Жыйында ортакъчылыкъ этгенлеге – уллу баракалла
Ораза айда халкъыбыз жыйылып, уллу ифтар этилгени ажайып ишлерден.
Шо жыйын дин бирликни, халкъ бирликни, инсан арадагъы дослукъну гёрсетди. Гьар бир агьвалат оьзлюгюнден болмай, шону онгарагъан, юреги авруп гьаракат этегенлер бола. 15-нчи апрельде оьтгерилген къумукъ халкъны ифтарын онгаргъанлагъа, шону ишинде жагь кюйде ортакъчылыкъ этгенлеге миллетибизни атындан баракалла сёз айтмагъа сюемен.
Инг башлап, Аллагь ﷻ учун деп айтып, ифтарда ортакъчылыкъ этгенлеге, арада татувлукъ болсун деп, бары да ишин къоюп гелгенлеге баракалла болсун. Ругьани центргъа багъып этген гьар абатына Есибиз рази болсун.
Шу ифтарны оьтгермеге кёмек этген бары да адамгъа гьакъ юрекден баракалла болсун деп айтаман. Сёзю булан, къолу булан, оьзюнден болагъан гьаракаты булан ортакъ ишге къошулгъанлар булан Яратгъаныбыз рази болсун, этген ишин зувапгъа язсын. Бары да къумукъ райондан гелип, жагь кюйде иш къуруп, 650 «волонтёр» эртенден гече болгъанча гелегенлени къаршылады, алданокъ онгарып тарыкъ сурсат болдурду, тепси къурду, айлана якъны онгарды, тазалады, сонг арты булан сибирип тап-таза этди. Низамлы кюйде бир ерде ончакъы халкъны ерлешдирмеге, ашатмагъа, сагьнагъа агьамиятын бакъдырардай «программа» онгармагъа тынч иш тюгюл. Шоланы барысын да оьр даражада этмеге Есибиз Аллагь ﷻ кёмек этди, ишибизни онгарды, алгьамдулиллагь.
Айрыча баракалла булан, харж чыгъарып, чомарт кюйде кёмек этгенлени айтмагъа ери болур. Жаны авруп, «Не тарыкъ?» – деп турагъан миллетибизни оьзден уланы Халкъ Жыйынны депутаты Магьаммат Магьамматовну атын эсгермесе болмай. Магьаммат Магьамматсолтанович башындан тутуп ишибизде ортакъчылыкъ эте туруп, оьтесиз кёмегин гёрсетди. Аллагь ﷻ огъар рази болсун, этген садагъасын къабул этсин.
Бирче ораза ачыв адамланы бир-бирине ювукъ этмей болмай. Муна шулай ишлерде бирлик беклеше, Есибиз Аллагь ﷻ Дагъыстанны бир этгир, халкъланы аралыгъын татувлу этгир, деп алгъыш этебиз.
