ЛъугIана Рамазан моцIги
Церекъад Ражаб моцI, сон ШагIбан регIун,
Щвана ахиралде Рамазан моцIги.
Къоял ун, моцIал гIун, лъагIелал сверун,
Дагьлъун унеб гьечIищ нилъер гьаб гIумру?
Кинабго рецц буго БетIергьанасе,
Ислам-диналда нилъ рижун ратидал.
Гьаб дуниял нилъей копой кьун гьечIин,
Аллагьасе тIагIат гIемераб гьабе.
Ражаб моцIалъ хьараб хьон тIирщанадай?
ШагIбаналъ лъалъараб хур бижанадай?
Рамазаналъ лъилъун хур бачIанадай?
Балагье нахъехун, вацалгун яцал.
Жакъа Рамазан моцI лъугIулел къояз,
Кверал цереги ккун гьари гьабилин.
Къабул гьабе гьари, Къудратав Аллагь,
Дур рахIму-цIобалде божарал нижер.
Кье, Аллагь, нижее сахлъигун гIумру,
Чорхолъ иман цIикIкIун, ракI тIеренлъулеб.
Хадусел сонаца хириял моцIал,
Мун гIемер рехсолел моцIаллъун гьаре.
Рагъуй ахир лъурал къоял рачIаги,
Диналъул агьлуял цоцалъ цолъаги.
Устарзабазул нух ккурал гIемерлъун,
ТIарикъат тIегьайги бусурбабазе.
ЖахIда-хIусуд бугел кантIизе гьарун,
ДагIба-къец ккаразде иман тIинкIаги.
Мискинлъи тIагIаги, гIалам гIорцIаги,
Садакъа кьолезул къадар цIикIкIаги.
Дуца кьуна гIумру, хирияв Аллагь,
Дуе лагълъиялъе ниж хIадур руго.
Хвалил ургъел нижей бигьа гьабизе,
Алжаналде унеб нухде раче ниж.
Дунял кIочон тела, Дуде руссина,
Ахират лъикIаб кьун рохизе гьаре.
Хириял моцIазул хIурматги гьабун,
Къабул гьабе, Аллагь, гьаб нижер дугIа.
Къабул гьаре Аллагь ккуразул кIалал,
Рахъарал сахIалги, кьураб садакъа,
Рарал таравихIал къабулги гьарун,
Азарилъе бахун кири хъвай Аллагь.
КIал биччараб къоялъ, гIидалъул какда,
Бачараб такбиралъ росулъ нур чIаги.
Хириял моцIаца хабзалахъе ун,
Хваразде цIалараб рухIазе щваги.
КIалбиччан къояца барки гьабизе,
Цоцахъе хьвадизе къуват кье, Аллагь,
Херал-унтаразде, гIагарлъиялде,
Гьабураб зиярат кирилъун гьабе.
Къабул гьабе, Аллагь, нижер гьаб дугIа,
Хириял моцIазул хIурматалдалъун.
Хвалил кьогIлъи нижей бигьалъун гьабун,
Алжаналде унел агьлулъун гьаре.
