Къуръанны муъжизатлары
Къуръанны муъжизатлары
Кёплени неге бусурманланы Сыйлы Китабы бырынгъыдан берли агьамиятлыгъын тас этмей ва гьалиги заманда да алимлени, ахтарывчуланы тергевюн ажайып кюйде тарта деген соравгъа жавап бир: гьар гезик Къуръан ачагъанда олар Аллагь ﷻ яратгъан сезилмеген дерияланы, маъна теренликлени гёре, янгы-янгы билимлени зорлугъуна тамаша бола.
Амма бугюн биз охувчуланы тергевюне ачыкъ болгъан хыйлы гьайранлыкълардан янгыз бир гиччи ягъын таклиф этебиз, демек Къуръанны ажайып санавларыны гьакъында язабыз.
Тёбенде маъны якъдан бир йимик сёзлер берилген, оланы Къуръандагъы такрарлавлары кимни де тамаша этер.
«Гюн» деген сёз 365 керен эсгерилген, «гюнлер» буса 30 бар, «ай» – 12 керен.
«Етти кёклер» ва «кёклени яратыв» деген сёз байлам Къуръанда 7 керен язылгъан.
«Такъсырлав» деген сёз 117 керен ёлугъа, шону булан бирче Къуръанны къылыкъ буйругъу саналагъан «гечив» деген сёз эки керенге артыкъ – 234 бар.
«Айт» ва «айтдылар» деген сёзлер де тенг, бир йимик 332 керен язылгъан.
Тамаша тюгюлмю, «женнет» ва «жагьаннем» деген сёзлер гьариси 77 керен эсгерилген буса?!
«Дюнья яшавлукъ» деген сёзлени санаса 115 бола, «оьзге яшав, ахырат» да лап 115 керен бар.
Къуръанны бирдагъы агьамиятлы ери – яхшы къылыкълыкъ санала. Шолай, «яхшылар» 6 керен эсгерилген, «яманлар» буса 3 керен.
Олай да «шабагъатлав» ва «гьаракат» деген сёзлер бир йимик 107 керен язылгъан.
Ойлашып къарагъыз, «сююв» ва «тынглавлукъ» тенг кюйде – 83 керен эсгериле.
«Къатынгиши» ва «эргиши» Къуръанда гьариси 23 керен язылгъан.
Ажайып иш, яшгъа кюрчю салынагъанда 23 хромосом ортакъчылыкъ этилине, «эргишини» де, «къатынгишини» де санавуна гёре, олар Къуръанда эсгерилеген кюйде. Яш тизилишде буса ортакъчылыкъ этеген хромосомланы санаву 46 бола, демек атаны ва ананы 23-ер хромосомланы къошуму.
«Пислик» ва «хыянаталыкъ» деген сёзлер де бир йимик 16-ар керен такрарлана.
Бирдагъы тамаша гьал: «къуру» деген сёз Къуръанда 13 керен эсгерилген, «денгиз» буса – 32 керен. Оланы экисин де къошгъанда 45 бола. Шо санавланы жамындан процентлени чыгъарса, «къуру» – 28,888 процент, «денгиз» буса – 71, 111 процент бола. Гьалиги алимлер булан гьисап этип чыгъарылгъан кюйде, Ер юзюндеги къуру – 28,8 процент ерни алгъан, сув буса къалгъан – 71, 1 процентни елеген.
Макъалада эсгерилген бу ва оьзге тамашалыкълар, муъжизатлар Къуръан оьзге бары да китаплардан оьрде экенин гёрсете ва шо шексиз кюйде Яратгъаныбызны каламы.
Сыйлы Китапда да шо гьакъда булай язылгъан (маънасы): «Эгер бары да адамлар ва жинлер бирче жыйылып ва биригип Къуръангъа ошайгъан не зат буса да яратмагъа сюйсе, олагъа шо бажарылмас эди, гьатта бир-бирине кёмек этсе де» («Аль-Исраъ» деген сура, 88-нчи аят).
