Рузман къоялъ салават цIали
Рузман сордоялъ ва къоялъ цIакъго хирияб буго салават цIализе. ГIемер цIаларабгIан лъикIабги буго. 300 нухалдасагIаги дагьлъизе тезе бегьиларин абуна цо-цо гIалимзабаз.
Имам КъустIуланияс «Мавагьибу Ладуният» абураб тIехьалда хъвалеб буго: «Авараг ﷺ ккола тIолабго гIаламалъул сайид. Цогидал къоязда дандеккун рузман къоги ккола бищун хирияблъун. Рузман къоялъ битIараб салаваталъул хиралъиги буго цогидал къояз битIараздаса цIикIкIун...», - абун.
Дунял-ахираталда умматалъе щвараб нигIмат щола Аварагасдасан ﷺ, ай ТIадегIанав Аллагьас ﷻ Аварагасде ﷺ рещтIинабула, цинги гьесдасан умматалъе бикьула. Гьеб къо МухIаммадияб умматалъе гьаб дунялалда гIидлъунги бихьизабун буго. Гьеб къоялъ бусурбабазе кутакаб пайда щола, гьезул хIажат БетIергьанас ﷻ тIубала, гьарарабги къабул гьабула. Гьеб кинабго бусурбабазе щола Авараг ﷺ сабаблъун. Гьелъ щукругун рецц гьаби, гьединго, дагьа-макъаб бугониги гьесдехун ﷺ нилъер рахъалдаса бугеб хIакъ тIубайлъун ккола гьеб къоялъ салават гIемер битIи.
Рузман сордоялъ муридзаби данделъун цIалун гIадат билълъараб буго нилъер улкаялда хасаб сигъа салаваталъул. Гьебги буго кутакалда жиб цIали кири цIикIараб салават.
ГIали-асхIабасдасан бицун, «Нагьжул мутакъин» абураб тIехьалда хъван буго: «Щибаб къойил лъаб-лъаб нухалда ва рузман сордоялъ нусго нухалда Аварагасде ﷺ
صلوات الله وملائكته وانبيائه ورسله وجميع خلقه على محمد وعلى ال محمد عليه وعليهم السلام ورحمة الله وبركاته
гьаб лапсалдалъун салават битIарав чиясул салават кинабго халкъалъ битIараб салаваталда бащалъула, Къиямасеб къоялъги гьев Аварагасул ﷺ къокъаялдаса вахъинавула ва Алжаналде лъугьинегIан Аварагас ﷺ гьесул кверги ккола», - ян.
Гьеб салаваталъул магIнаги ккола: «Аллагьасулги ﷻ Гьесул малаикзабазулги анбияазулги расулазулги ва кинабниги халкъалъулго салават лъеги МухIаммадида ва МухIаммадил агьлуялда. Гьесдаги ва гьездаги буго саламги, Аллагьасул ﷻ рахIматги баракатги».
Рузман къоялъ цIализе хирияб буго суратул «Кагьф». Гьеб цIалулеб заман хутIун, нахъияб заман салават цIалун инабизе бихьизабулелги руго цо-цо гIалимзаби.
Аллагьас ﷻ макъам-даража тIадегIан гьабеги гьеб сигъаялдалъун салават битIизе нилъ гьесизарулел хIакъикъиял муршидзабазул. БетIергьанас ﷻ гьезул баракат-шапагIат камунги нилъ тогеги кIиябго рукъалъулъ. Амин!
