Яманлыкъ къылыгъыбызгъа сингип къалмасын
Яманлыкъ къылыгъыбызгъа сингип къалмасын
Девюрюбюзню алдынлы технологияларына уьйренген халкъбыз ва шо саялы бизин тамаша этме къыйын. Ата-бабаларыбыз ачувланып, гьалекленип йиберердей ишлени биз пап-парахат къабул этебиз. Инсан не затгъа да уьйренип къалагъаны белгили, айрокъда яман ишлеге тюз уьйренчикли бола.
Шолайлыкъ булан яманлыкъ яшавубузгъа сингип къала. Башлап о билинмей, гьис этилмей, сувну тамчысы йимик агъа-агъа. Тамчылар жыйыла туруп, агъымгъа айлана, агъым – денгизге алгъасайгъан уллу оьзен бола. Яманлыкъ да шо кюйде аста-аста топлана, жыйыла ва кёп болуп гете. Артда да яманлыкъ яшавубузну айланып къуршайгъанын билмей да къалабыз.
Оьзюбюз де билмей къалгъан кюйде, гёрюп ярамайгъан ишни, яманлыкъны бир гесеги болабыз. Яманлыкъ этилегенде гёрмемиш болабыз, ону гьис этмей оьтюп гетебиз. Яманлыкъны токътатма герек эдик, шону орнунда сувугъан юрек гёзлени башгъа якъгъа бакъдырып, ёлун узата.
Заманлыкъ затдан эсе бир зат да шолай узакъ сакъланмай, бар болмай. Мердешге айлангъан хасият, бара-бара яшавубузгъа таъсир эте ва яшап барагъан кююбюз шо уьйренчикли гьалгъа ошашлы бола.
Явагъан янгурну гёз алгъа гелтирип къарайыкъ. Минглер булан тамчылар ерге тюше, агъымгъа айлана. Маълумат янгур да лап шо кюйде. Токътамай такрарланып турагъан бир йимик иш яда хапарсыздан явуп йиберген телеянгур барыбызны да башыбызны уьстюне явуп йиберсе – шолар барысы да бир уллу ишни гесеги болур.
Шо агъымгъа тарыгъан сонг, биз гьис этегенибизни бара-бара тас этебиз. Ялгъангъа, яманлыкъгъа, оьчлюкге уьйренип къалабыз. Натижада аривлюкню, яхшылыкъны, гьакъыкъатны гёрмейген болабыз бу асилликлени гьис этмейбиз.
Амма яхшылыкъ болажакъ деп умут уьзмеге тарыкъ тюгюл. Яманлыкъгъа уьйренчикли болмакъ дегенни къоркъунчлугъун англама тарыкъ. Айлана якъдагъы пасатлыкъгъа арт берип, бир абатгъа гери къайтып, агъылып турагъан яманлыкъдан атылып чыкъмагъа ва дюньяны гёзеллигине, арив янларына янгыдан гиришмеге, огъар авмагъа не заманда да болабыз. Аривлюкге берилип, алда йимик яшавдан къуванмагъа, яхшылыкъдан сююнюп яшама бир заманда да геч болмас. Яманлыкъгъа иннемей багъып турма тарыкъ тюгюл, шону орнунда оьзюбюзден болагъанны этмеге, огъар къаршы турмагъа тарыкъбыз. Жагь кюйде къаттылыкъ гёрсетсек, яшавну хыйлы кемчиликлерин алдын алма, эрши ишлени токътатма бажарыла. Там-там деп агъып турагъан тамчы ташны да теше, агъымгъа айланып агъып йиберсе насдан да тазалай. Нечик этмеге герекни гьар ким оьзю сайлай ва шогъар гёре яшай.
