Ташав-гьажини атындагъы межит: янгырылып турагъан заманы
Бизин бусурман этип яратгъан саялы, бары да макътав Есибиз Аллагьгъа ﷻ болсун. Ислам динни юрютмеге имканлыкъ бергени де, охуп билим алмагъа болагъаныкъ саялы да, Яратгъаныбызгъа – даим макътав. Гьар шагьарда, юртда, авулда мадрасалар булан межитлер бар, ругьани къуллукъчулар тюз ёл булан юрюмеге кёмек эте. Натижада ибадатгъа берилип, дин юрютегенлер гюн сайын кёп бола.
Хасавюрт шагьардагъы Ташав-гьажини атындагъы жума межитни имамы Солтан Абакаров булан юрюлюп турагъан къурулушну гьакъында ва оьзге темалагъа байлавлу этилген баянлыкъны бугюн охувчуланы тергевюне беребиз.
– Солтан, бир башлап оьзюнгню гьакъынгда айтгъанны, охувчулагъа яшав ёлунгну ачыкъ этгенни сюер эдик.
– Ассаламу алейкум ва рагьматуллагьи ва баракатугьу, аявлу мени бусурман къардашларым ва къызардашларым, «Ас-Салам» газетни гьюрметли охувчулары!
Мен ата юртум Яхсайда 1985-нчы йыл тувгъанман. Тогъуз класны тамамлап, халимбекавуллу имамыбыз Ислам-гьажи Агъабеков себеб болуп, Буйнакскдеги шайых Сайфуллагь Къадини атындагъы Ислам дин оьр охув ожакъгъа охумагъа тюшдюм. 2006-нчы йыл охуп битген сонг, ата юртума къайтып, Яхсайны эсги жума межитинде уьч йыл будун болуп ишледим. 2010-нчу йылдан 2013-нчю йылгъа ерли Бабаюрт райондагъы Адил-Янгыюртда имам болуп ишледим. 2013-нчю йылдан 2015-нчи йылгъа ерли шайых Ташав-гьажини атындагъы Хасавюрт шагьардагъы межитни мадрасасында Къуръан дарсдан муаллим болуп ишледим. 2015-нчи йылдан бугюнге етишгенче шайых Ташав-гьажини атындагъы межитни имамы болуп ишлеймен.
– Алим, имам, ругьани къуллукъчу нечик адам болмагъа герек?
– Мен ойлашагъан кюйде, имам инг башлап Аллагьдан ﷻ къоркъагъан, гьакъны сёйлейген, гьакъны якълайгъан, гьакъгъа ва Аллагьны ﷻ динине чакъырагъан, жамиятны масъалаларын чечмеге къаст къылагъан, инсаплы адам болмагъа герек. Олай да, ол динге ва бусурманлагъа юреги авруйгъан ва арив, йымышакъ, яхшы къылыкълы, исбайы хасиятлы инсан болмагъа тарыкъ.
– Дин яягъан адамны суратладыкъ, гьали буса, жамиятны гьакъында да айтайыкъ: халкъ имамны айланасында нечик къуршалма, нечик огъар кёмек этме бола?
– Халкъ межитге къурдаш болуп, жумагъа, жамият намазлагъа юрюмек булан, уланларын ва къызларын Къуръан ва илму охумагъа йибермек булан, оьтгерилеген дин мажлислерде ортакъчылыкъ этмек булан ва тарыкъ заманда жамиятны масъалаларын чечегенде, имамны яндавурунда табылмакъ – муна бу огъар лап уллу кёмек, деп эсиме геле.
– Солтан, сен Хасавюрт шагьардагъы межитни имамысан. Белгили йимик, мунда нече тюрлю миллет яшай, шо саялы жамиятыгъыз нечикдир, арада татувлукъ бармы, масъалалар ёлугъамы, деп сорама сюемен.
– Тюз, бизин жамиятыбызда нече тюрлю миллет бар. Нечакъы да яхшы, татувлу ва рагьмулу жамиятбыз. Гече-гюн деп къарамай, къайсы якъдан болса да, даим кёмек этмеге гьазир турагъан жамият.
Алгьамдулиллягь, бары да макътавлар Есибиз Аллагьу таалгъа болсун! Миллетлени арасында миллет айырыв, татувсузлукъ ёкъ. Аллагь ﷻ сакъласын миллет айырмакъдан. Абу Давуд гелтирген гьадисде Мугьаммат Пайхаммарыбыз ﷺ шо гьакъда булай айта: «Миллет айырывгъа чакъырагъан, миллет айырып дав этеген ва миллет айырып оьлген адам мени уьмметимден тюгюл».
– Гьалиги вакътиде межитигиз янгыдан ишленип турагъанны билемен. Алдагъысында адам сыймай эдими яда бинасы эсги болгъанмы эди?
– Алдагъы межитибиз бек эсги болгъан саялы, бинасы нече де бузукъ даражада эди. Ондан къайры, жумагюнлер межитни ичи толуп, халкъ сыймай эди. Гьар йыл ремонт этеген болдукъ. Уьстевюне, эки керен ал якъгъа багъып, гесеклеп биналар къошмагъа тюшдю.
О саялы, межитибизни уллулары, вакиллери булан гьакълашып, янгы ва уллу межит къурмагъа ойлашдыкъ.
«Янгы межитде нече адам намаз къылмагъа болажакъ?» – деп, бизге кёп сорала. Янгы межитде, Аллагь ﷻ буюрса, 2000 адам намаз къылмагъа болажакъ, деп шолагъа жавап беремен.
– Къурулуш тынч масъала тюгюл. Мунда кёмекчилер бармы, тарыкъ-герек булан таъмин этилгенмисиз, иш нечик юрюле?
– Гьалиге ерли иш нечакъы да яхшы ва чалт юрюлюп тура, Аллагьгъа ﷻ шюкюр! Шо саялы да Есибизге арты уьзюлмейген макътавлар болсун. Бош ерде тизмеге тынчдыр, тек бир бинаны бузуп, шону еринде башгъасын тургъузмагъа, шо ерни онгармагъа бек авур иш. Озокъда, къыйын болгъангъа гёре, Яратгъаныбыз зувабын да кёп этип, ин ша Аллагь ﷻ артдырып бережек, деп умут этебиз.
Кёмек этегенлер де бар – Аллагьгъа ﷻ макътав. Кёмек этегенлени де эсгермеге сюемен: Ёл-транспорт министерликни министри Жамболат Салавов, Хасавюрт район администрацияны башчысы Арсланбек Алибеков, Хасавюрт шагьар администрацияны башчысы Корголи Корголиев, Хасавюрт шагьар администрацияны заместители Арслан Арсланов, Уллубий Абуков, Артур Хосаров, Марат ва Алимпаша Айдемировлар, Яхсай юртлу Азамат Батырмурзаев ва Алберт Алхасов, Даниял, Изамдин, Ражаб, (бирлерини фамилияларын билмеймен – айып этмесин). Булагъа барысына да Аллагь ﷻ рази болсун. Эсги биналаны бузагъанда Тимур дейген улан техника йиберди. Ондан къайры, Хасавюрт район ва шагьар имамланы башчысы, дин илмуланы доктору Магьаммат Магьамматовгъа, Хасавюрт шагьардагъы межитни имамы Ягьия-гьажиге де баракала билдирмеге сюемен.
Олай да, жумаларда бизин межитибизге акъча жыймагъа, деп чакъырыв этген бары да имамлагъа – уллу баракалла. Бизин жамиятыбызгъа айрокъда хас кюйде баракалла айтмаса, бирт де ярамас! Прораб болуп, кюрчюлерин тургъузгъанча къарап, кёмек этип айлангъан Магьаммат дейген адамгъа ва эсги межитибизни бузагъанда ортакъчылыкъ этип айлангъанлагъа, акъча жыймакъ учун, жумаларда къутукълар тутуп токътагъанлагъа, гьар тюрлю кёмек этген бары да уланлагъа – уллу-уллу баракалла билдиремен, Аллагьны ﷻ шабагъаты болсун, деп алгъыш этемен. Къурулуш ишни мени булан бирче, авур янын бойнуна алып, айланып турагъан, межитибизни председатели Гьасан Мамашевге, атын тутуп, айрыча баракалла айтма сюемен, Аллагь ﷻ рази болсун деймен.
Кёмек этгенлени барысына да этген зувабы ахыратында уллу хазна болуп табылсын, йа Аллагь ﷻ !
– Зувап къазанма сююп, халкъ межит тизмек учун ортакъчылыкъ эте, жамият учун оьзге пайдалы ишлеге къуршала, акъчасы ёкълар загьматы булан кёмек эте. Гертиден де, бу ажайып гьаракат. Шулай ишлеге къошулгъанлагъа болагъан шабагъатны гьакъында охувчуланы эсине салсанг яман болмасдыр?
– Межит къурмакъ, мадраса ишлемек, кёпюр тизмек, ёл этмек ва сув булакъ чыгъармакъ – булар уллу зувап ишлерден. Халкъ къоллап, пайда алып тургъан чакъы заман адамгъа оьлген сонг да токъталмай, зувап агъылып гелип турагъан яхшы амаллардандыр. Шу къурулуп турагъан межитде адамлар нечакъы заман намаз къылып, Къуръан охуп ва оьзге ибадатлар булан машгъул болгъан чакъы заман, шонда ортакъчылыкъ этгенлеге зувабы токъталмай агъылып туражакъгъа шеклик ёкъ.
Ибну Гьиббан ва Баззар гелтирген гьадисде шо гьакъда Пайхаммар ﷺ булай айта: «Ким къыр тавукъну уясы чакъы буса да межит тиксе – ол адамгъа Аллагьу таала женнетде бир уьй тизер».
– Солтан, имканлыкъдан пайдаланып, охувчуларыбызгъа не айтар эдинг?
– Аллагь ﷻ рази болагъан яхшы ишлерде кёп ортакъчылыкъ этигиз. Артдагъы вакътилерде ата-анагъа ва уллулагъа яшланы, жагьиллени янындан абур-сый аз болуп тура. Ата-анагъа, уллулагъа ва алимлеге тынглагъыз.
Абу Давуд ва Тирмизи гелтирген гьадисде Мугьаммат Пайхаммарыбыз ﷺ булай айта: «Уллулагъа абур-сый этмейген ва гиччилеге рагьмулу янашмайгъалар мени уьмметимден тюгюлдюр». Тирмизи гелтирген Пайхаммарны ﷺ башгъа гьадисинде: «Аллагьны ﷻ разилиги – ата-ананы разилигиндедир ва Аллагьны ﷻ ачуву – ата-ананы ачувундадыр», – деп бар.
Дагъы да, бизин жагьиллеге кёп питнени, пасатлыкъны ва терсликни ажайып заманындабыз, деп айтма сюемен. Гьей халкъ, Дагъыстан муфтиятгъа таби болсагъыз – адашмассыз. Гьакъны гьакъ кюйде гёрсетип, гьакъгъа таби болагъанлардан ва батилни (къынгыр ёлну) батил кюйде гёрсетип, батилден арек болагъан, сакъланагъанлардан болмагъа барыбызгъа да Аллагьу таала насип этсин. Амин.
Тизилип турагъан межитибизге къол ялгъамагъа, садагъа этмеге сюегенлер бар буса, шу номерге: +7(988)-443-62-43 сёйлеме бола.
Сизге де баракалла: «Ас-Салам» газетге де, бары да къуллукъчуларыгъызгъа да ишигизде юрек тутгъан яхшы муратлагъа етишмекни ёрайман.
Вассаламу алейкум ва рагьматуллагьи ва баракатугьу. Савболугъуз!
