эте. Чомартлар пакъыр яшайгъанлагъа кёмек къолун узата, билегенлер илмусун яя. Гьасили, бу ёлну танглагъанлар учун имканлыкълар аз тюгюл. Абдуллагь бин Раваха дейген Пайхаммарны ﷺ белгили асгьабасы кёп эте болгъан шолай бир ишни гьакъында тёбенде язмагъа арив гёрдюк.

Абдуллагь бин Раваха Яратгъаныбызны эсгереген мажлислени нече де бек сюе ва шоларда ортакъчылыкъ эте болгъан. Ол уьйден чыгъагъанда Аллагьны ﷻ эсгереген ерлени излей ва тапса, башгъаланы да шогъар чакъыра болгъан. Ёлунда башгъа бир асгьаба ёлукъса, Абдуллагь бир Раваха u: «Бир сагьатны Аллагьны ﷻ эсгерип йиберейик», – деп чакъырыв эте болгъан. Демек, бу адам Аллагьны ﷻ эсгеривюн бек агьамиятлы ишге санагъан.

Шолайлыкъда, Абдуллагь бин Раваха бир гезик башгъа асгьабаны гёрюп, огъар да Аллагьгъа ﷻ багъышлап бир сагьат йибермекни таклиф эте. Амма ол Раваханы сёзлерин ушатмай ва Пайхаммарны ﷺ янына барып: «Гьей, Расулуллагь ﷺ, Абдуллагь бин Раваха этеген ишлени гёрмеймисен? Ол чу сен уьйретеген затлардан бизин заманыбызны ала», – дей. О заман Пайхаммар ﷺ булай айта: «Есибиз Аллагь ﷻ бин Раваха булан рази къалсын ва рагьмулугъун яйсын огъар. Бу адам Аллагьны ﷻ оьр этмеге ва макътамагъа сюе. Ол оьтгереген мажлислер булан гьатта кёкдеги малайиклер де оьктем бола».

Аявлу къардашлар, гёресиз бу асгьабаны юрегиндеги Аллагьны ﷻ сюювю ону гьакъында нечик айтдырта! Пайхаммарны ﷺ сёзлеринден ачыкъ болагъаны йимик, Есибизны макътамакъ, оьр этмек малайиклени оьктемлигин тувдура. Биз де шолай яхшы къуллардан болмагъа къарайыкълар ва Аллагьны ﷻ эсгермеге, макътамагъа къаст къылайыкъ. Яратгъаныбыз яман жыйынларыбызны яхшыларына айландырсын ва Аллагьны ﷻ эсгереген мажлислени кёп оьтгермеге бизге гюч де, гьакыл да берсин деп тилеймен.

МАГЬАММАТГЬАБИБ САЙИДОВ