Есибизге шюкюрлюк этейик
Есибизге шюкюрлюк этейик
Багъыйлы уьюнде, агьлюсю булан эртен сав-саламат уянгъанда инсан шолайлыкъны болмагъа герекли гьал йимик гьисап эте. Амма бар-барлыгъыбыз биз къазанып болмагъан. Гьар мюгьлетибизде Есибизни рагьмулугъундан пайдаланабыз.
Савлугъу бар ва эсен-аман яшайгъан адамланы кёбюсю шулай парахат яшавлукъгъа Ер юзюндеги минглер булангъы оьзгелер бозарагъанны англамай. Азмы дюньяда савлукъгъа, агьлю яшавгъа умут этеген? Нечесе яш бар тойгъанча ашамайгъан? Нечесе адам бар уьйсюз къырда яшайгъан? Борчну тюбюндегилени санаву азмы? Авур гьалда яшайгъан адамланы хыйлы мисалын гелтирмеге бола, тек бир затны англамакъ учун шо да тамандыр: пайдаланагъан бары да затыбыз – Есибизни рагьмулугъу ва биз шо саялы шюкюрлюк этмеге герекбиз.
Инсан олай жан – даим оьзюнден яхшы яшайгъанлар булан тенглешдире оьзюн ва Яратгъаныбызгъа бар-барлыгъы учун шюкюрлюк этмеге унутуп къала. Шону орнунда, бизден осал яшайгъанлар булан тенглешип къарасакъ ва, Есибизни рагьмулугъу булан яхшы яшайгъаныбызны англасакъ, яхшы болмасмы дагъы?
Шюкюрлюк этмеге башлагъыз ва Есибиз дагъы кёп берерни гёрерсиз.
Инг башлап шюкюрлюк этмеге имканлыкъ бергени саялы Есибизге разилик билдирмеге ва алгъыш этмеге яхшы болур. Мугьаммат Пайхаммарны ﷺ уьмметинден этген саялы, савлукъ, агьлю, ашамагъа аш ва турмагъа уьй бар саялы шюкюрлюк этмеге тарыкъ. Уьлкебизде дав юрюлмей, парахат яшайгъаныкъ саялы да шюкюрлюк билдирмеге яхшы. Бизге шу гьалыбызны берген ва аман сакълайгъан саялы Яратгъаныбызгъа токътавсуз разилик билдирмек учун минглер булан себеп бар.
Имам аль-Гъазали булай айта: «Инсанлар осал ва Есибиз адам урлукъгъа берген яхшылыкълар саялы тийишли кюйде шюкюрлюк этип болмай. Шолай этмеге адамлар, гьатта ажайып къаст къылса ва оьрлюклеге етишсе де бажармай. Неге тюгюл, шюкюрлюк этмеге бажармакъ да – Есибиз береген яхшылыкъ ва шо саялы да разилик билдирмеге тарыкъ. Шо саялы берилген гьар яхшылыкъгъа шюкюрлюк этмеге тарыкъ ва сонг буса, шюкюрлюк этмеге болагъаныкъ саялы рази болмагъа герекбиз».
Шюкюрлюкню лап яхшы къайдасы – бар-барлыгъыбыз Аллагь ﷻ берген ниъматлардан экенни англав.
Яратгъаныбыз шюкюрлюк этмеге болагъан къулларындан этсин бизин. Амин.
