Лап уллу гьюнагьланы бириси

Бусурман адам динин ахтармагъа ва шону булан не затдан сакъланмагъа, гери урулагъан ишлени яхшы кюйде билмеге герек. Белгили йимик, уллу гюнагьлар бар ва Ислам динде авурлугъуна гёре зина уьчюнчю ерде. Бугюн шо масъалагъа гёре айтмагъа сюйдюк.

Саякъ юрюмек шонча да яман иш, уллу гюнагь, гьатта лап уллу гюнагьланы арасында. Биз билеген кюйде, лап уллу гюнагь — Аллагьгъа ﷻ ортакъчы тутмакъ, экинчиси — адам оьлтюрмек, уьчюнчю зина геле. Ойлашып къарагъыз, адам оьлтюрмекден сонг зина геле! Есибиз Аллагь ﷻ шо гьакъда Къуръанда булай айта (маънасы): «Сиз зинадан сакъланыгъыз ва шогъар ювукъ да болмагъыз, гертиден де, зина эдепсиз ва яман эрши ишлерден» («Аль-Исраъ» деген сура, 32-нчи аят). Яратгъаныбыз бу аятда зина этмегиз деп айтмай, ювукъ да болмагъыз дей! Бу уллу гюнагьгъа ювукъ этеген ишлер недир? Гьалиги заманда, гьай аман, зинагъа элтеген, огъар батмагъа хыйлы тынч имканлыкъ бар. Шоланы арасында телефон, интернет ва оьзгелери.

Шайтан буса огъар «сююв» деген арив ат да тагъып адамланы башын чырмамагъа ажайып ёл тапгъан. Есибиз гьарам этген затларда, адамланы оьзлерине ва агьлюсюне зарал барны билмеге герекбиз. Зинадан тюрлю-тюрлю яман аврувлар югъа ва ожакълар бузула. Гюнагь иш этмек агъу ичмекден ямандыр, неге десе агъулангъан адам шу дюньясындан къуру къала буса, гюнагь иш этмек булан ахыратындан ва даим къалагъан женнетни ичиндеги ниъматларындан магьрюм къала. Зина этеген адамгъа болгъан бир нече балагьланы эсгермеге сюемен. Инг башлап шо гюнагьны юрютеген адамны берекети болмай. Олар эки де дюньяда Аллагьны ﷻ ачувуну тюбюнде ва гьисапсуал къыйын гьалда оьтежек. Абу Умама Аль-Бахили гелтирген булай гьадис бар: «Бир керен Пайхаммаргъа ﷺ бир гиши гелип булай айтды: «Гьей Аллагьны Элчиси ﷺ , сен магъа зина этмеге ихтияр бер». Асгьабалар булай биябурлукъну эшитип, уьстюне чапгъан. Пайхаммар ﷺ шоланы токътатмагъан буса оьлтюрежек болгъан.

Пайхаммар ﷺ огъар саламат кюйде гьалны булай англата: «Сен сюерми эдинг шо ишни сени ананг яда къызынг ва къатынынг булан этгенни?» Ол адам: «Сюймес эдим», – деп жавап бере ва, гертиден де, зина эрши ва яман иш экенге гьакъ кюйде тюшюне ва шону дагъы этмесни билдире. Гьалиги заманда буса, шо балагьдан сакъланмагъа айрокъда бек тарыкъ, неге десе шогъар элтеген ёллар нече де тынч болгъан. Инг башлап аталагъа чакъырыв этер эдим. Сиз бугюн къызларыгъызны къолуна телефон да берип, башын-санын да ачып къойгъансыз, тангала Къыямат гюн шолайлыкъ сизин жагьаннемге тебережек. Сизин къызларыгъыз эрге чыкъмай туруп, Аллагьны ﷻ алдында сиз шолагъа жаваплысыз. Сиз жагьеннемни азабына чыдырман деп ойлашмагъыз, алданмагъыз. Жабрайыл малайик Пайхаммаргъа ﷺ жагьаннемни суратлай туруп булай айтгъан: «Гьей Мугьаммат ﷺ , жагьаннем о бек къарангы ер, инени тешиги чакъы. Жагьаннемни отун бу дюньягъа йиберсе, бу дюньяда бары да затны яллатажакъ. Жагьаннемни опурагъын кёкню ва ерни арасына илсе, шондан гелеген ийисге бары да жаны бар зат оьлежек. Жагьаннемни терегинден бу дюньягъа «закум» деген бир гиччи гесек ташласа, бары да ашамлыкълар бузулужакъ. Аллагь ﷻ Къуръанда эсгерген 25 малайикден жагьаннемге къарайгъан, бирисин адамлагъа гёрсетсе, бары да адамлар оьлежек. Жагьаннеми шынжырларындан бир шынжырны ташласа, бу бизин дунья бузулажакъ». Сонг Пайхаммар ﷺ : «Таман», — деп йылагъан, арты булан Жабрайыл u да йылагъан.

Пайхаммар ﷺ огъар: «Сен негер йылайсан? Сени чи Аллагьны ﷻ янында уллу даражанг бар», — деп сорагъан. Жабрайыл u: «Гьей Мугьаммат ﷺ , мен билмеймен шу даражада Аллагьны ﷻ янында къаламанмы яда Аллагь ﷻ мени де сынажакъмы, Харут Марут ва Иблисни сынагъан йимик». Гёресиз, шолай уллу малайик де къоркъуп йылай болгъан, биз нечик йылама тарыкъбыз олай болгъан сонг?! Бир эргишини арив ят тиштайпа зина этме чакъырса, шо заман эргиши: «Мен Аллагьдан ﷻ къоркъаман», — деп айтса, шо уьч сёз Къыямат гюн Аршны салкъыныны тюбюнде турмагъа таманлыкъ эте. Бир керен Жабрайыл u ва Микайыл u гелип, Пайхаммаргъа ﷺ булай айтгъан: «Жагьаннемни ичинде бир печ бар, шону ичинден яман къычырагъан тавушлар геле. Биз шонда къарадыкъ, о олай печ, башы тар тюбю генг, ону ичинде ятгъан ялангач эргишилер ва тиштайпалар. Тюбюнде яллайгъан от, шо биз эшитген тавушлар шоланы тавушлары. Оланы гётереп янгыдан ташлап яллатып тура.

Пайхаммар ﷺ : «Гьей Жабрайыл u о адамлар кимлердир?» — деп сорагъанда, ол: «Олар зиначылар», — деп жавап берген. Шо печден гелеген яман ийисден жагьаннемни ичиндегилер де къыйнала». Зина деген зат о бир иш, ким шону этсе шо къайтып шогъар геле. Мени сёзлерим тюгюл, бизин мазгьабны имамы Аш-Шафиини сёзлери: «Сиз зина этмегиз ят тиштайпалар булан, ят эргишилер сизин тиштайпалар булан да этмежек». Бирдагъы бир эс тапдырагъан гьадис бар: «Адам зина этеген заманда, шону иманы чыгъып, башыны уьстюнде, гёлентги йимик тура. Адам товба да этип ва шо гюнагьгъа дагъы къайтмажакъгъа негет этсе, иманы къайтарып шо адамгъа гире» (Абу Давуд, Тирмизи, Гьаким). Бир керен Умар асгьаба Пайхаммарны ﷺ янына йылай туруп гелгенде, Расулуллагь ﷺ : «Сен негер йылайсан?» — деп сорагъан. Умар булай англатгъан: «Гьей Аллагьны Элчиси ﷺ , сени эшигингни алдында бир яш улан бар, шо йылайгъанны гёрюп языгъым чыгъып йылайман». Пайхаммар ﷺ ихтияр берип, ол яш улан гирип геле.

— Сен негер йылайсан? — деп Пайхаммар ﷺ сорай огъар.

— Гюнагьым уллу экенге йылайман.

— Сен ширк этгенмисен дей?

— Этмегенмен.

— Адам оьлтюргенмисен? — Оьлтюрмегенмен.

— Аллагь ﷻ гече сени, — деген Пайхаммар ﷺ .

— Мени гюнагьым уллу, гьей, Расуллуллагь ﷺ .

— Арш, Курс уллуму яда сени гюнагьынг ?

— Мени гюнагьым уллу.

— Аллагьны ﷻ рагьмусу уллуму яда сени гюнагьынг?

— Аллагьны ﷻ рагьмусу уллу.

— Айт не гюнагьынг бар?

— Мен уяламан, гьей Расулулллагь ﷺ . Сонг айтма башлагъан: «Мен оьлген адамланы гёмгенде къазып опуракъларын, алтын ва гюмюшлерин алагъан адамман. Бир керен яш тиштайпаны гёмдю, мен шо гече барып къазып чыгъардым, бары да затын алдым, сонг шайтан арагъа гирип шо сюек булан мен зина этдим. Сонг мен гетме айлангъанда Аллагьны ﷻ гючю булан шо тиштайпа турду ва магъа булай айтды: «Адаршай болсун сагъа, сен шу затны Есинг Аллагьдан ﷻ да уялмай этдинг. Сен чи мени биябур этдинг бары да къабур агьлюлени арасында». Пайхаммар ﷺ ону шу сёзлени де айтып къувалагъан: «Ёкъ сагъа гечмеклик». Къыркъ гюнден сонг о адам Аллагьгъа ﷻ тилеген: «Гьей, Есим Аллагь ﷻ , Сен менден гечген бусанг магъа шону билдир. Гечмеген бусанг кёкден магъа от йиберип мени шу ерде яллатып къой». Сонг Жабрайыл Пайхаммаргъа ﷺ гелип, Аллагь ﷻ ону гечгенни билдире. Бек агьамиятлы ери, охувчулар. Алимлер айта, сюек булан этилген зинадан, сав адам булан этген зинаны гюнагьы уллу. Неге тюгюл де, сюек булан зина этсе, шо зина этген саялы бир адам гюнагьгъа тюше. Сав адамлар этсе, эки адам гюнагьлы. Шулай уллу гюнагьдан этмекден Аллагь ﷻ сакъласын бизин.

ЭЛДАР САБАНАЕВ