Кофеден къалгъан жмыхны ташламайбыз!
Кофеден къалгъан жмыхны ташламайбыз!
Кёплерибиз эртенлер кофе ичмекни бек ушата. Биревлер иритилегенин (растворимый), башгъалар бюртюклюлерин (натуральный) сайлай. Осуну да, бусуна да яхшы янлары ва кемчиликлери ёкъ тюгюл.
Кофе ичип къаркъарабызгъа ярашгъан сонг, хабаны тюбюнде кофени ташланагъан къалды-къулдулары къала. Ташламай не этерсен дагъы ондан? Амма шону ташламай къоллап да бола экен. Янгыдан къайнатмакъны гьакъында да айтмайбыз.
Кофе ичилген сонг, шондан къалагъан жмыхны нечик къоллап болагъанны гьакъында хабарлайыкъ бугюн. Бир башлап шо ичилген кофеден къалгъан жмыхны бошгъапда къурутуп, банкагъа тёкме тарыкъ.
Йылавукъ хурт, лагь бол!
Бав есилери айрокъда узакъ янгурлардан сонг кёп болагъан йылавукъ хуртну (слизняк) заралын бек яхшы биле. Бав-бахчабыздан шоланы кофени кёмеги булан ёймагъа бола экен. Шону учун къуругъан кофе жмыхны 200 грамын ярты литр исси сувгъа (къайнар тюгюл) тёгюп, 4 сагьат тонгмагъа къоябыз. Сонг жиелекни, къапустаны, гюллени уьстюне сепмек булан бу зараллы хуртланы къачагъан гьалгъа салабыз.
Тазалыкъ учун къоллав
Къуругъан кофе жмыхгъа савут тазалайгъан алатдан бираз къошса, шону кёмеги булан бек батгъан савут-сабаны, ялгъавну, къазанны, печни уьстюн тазаламагъа бола. Ондан къайры, бу смесь булан керамиканы, хрустальны ва гьатта чыны савутну да уьстюн тырнамай тазалама бола.
Овошлагъа татли къошум
Баву барлагъа бирдагъы пайда: кофеден къалгъанны къый гьисапда да къоллама бола. Шону учун гьазир къыйгъа 500 грам жмыхдан къошуп, гьар чонкъгъа кошма ярай. Шолайлыкъ булан оьсюмлюклеге тарыкълы къый микроэлементлер (азот) булан толумлашажакъ.
Телижибинлерден къутулув
Эгер телижибинлерден ва къаражибинлерден ялкъгъан бусагъыз, кофеден къалгъан жмыхны ялгъавну яда башгъа бир затны уьстюне салып гюйдюрюгюз. Ондан чыкъгъан тютюнге жан-жанывар чыдамай, ёкъ бола.
Атир ийисли уьй
Къурутулгъан кофе жмыхны гиччирек хабалагъа салып, уьстюне аз-маз эфир майдан тамдырып, уьйню ер-ерине салабыз. Шондан гелеген атир ийис бек арив билине ва узакъдан сакълана.
Ийислени басылтыв
Кофени шо къалгъанлары яман ийислени басылтма да кёмек эте. Масала, бичакъ булан самурсакъ яда чабакъ гесген бусагъыз, оьзге савут-сабадан ийис геле буса, кофе жмыхны къоллама бола. Шону учун савут жувагъанда кофе жмыхны къошма ярай.
Кофе – къол усталар учун
Кёплерибиз къолу булан ону-муну этмеге сюе. Бизин къуругъан кофе къалдуланы шо муратлар учун да пайдаландырма бола. Масала, къуругъан жмых булан къол булан тигилген къурчакъланы ичин толтурма ярай. Олар заралсыз да дюр, къурчакъны бир къалипде сакълама да кёмек эте. Ондан къайры, кофе жмыхны уьйде этилген сапунгъа яда майчыракъгъа къошма да ярай.
