ГIамалалдасаги лъикIаб
Ният ккола гIибадаталъул кьучI ва киналниги гIамалазул рухI. Амма хириял гIамалал хвезаризе бегьула цохIо мекъи гьабураб нияталъ. Гьелъ ният гьабизе лъазе ккола.
Цо-цоязда ккола ният гьаби захIматаб жо бугин. Гьеб гьедин гьечIо. Ният ккола дуда гьабизе ракIалда бугеб жоялде къасд гьаби, гьелъул шурутIалги цIунун.
Къуръаналъги ният бацIцIадал гIадамал реццун руго ва хIадисалдаги буго: «Муъминчиясул ният гьесул гIамалалдасаги лъикIаб буго», - ян абун.
Аллагь ﷻ нилъер ракIазде валагьула, ракI нияталъул бакI бугелъул.
Аллагьас ﷻ къиямасеб къоялъ малаикзабазда абула Жиндир лагъасе лъикIаб гIамал хъвайин гьесул кагътида. Малаикзабаз абула: «Я, БетIергьан, гьес гьеб гIамал гьабун букIинчIо», - абун. ТIадегIанав Аллагьас ﷻ абула гьесул ният букIанин гьеб гьабизе.
Дунялалда бусурбанчияс дагьаб гIамал гьабуниги, абадияб алжан гьесие щвезе бегьула ТIадегIанав Аллагьасе ﷻ гIибадат гьабизе букIанилан абураб ният букIиналдалъун.
Кьижулеб мехалъ муъминчиясул щулияб ният бугони сардилъ вахъун тагьажуд гьабизе абун, цинги макьуги бергьун, ворчIичIого хутIани, тагьажуд бараб мехалъ гIадин кири хъвала гьесие.
Цо лъикIаб жо гьабизеян муъминчияс ният гьабуни, цинги квалквал ккун гьес гьеб гьабичIого хутIани, гьесие гьеб гьабураблъун хъвала.
