«Аль-Игьляс» сураны оьрлюгю

Жабир етишдирген гьадисде Пайхаммарны ﷺ булай сёзлери бар: «Ким гюнде 50 керен «АльИгьляс» («Къулгьу») сураны охуса, огъар Сорав алынагъан гюн: “Гьей, Аллагьны ﷻ макътап тургъан къул, тур ва женнетге гир”, – деп айтажакъ».

Муслим ва Бухари имамлар сакълагъан гьадисде айтылагъан кюйде, Пайхаммар ﷺ бир гюп адамны сапаргъа йиберген болгъан башына пеленче биревню де салып. Намаз къылагъанда шоланы имамы гьар «Альгьамдан» сонг «Аль-Игьляс» сураны да охуй болгъан. Гери къайтгъандан шо адамлар бу ишни гьакъында Пайхаммаргъа ﷺ билдире. Расулуллагь ﷺ сапардан къайтгъанлагъа: «Сиз огъар сорагъыз, неге ол гьар ракаатда «Альгьамдан» сонг «Аль-Игьляс» сураны да охуй болгъанны гьакъында», – деп ёрав берген.

Пайхаммар ﷺ айтгъан кюйде, асгьабалар ёлда имам болуп тургъан гишиге шо гьакъда сорав бере. Ол булай жавап къайтара: «Бу сура Есибиз Аллагьны ﷻ машгьюрлюгюн гёрсете, шо саялы мен ону охумагъа бек сюемен». Бу сёзлер Пайхаммаргъа ﷺ етишгенде, ол: «Гьакъ кюйде, Аллагь ﷻ ону сюегенни гьакъында сиз шогъар айтыгъыз», – деген. Аявлу дин къардашлар ва къызардашлар. «Аль-Игьляс» деген сурада 47 гьарп бар ва Къуръан охугъан гьар гьарп саялы болагъан шабагъат он керенге арта. Шолайлыкъ булан, бу сураны охугъангъа болагъан шабагъат 470 етише. Али асгьаба айтгъангъа гёре, намазда охулагъан Къуръан аятлар саялы болагъан шабагъат бирден-бир кёп.

Есибиз Аллагь ﷻ Къуръан кёп охуйгъанлардан ва охугъанны къабул этегенлерден этсин бизин. Шондан таба Яратгъаныбыз бизин сюерге ва женнет агьлюлерден этерге себеп болсун. Амин.

МАГЬАММАТГЬАБИБ САЙИДОВ