Рецц Аллагьасе ﷻ

АлхIамдулиллагь, Аллагь ﷻ, Дур баракаталдаса
Нижее кьурабщинаб лъикIал нигIматаздаса,
Бусурбанаб диналъулъ рижун ратиялдаса,
ХIабибасул умматалда гъорлъ гьариялдаса.

Дуца кьураб гIакълудухъ, чорхой кьураб сахлъидухъ,
Беразул канлъиялъухъ, гIундузда рагIиялъухъ.
ХIатIил, кверзул сахлъидухъ, кваназе квен щвеялъухъ,
Кварабщинаб регьиндал, АлхIамдулиллагь, Аллагь ﷻ.

ХIухьел цIазе гьавадухъ, хинлъи кьолеб бакъалъухъ,
Къаси канлъи бихьизе бугеб шагьри-моцIалъухъ,
ГIорцIизегIан гьекъезе, рацIцIалъиги цIунизе
Дуца кьураб лъималъухъ, АлхIамдулиллагь, Аллагь ﷻ.

Лъимал-хъизан щвеялъухъ, хIалалай лъадиялъухъ,
Эбел-инсул сахлъидухъ, гьел чIаго ратиялъухъ,
Дуца нижее кьураб исламияб лъаялъухъ,
Лъалареб жо гьикъизе ругел гIалимзабазухъ.

Хасго тIарикъаталъул хIакъал муршидзабазухъ,
Дуе тIагIат гьабизе рарал гьал мажгитазухъ,
Дунял гьабизе къуват ва рес нижей щвеялъухъ,
Нижер чорхой сабругун парахалъи кьеялъухъ.

ГIелму босизе ругел тIахьалгун мадрасазухъ,
Жанир рукIине рукъги санагIатги кьеялъухъ,
Ракълилаб, хIинкъи гьечIеб, парахатаб гIумрудухъ,
ТIолабго рецц цохIо Дуй, ТIадегIанав БетIергьан.

ШАМИЛ ИБРАГЬИМОВ, ШАМИЛ РАЙОН, ГЬЕНТIА РОСУ.