Имам Абу Ханифаны Аллагьдан ﷻ къоркъагъан кюю
Имам Абу Ханифаны Аллагьдан ﷻ къоркъагъан кюю
Бир къатынгиши къаптал сата болгъан. Имам Абу Ханифа шону багьасын сорагъанда, ол:
– Юз дирхем, гьей имам! – деп жавап берген.
– Болма кюй ёкъ, о шайлы багьадыр, – деп имам тамаша бола.
Гьайран къалгъан сатывчу багьасын юз дирхамгъа гётере. Имам бу гезик де шо багьадан алмагъа сюймей. Къатынгиши дагъы да юз дирхамгъа багьаны артдыра.
Имам янгыдан:
– Бу къаптал дёрт юз дирхамдан учуз болма кюй ёкъ, – дей
Чыдамлыгъы битип, ол сатывчу:
– Гьей, имам! Мысхыллама хари мени! – деп тилей.
Гьал алышынмайгъанны гёргенде, имам малны багьасы нечик болмагъа герекни англайгъан башгъа адамны чакъыра. Ол къарап, багьа берип, къапталны беш юз дирхамгъа багьалай ва имам лап шончакъы акъча берип, ону сатып ала. Оьзю де сатыв-алыв юрютгенге гёре, имам адилликни сакъламайгъанлыкъ, кемчиликлени яшырыв, ондан да бетери чегегенде, оьлчейгенде айсенилик булан янашыв инсанны бек яман ахыргъа гелтирмеге болагъанны кёп яхшы биле.
Асламчылыкъдан сакълан
Ким болса да, ишинде асламчылыкъгъа ёл къойса, процент алмагъа сюйсе, малын тас этежек яда иманына зарал гелтирежек.
Жабир етишдирген кюйде, Пайхаммар ﷺ процент алагъанны, шону берегенни, процентлени гьисабын юрютегенлени, шолай ишлерде шагьат болуп чыгъагъанланы налатлагъан ва: «Олар барысы да тенг кюйде гюнагьда…», – деген (Муслим).
Пеленче биревге борчгъа акъча берген имам Абу Ханифаны мисалыны аривлюгюне къарагъыз! Борчгъа акъчасын алгъанча имам шо адамны терегини салкъынында да турмагъан, неге десе шолайлыкъ процентге гьисап этилмесин деп сакълана болгъан.
Есибиз Аллагь ﷻ бизге барыбызгъа да янгыз сатыв-алывда тюгюл, яшавда ёлугъагъан оьзге бары да ишлерде де иманлы болмагъа насип этсин, деп тилейбиз.
