Яман хасиятлардан нечик къутулма бола?

Къыйматлы тогъуз ёрав

Гьар кимни де бир яман, уялма тюшеген хасияты болмай къалмай. Гьар ким де шо мердешин къояр эди. Амма яман хасияты зараллы буса да, шондан арчылма ким-ким де бажармай.

Уьйренип къалгъан ишден айрылмакъ бек къыйын бола, айрокъда алышыныв гьалеклик ва къарсалав тувдура буса. Амма къаст къылса, яман хасиятдан даимге айрылма бажарыла, гьатта яшавубузда шолар хыйлы йылланы узагъында сакъланып тургъан буса да.

Яман хасиятны къоймагъа кёмек этер бир-нече ёрав бермеге къарайым. Амма муратгъа етишмек учун, чыдамлыкъ тарыкъ: бир гюнден, бир айдан натижа гёрме бажарылмас.

Психологлар токъташдырагъан кюйде, яман мердешни къоймакъ ва шону орнунда яхшы башгъа затгъа уьйренмек учун, орта гьисапда уьч ай тарыкъ. Шо саялы бу ёл енгил болмас ва мурадына етишме сюеген адам чыдамлы болмагъа тарыкъ.

Яман хасиятлардан къутулма кёмек этеген тогъуз абат.

1. Яман хасият баргъа мюкюр болмакъ

Яман хасиятындан арчылма сюеген адам инг башлап этмеге тарыкълы иш – оьзюнде шо яман къылыкъ баргъа мюкюр болмакъ. Оьзюнде яман хасият баргъа гьакъ юрекден мюкюр болмайгъан адам бир заманда да шогъар къаршы иш этмеге башламас.

2. Бары да зат оьзюнгден гьасил болагъанны англамакъ

Олай да, яман хасиятдан арчылма болажагъыгъыз-болмажагъыгъыз янгыз сизден оьзюгюзден гьасил болагъанны билмек. Ичигизде бир зат бажарылмас деген тавуш чалына буса, шогъар тынглама тарыкъ тюгюл. Ругь якъдан гючлю болугъуз ва гертиден де сюйсегиз, шо иш бажарылмай къалмас.

3. Есибиз хатагъа мюкюр болагъанланы сюе

Буйрукъларын бузагъанлагъа Яратгъаныбыз рази тюгюл, тек хата этип, сонг шогъар гьёкюнегенлени ва шоланы тюзлемеге къарайгъанланы Есибиз сюе. Неге десе этген гюнагьларына гьакъ юрекден товбагъа тюшегенлер ва шо саялы Есибизден гечмекни тилейгенлер, гюнагьсызлагъа тенг бола.

4. Негет ва гёз алгъа тутулгъан иш

Тутгъан негетигизни мекенлешдиргиз ва этилежек ишлени гёз алгъа гелтиригиз. Этилежек ишлер нечик болажагъы гьакъда гёз алгъа тутулмагъан не иш де ахырына чыкъмас. Яшавуна яман таъсир этеген бузукъ ишлеринден айрылагъанда, адам ёрукълу ёлда гьар абатын англап этмеге тарыкъ.

Хасиятыгъызны яхшы этмек учун бир-бир гьаракатлы абатлар этмеге башлагъанча мекенли ишлер этмеге гьазир болугъуз. Аслусу – гёз алгъа тутулгъан муратлагъа етишмек учун болжал салыгъыз ва гюн сайын алгъа бармакъны гьайын этигиз. Натижаны шоссагьат гёрмесегиз токътамагъыз. Алгъа барыв гьис этилсе де, токътамай, гьаракатыгъызны узатыгъыз.

5. Яман мердешлени орнунда яхшыларын болдурмакъ

Яман мердешлерден къутулмакъ шайлы енгил болар, эгер сиз шоланы ёкъ этмек булан бирче, оланы орнунда яхшыларын, пайдалыларын болдурма къарай бусагъыз.

Кёбюсю гезик инсанда яман хасиятлар бошлукъдан тува. Олай адам яхшы гьислени сезмей. Шо саялы къурдашлар булан кёп къатнагъыз, къардаш аралыкъланы юрютюгюз ва къатты этигиз. Къошум ибадат (сюннет ишлер) мердешге айланса, яхшы болса тюгюл, бирт де яман болмас.

6. Гери къайтывдан сакъланыв

Яман ишлеге дав билдирилгенде гери къайтмакъны уллу къоркъунчлугъу къала. Шо саялы яман хасиятгъа гелтирмеге болагъан, шогъар элтеген ёллардан къутулмакъ бек агьамиятлы. Яман мердешге тартып йиберсе, шону орнунда бир пайдалы иш ойлашыгъыз ва шону оьзюгюзге сингдирмеге къаст этигиз.

7. Къатнайгъан адамларыгъызны алышдырыгъыз

Яман хасиятлар, айрокъда жагьил адамларда, кёбюсю гезик айлана якъдагъылана таъсиринден бола. Шо саялы, яман хасиятларыгъыз шо себепден болгъан буса, къатнайгъан адамларыгъзны алышдырыгъыз, алдагъы къурдашларыгъызны къоюгъуз. Олар сизин шо яман мердешигизни этмекге тартажакъ.

Эгер шолай адамлар булан къатнавну толу кюйде уьзмеге бажарылмай буса, ёлугъувланы болгъан чакъы аз этигиз. Яман адамлардан айрылмакъ аз, шоланы орнунда яхшы къылыкълы адамлагъа ювукъ болмакъ агьамиятлы. Яхшылар сизин де яхшы якъгъа багъып тартажагъы ачыкъ.

8. Спорт булан машгъул ва таза гьавада гезев

Яман хасиятлардан къутулагъанда, шоланы орнун къаркъараны чыныкъдырыв ва таза гьавада гезев булан алышдырыгъыз. Къаркъара чыныкъдырыв инсан учун не заманда да яхшы. Яман хасиятлардан къутулагъанда буса, айрокъда пайдалы. Спорт булан машгъул болув, гезев къаркъараны умуми гьалына яхшы таъсир эте, адамны гёнгюн ача.

9. Яман хасиятлы ишлени аз этив

Яман хасиятлардан къутулма сююп, тек шолардан арчылма болмай тура бусагъыз, пашман болмагъыз. Шо яман хасиятлы ишлени болгъан чакъы аз этмеге сама къарагъыз. Бир башлап яман мердешге элтеген ёлну къыйын этигиз, сонг бара-бара туруп шону этмекни артгъа теберигиз ва артда да айрылыгъыз шондан.

Инсан хата йибере, сюрюне ва йыгъыла. Эгер гёз алгъа тутгъан кюйде чалт барма бажарылмай буса, ругьдан тюшме тарыкъ тюгюл. Терсине, натижасы нечик айланса да, шогъар гьазир болугъуз. Гьар гюн къылыкъны уьстюнде ишлей бусагъыз, аз буса да алышына туруп, яхшы болажакъсыз.

Гьар заман Есибизден кёмек тилегиз. Яратгъаныбызгъа даим этилеген дуа алышыныв гьаракатны бир гесеги болмагъа тарыкъ. Бары да тилеклени гьакъ юрекден этигиз ва Есибиз сизге кёмек этме гьазир экенни унутмагъыз.

Яман хасиятлардан нечик къутулма бола?