Намаздан сонг ва башгъа заманда охулагъан дуа
Дуа – бусурманны савуту экенни билебиз. Оьзге ибадат йимик, ону къоллайгъан, этеген кюю де бар. Озокъда, гьар ким болагъан, билеген кююнде, оьз тили булан этмеге бола, Есибизге бакъдырылгъан тилеклерин, дуасын. Тёбенде язылгъан дуаны къайдасы буса, гьар кимге де пайдалы болур, неге десе Есибизге бакъдырылгъан алгъыш тюз болмакъ – дуа къабул боларны, яшавгъа чыгъарны умутун артдыра.
Алгьамдулиллягьи раббиль ‘алямин. Аллагьумма салли ‘аля Мугьаммадив ва’аля али Мугьаммадив ва саллим.
Йа Аллагь ﷻ , мен къылгъан намазларымны, тутгъан оразаларымны, охугъан зикирлени ва гьар бир этген яхшы амалларымны къабул эт, Есим. Гюнагьларымдан геч, гюнагьларымны яманлыгъындан Сен сакъла, уллу балагьлардан, ахыратны азабындан, мени эсгик этеген къылыкълардан, магъа зарал этеген къурдашлардан, Сенден гъафул этеген умутлардан, Сени унутдурагъан ярлылыкъдан, мени гьалек этеген байлыкъдан, Сен сакъла Аллагь ﷻ !
Йа Аллагь ﷻ , Сен магъа Сени сыйлы къулларынга берген сыйлылыкълардан бер ва мени Сени ачувунгдан сакъла, Къыямат гюн къарамай къоягъанлардан да этме!
Йа Аллагь ﷻ , Сен мени оьлегенде муъминлерден эт ва муъминлерден этип тургъуз. Аллагьым ﷻ , азабынгдан сакъла ва Сени рагьматынг булан къурша.
Йа Аллагь ﷻ , мен сав чакъы шу дуньяда Сен мени сакъла, оьлген сонг гюнагьларымдан геч, рагьмулу бол!
Йа Аллагь ﷻ , Сен мени жанымны ал герти иман булан, шагьадатны калималары булан, имансыз гетип къалмакъдан Сен сакъла, Аллагь ﷻ !
Йа Аллагь ﷻ , дюньяда балагьлардан сакъла, ахыратны азабындан да сакъла, эки де дюньяда талайлылардан эт, Аллагь ﷻ !
Йа Аллагь ﷻ , Сен рази болагъан къылыкъланы ва билимни бер, Сагъа ортакъчы тутмай ибадат этеген яшавну бер!
Йа Аллагь ﷻ , амалларымны тазала, къабул эт, юрегимни тазала, гёз амалдан, тилимни ялгъандан, гёзлеримни гьарамдан да Сен сакъла!
Йа Аллагь ﷻ , Сенден тилеймен иманны, савлукъну, гертиликни, яхшы къылыкъны, адамлар булан къыйышмакъны ва Сени къадарынга рази болмакъны насип эт!
Йа Аллагь ﷻ , Сен тавпикъ бер Сен сюеген амалланы этмеге, яманларындан таймагъа, Сагъа таянагъанлардан эт ва Пайхаммарны r сюннетин юрютегенлерден эт!
Йа Аллагь ﷻ , Сен мени яратгъан Есимсен, Сенден оьзге худай (илягь) ёкъ, мен Сени къулунгман, гючюм бар чакъы Сени ёлунгдан чыкъман. Яратгъаным Аллагь ﷻ Сагъа таянаман, мени гюнагьларымдан, яманлыгъымдан геч! Гюнагьларыма мюкюрмен ва Сени рагьматынга да умут этемен!
Йа Аллагь ﷻ , гюнагьларымдан геч, Сенден къайры гюнагьлардан гечеген гьеч бирев ёкъ, атаанамдан геч, агъа-инилеримден, къызардашларымдан, агьлюмден, тайпа-тухум къардашларымдан, муъмин-муъминатлардан, муслиммуслиматлардан ва бары да бусурман агьлюлерден де геч, Аллагь ﷻ !
Йа Аллагьым ﷻ , Сен бизге бу дюньяда да яхшылыкъ бер, ахыратда да яхшылыкъ бер ва жагьаннемни азабындан да бизин къутгъар! Гьей юреклени айландырып къоягъан Аллагь ﷻ , Сен мени юрегимни, Сени динингни уьстюнде токъташдыр! Мен Сагъа да разимен, Аллагь, Ислам динге де разимен, Пайхаммаргъа да разимен! Алгьамду лиллягьи раббиль ‘алямин, Аллагьумма салли ‘аля Мугьаммадив ва ‘аля али Мугьаммадив васаллим. Бигьурмати сирри суратиль фатигьа. Артыданда «Аль-Фатигьа» сура (Алгьам) охула.
АРСЛАНАЛИ-ГЬАЖИ МОЛЛАЕВ,
ЯХСАЙ ЮРТНУ ИМАМЫ
