Болгъан чакъы кёп иржайыгъыз!
Болгъан чакъы кёп иржайыгъыз!
Инсанланы кёбюсю гьисап этеген кюйде, шу дюньяда яшамакъны маънасы – насипли болмакъ. Биз насипликни адамларда, савгъатларда, акъчада, ял алывда, ишге берилмекде, тюкенден ону-муну алывда ва ашда тапмагъа къарайбыз. Этеген бары да ишибизде биз насип излейбиз, дагъы ёгъесе не учун гьаракат этебиз дагъы?
Шо саялы намаз къылыв, ораза тутув, садагъа оьлешив йимик, дин къуллукъланы кютмеге заман гелгенде, бир-бир адамланы къаркъарасын эринчеклик бийлей. Олар этген ибадатындан шоссагьат пайдасын гёрмей ва гьар кютген дин иши саялы насипликни сезмей. Натижада ибадат артгъа тебериле яда бара-бара этилмейген болуп къала.
Насип – сезегенлик ва гьис билегенлик деп айтма ярай. Шо тез бите ва гелсе, шоссагьат гетме де гете. Биз нечакъы не этсек, гьалыбыз нечик болса да, насип бирт де бир кюйде турмай. Амма иржаймакъ – оьзюбюз сайлайгъан ёлдур. Иржайыв – оьзюбюз тергевню тюбюнде сакъламагъа болагъан гьис. Иржаймакъ булан ич гьалыбызны тез алышдырмагъа болабыз, ва аслусу – айлана якъдагъылагъа гьалыбызгъа рази экенибизни гёрсетмеге кёмек этеген алат.
Бираз ойлашып къарайыкълар: Есибиз булан, насип яшавну таймасдай ва битмесдей аламаты этилип, яралгъан эди буса, не болур эди? Шолай болгъан эди буса, балики, пашманлыкъ, къайгъырыв гьислени излер эдик. Оьз-оьзюбюзге гертини айтайыкъ – кёбюсю инсанлагъа, айрокъда тиштайпалагъа, бир-бирде пашман болмакъ кепине геле. Биревлер пашман кинолагъа къарамагъа ва онда болуп турагъангъа гёзьяш тёкмеге бек сюе.
Эгер арада масъала тувса, гюнлюк гьал авур болса, шо саялы къайгъыгъа тарымагъа себепми дагъы, ойлашып къараса, яхшы болмасмы? Балики, яшав ёлдагъы къыйынлыкълар чыныкъмакъ ва уьлгю алмакъ учундур. Шолардан таба бир-бир затлагъа уьйренмеге, гьакъыл чыгъармагъа боладыр.
Булай соравланы гьар ким оьз-оьзюне бермеге бола ва терен ойлашсакъ, ачыкъ гьакъны билербиз: яшавубузда не болса да, иржаймакъ учун ичибизден гелеген гюч болмай къалмас. Пашман иржайыв, насипли иржайыв, баракалла иржайыв, гьакъ юрекли иржайыв, терен гьакъыл гёрсетеген иржайыв: булар барысы да Яратгъаныбыз бизге берген лап къыйматлы савгъат – яшавубуз учун – шюкюрлюк билдиреген белгилер.
Иржаймакъ булан биз Есибизге чыдамлы экенибизни гёрсетебиз ва бютюн гьислерибиз булан Огъар рази экенибизни, бизин яратып, бар этген саялы баракалла билдиребиз. Яратгъаныбызгъа бакъгъан гьислерибиз ва ойларыбыз яхшы экенни иржаймакъ булан гёрсетебиз. Олай да, иржаягъан бет Есибизни рагьмусуна, яшавда не болса да, Аллагьу таала булан байлангъан умут юрекден таймагъанын ачыкъ эте.
Къурдашлар, болгъан чакъы кёп иржайыгъыз ва юзюгюзню ачыкъ, насипли ва гьакъ юрекден гелеген иржайыв безендирсин!
Сайида Ибрагьимова
