Къимат гьабизин

Къимат гьабизин

РачIая, муъминзаби, рагIул къимат гьабизин,

КъватIул харбазде руссун, хиянат гьабиларин.

Гьаниб гIанкI, доба церан, гIадада къоял тIамун,

ТIадаб фарз тIубачIого, тIеренаб нух кквеларин.

ТIад лъураб как бачIого, чIандаяб хабар бицун,

Хиянат гьабиларин БетIергьан Аллагьасе.

БоцIи-панзалъул бицун гаргадулезда рекъон,

Къокъине риччаларин рикIкIун дуй кьурал къоял.

ТIагьаясе хIел-хIедун, ХIабибги кIодо гьавун,

Нилъеца тIобитIизин тIад вугес лъураб налъи.

Авараг ﷺ гIагар гьавун, гIибадат камил гьабун,

Дунялалъул лъабго къо лъикIлъиялда тIамизин.

Телефоналде вуссун, ватсапалда хъирщадун,

Хъулухъ гуреб ишалде ишара босиларин.

БитIараб-тIекъаб гьабун, тIекъаб-битIараб гьабун,

ГьетIараб рагIадалда хадув векериларин.

Камилаб сурукъ бихьун, сурукъаб берцин хьихьун,

Рихараб гIамалалда гIумру тIобитIиларин.

ТIулил вац рикIкIад гьавун, рекIкIав гIагарлъизавун,

ТIун лъуни дуца кваркьи, цинги регъоларебин.

Воре, диналъул вацал, аниб толеб дуниял,

Ахираталъул рокъоб рагье дуе каваби.

Кириги гIатIид гьабе, гIамалги рекъезабе,

Къиямасеб къоялда батулебин даража.

МухIаммад ХIасанов, КIуяда росу